قۇلتەمىردىڭ قۇلاعىندا وينايتىن بۋىن ءوسىپ كەلە جاتىر. جاساندى ينتەللەكت جاساپ شىعارۋدا قازاقتىڭ قارا دومالاقتارى الەمدىك دودالاردا وي جارىستىرا الادى. قاراعاندى ايماعىنىڭ التى مەكتەبى روبوتتەحنيكا بويىنشا ورتالىق ازيا ويىندارىندا جۇلدەلى ورىندار مەن اتاۋلى سىيلىقتاردى جەڭىپ الۋى – سوزىمىزگە دالەل. ولاردىڭ ءبىرازى دۇنيەجۇزىلىك چەمپيوناتتا سىنعا تۇسپەك.
استانادا وتكەن Central Asia First championship – 2023 روبوتتەحنيكا ويىندارىندا ەلىمىزدىڭ تۇكپىر-تۇكپىرىنەن كەلگەن 1 200-گە جۋىق وقۋشى باق سىناستى. قاراعاندى وبلىسىنىڭ نامىسىن سەگىز كوماندا قورعاپ, ونىڭ التاۋى جۇلدەلى ورىندار مەن اتالىمدارعا لايىق دەپ تانىلدى. ماسەلەن, وي جارىسىندا ەكىنشى ورىن يەلەنگەن «مۇراگەر» مامانداندىرىلعان مەكتەپ-ليتسەي ينتەرناتى وقۋشىلارىنىڭ JelToqSun كومانداسى اقش-تا وتەتىن First championship – 2023 دۇنيەجۇزىلىك چەمپيوناتىنا جولداما الدى.
– بالالار بارىن سالىپ دايىندالدى. بۇعان دەيىن ولار جاس روبوتتەحنيكتەردىڭ بىرنەشە جارىسىندا جۇلدەلى ورىن العان ەدى. كوماندا قۇرامىندا جەتى وقۋشى بار. ەندى دۇنيەجۇزىلىك چەمپيوناتقا دايىندالامىز. وسى جارىستا مەكتەپتىڭ تاعى ءبىر كومانداسى – Alash ينجەنەرلىك شەبەرلىكتىڭ جوعارى دەڭگەيى جانە جوبالاۋدىڭ يننوۆاتسيالىق تاسىلدەرى ءۇشىن Engineering Excellence Award اتالىمىندا ماراپاتتالدى, – دەدى «مۇراگەر» مامانداندىرىلعان مەكتەپ-ليتسەي-ينتەرناتىنىڭ ينفورماتيكا جانە روبوتتەحنيكا مۇعالىمى بەردىبەك قازىعۇلوۆ.
سونىمەن قاتار Best pit award finalist اتالىمىندا Mirinda كومانداسى جەڭىسكە جەتتى. Motivate Award اتالىمىندا جۇلدە بۇقار جىراۋ اۋدانى ۇشتوبە تىرەك مەكتەبىنىڭ Ushtobe team كومانداسىنا بۇيىردى. Core value اward finalists اتالىمىندا «دارىن» مامانداندىرىلعان مەكتەپ-ليتسەي-ينتەرناتىنىڭ Daryn كومانداسى وزىق شىقتى.
– بۇل بايقاۋدا ءبىز وڭىرلىك كەزەڭدە Innovation project اتالىمىندا ءبىرىنشى ورىندى يەلەندىك. Core values سەكتسياسىندا جۇلدەگەر اتاندىق. روبوتتارمەن جۇمىس ىستەۋگە ۇزاق ۋاقىت جۇمسالدى. وسى سەكتسيادا ۇزدىك وندىقتىڭ قاتارىنان تابىلعانىمىزعا قۋانىشتىمىز, – دەيدى «دارىن» مامانداندىرىلعان مەكتەپ-ليتسەي-ينتەرناتىنىڭ 8-سىنىپ وقۋشىسى ابىلاي قادىربەك.
ن.نۇرماقوۆ اتىنداعى مامانداندىرىلعان مەكتەپ-ليتسەي-ينتەرناتىنىڭ #Nurmakov كومانداسى دا قامشى سالدىرماي, جازدا وتەتىن شەتەلدىك بايقاۋلاردىڭ بىرىنە جولداما الدى.
– ءبىزدىڭ جوبا جەكە سەكتور مەن اۋىلدىق اۋدانداردا ەلەكتر ەنەرگياسىنىڭ ءۇزىلۋ ماسەلەسىن شەشۋگە باعىتتالعان. مۇنى ارنايى قۇرىلعىلاردى ءۇش فازاعا ورنالاستىرۋ ارقىلى باسقارا الامىز. ول ءۇشىن ماكەت جاسادىق, قۇرىلعىمىزدىڭ قالاي جۇمىس ىستەيتىنىن كورسەتتىك. بالالار جوبانى ءساتتى قورعاپ شىقتى. دەگەنمەن, ءالى دە جەتىلدىرۋ كەرەك. جازدا برازيلياعا نەمەسە اقش-قا باق سىناۋعا بارامىز, – دەيدى روبوتتەحنيكا بويىنشا جاتتىقتىرۋشى, ينفورماتيكا ءپانىنىڭ مۇعالىمى ايدار سەيىلحانوۆ.
قاراعاندى