قازاقستان حالىق پارتياسىنان ءماجىلىس دەپۋتاتتىعىنا كانديدات, قحپ اتىراۋ وبلىستىق فيليالىنىڭ توراعاسى بالجان دوسمۇحامبەتوۆا اتىراۋ قالالىق پەرزەنتحانا ۇجىمىمەن كەزدەستى.
بالجان دوسمۇحامبەتوۆا ەڭ اۋەلى پەرزەنتحانا دارىگەرلەرىنە پارتيانىڭ سايلاۋالدى باعدارلاماسىن تانىستىردى.
– ادىلەتتى قازاقستانعا – جالدامالى قىزمەتكەرلەردىڭ الەۋمەتتىك جانە ەڭبەك قۇقىعىن تيىسىنشە قورعايتىن جاڭا ەڭبەك كودەكسى قاجەت. حالىق پارتياسى ءاربىر ازاماتتىڭ مەديتسيناعا, بىلىمگە قول جەتىمدىلىگى بار, ونىڭ قۇقىعى تولىق قورعالاتىن ءادىل قازاقستاندى قالايدى. دەنساۋلىق سالاسىنا ءمامس ەنگىزۋ ءۇمىتتى اقتامادى. ەلىمىزدىڭ كوپ تۇرعىنى جاپپاي «Damumed»-كە تىركەلۋ مەن دارىگەردىڭ قابىلداۋىنا جازىلۋ مۇمكىن ەمەس دەپ شاعىمدانىپ جاتىر, – دەدى بالجان دوسمۇحامبەتوۆا.
سونداي-اق ول قابىلدانىپ جاتقان شارالار مەن زاڭدارعا قاراماستان, ەلىمىزدەگى دارىگەرلەردىڭ جالاقىسىن كوبەيتىپ, الەۋمەتتىك مارتەبەسىن قورعاۋدى قاجەت ەتىپ وتىرعانىن تىلگە تيەك ەتتى.
– ءبىز وسى ءبىلىم مەن دەنساۋلىق سالاسىنا ينۆەستيتسيا قۇيىپ, جالاقىنى ەسەپتەۋدى تۇبەگەيلى قايتا قاراۋدى ۇسىنامىز. ويتكەنى بيۋدجەتتىك سالادا ءالى كۇنگە دەيىن ەسەپتەۋ ءتاريفى بۇرىنعى جۇيەمەن تۇر. بازالىق جالاقى 10 جىلدان استام ۋاقىت بويى وزگەرمەگەن, – دەدى ول.
كەيىننەن سپيكەر ءبىلىم سالاسىنداعى قوردالانعان ماسەلەلەرگە توقتالىپ ءوتتى.
ال قحپ شىعىس قازاقستان وبلىستىق فيليالىنىڭ توراعاسى, پارلامەنت ءماجىلىسى دەپۋتاتتىعىنا كانديدات قايرات مۋسين وسكەمەندەگى بالالار اۋرۋحاناسىنىڭ ۇجىمىمەن كەزدەستى.
– حالىق پارتياسى بالاباقشالاردان باستاپ حالىققا تەگىن مەديتسينالىق قىزمەت كورسەتۋدى جانە تەگىن ءبىلىم بەرۋدى قولدايدى. سونداي-اق ءبىز دارىگەرلەر مەن مەدبيكەلەردىڭ, بالاباقشا تاربيەشىلەرى مەن كۇتۋشىلەردىڭ, مۇعالىمدەر مەن جاتتىقتىرۋشىلاردىڭ مارتەبەسىن كوتەرەمىز. بالالاردىڭ ءومىرىن قۇتقاراتىن جانە تاربيەلەيتىن بارلىق ماماندارعا لايىقتى جالاقى تولەنۋى قاجەت, – دەدى ق.مۋسين.
سونىمەن قاتار ول مەملەكەت 1-3 بالا تاربيەلەپ وتىرعان انالار ءۇشىن قولجەتىمدى باسپانا, ال كوپبالالى انالارعا تەگىن باسپانا بەرۋى كەرەك دەدى. بۇل ۇسىنىس پارتيانىڭ سايلاۋالدى باعدارلاماسىندا ناقتى كورسەتىلگەن.