ەكولوگيا, گەولوگيا جانە تابيعي رەسۋرستار مينيسترلىگى جۇرگىزگەن باقىلاۋ ناتيجەلەرى بويىنشا ەلوردادا 32 سۋ نىسانىنىڭ ساپاسى ناشار, ال 28-ءى ەڭ ناشار ساناتقا جاتقىزىلعان. سۋ نىساندارىنىڭ لاستانۋ ماسەلەسىن سۋ رەسۋرستارىن پايدالانۋ مەن قورعاۋدى رەتتەۋ جونىندەگى ەسىل باسسەيندىك ينسپەكتسياسى جانە «بايتاق» جاسىلدار پارتياسى تالقىلادى.
ماماندار ەڭ اۋەلى وسى پروبلەمانى شەشۋ ماقساتىندا استانا قالاسى بويىنشا جانە قالادان تىس ورنالاسقان بارلىق نىسانداردى ارالادى. نىسانداردىڭ ساپاسىن انىقتاۋ جۇمىستارى جوسپارلانىپ, الداعى ۋاقىتتا اتقارىلاتىن ءىس-ارەكەتتەردىڭ الگوريتمى رەتتەلدى.
قالالىق ءماسليحات دەپۋتاتتىعىنا ۇمىتكەرلەر شىڭعىس لەپسىباەۆ پەن ازامات اسريەۆ بۇگىنگىنىڭ وزەكتى ماسەلەسىنە اينالعان اۋىز سۋ ماسەلەسىن كوتەردى. قازىردىڭ وزىندە قالا ماڭىنداعى تۇرعىندار ونىڭ جوقتىعىن ايتىپ شاعىمداناتىنىن, سونداي-اق جاڭا تۇرعىن ءۇي كەشەندەرىن سۋمەن جابدىقتاۋ جەلىلەرىنە قوسۋ كەزىندە ارا-تۇرا پروبلەمالار تۋىندايتىنىن ايتىپ, بىرلەسىپ ارەكەت جاساۋعا شاقىردى.
ايتا كەتسەك, بۇگىندە قالانىڭ ءبىر تۇرعىنى جىلىنا 20 مىڭ ليتر سۋ قولدانادى ەكەن. ماماندار الداعى جىلدارى استانا قالاسى اۋىز سۋدىڭ تاپشىلىعىنا تاپ بولاتىنىن ايتىپ, دابىل قاعىپ وتىر.
بۇگىندە استانا قالاسىندا 18 پروبلەمالىق نۇكتەلى قۇرىلىس نىسانى بار. بۇل وزەكتى ماسەلەگە نازار اۋدارۋ ماقساتىندا «بايتاق» پارتياسىنىڭ ماجىلىسكە ۇمىتكەر دەپۋتاتتارى سانكتسيالانعان ميتينگ وتكىزدى. تىعىز ورنالاسقان جەرگە قۇرىلىس نىساندارىنىڭ سالۋىنا نارازىلىعىن ەلۋدەن اسا ادام, ونىڭ ىشىندە قوعام قايراتكەرلەرى, ءماسليحات دەپۋتاتىنا ۇمىتكەرلەر, قوعام بەلسەندىلەرى ءبىلدىردى.
سوڭعى 3 جىلدا ەلوردادا 8 ملن شارشى مەتردەن استام باسپانا سالىندى. ال قالا بويىنشا الەۋمەتتىك نىسانداردىڭ جەتىسپەۋشىلىگى ءبىرشاما. ستاتيستيكالىق اقپاراتقا سۇيەنسەك, وتكەن جىلدىڭ ەسەبى بويىنشا 49 مىڭ بوبەك بالاباقشاعا كەزەكتە تۇر, ال 26 مىڭ وقۋشى مەكتەپ ورىندارىنا مۇقتاج. وتكەن جىلى جەرگىلىكتى تۇرعىندار وسىنداي قۇرىلىس نىساندارىنىڭ تاريحي ماڭىزى بار عيماراتتاردا, جاسىل ايماقتاردا سالۋعا قارسىلىعىن بىلدىرەتىن پەتيتسيا ۇيىمداستىرعان بولاتىن. قازىرگى ۋاقىتتا وعان 4 500-دەن اسا ادام قول قويدى.