جالپىۇلتتىق سوتسيال-دەموكراتيالىق پارتياسى اتىنان پارلامەنت ءماجىلىسىنىڭ دەپۋتاتتىعىنا پارتيالىق ءتىزىمى بويىنشا كانديدات انارگۇل ابەنوۆا باتىس قازاقستان وبلىسىنىڭ تەرەكتى, ءبورلى جانە شىڭعىرلاۋ اۋداندارى بويىنشا «ۇگىت-ناسيحات پويىزىن» ىسكە قوستى.
وڭىرلەرگە ساپار بارىسىندا انارگۇل ابەنوۆا جەرگىلىكتى سايلاۋشىلارمەن كەزدەسىپ, پارتيانىڭ سايلاۋالدى باعدارلاماسىنىڭ باسىم باعىتتارى جونىندە بايانداپ, جينالعان قاۋىمنىڭ سۇراقتارىنا جاۋاپ بەردى. «ۇگىت-ناسيحات پويىزى» اياسىندا جسدپ بەلسەندىلەرى ەلىمىزدىڭ بىرقاتار ءوڭىرىن ارالاپ, سايلاۋشىلارمەن كەزدەسۋلەر وتكىزدى.
كانديدات پارتيانىڭ سايلاۋالدى باعدارلاماسىندا ءبىلىم بەرۋ سالاسىنىڭ دامۋىنا ەرەكشە كوڭىل بولىنگەنىن اتاپ ءوتتى. مەديتسينا جانە ءبىلىم بەرۋ سالالارىنا ءىجو-دەن جىلىنا ەڭ كەمى 5-7%-دى ءبولۋ ۇسىنىلعان. جالپىۇلتتىق سوتسيال-دەموكراتيالىق پارتيا وكىلدەرى مۇنداي شارا دارىگەرلەر مەن مۇعالىمدەر ەڭبەكاقىسىنىڭ بانك قىزمەتكەرلەرى دەڭگەيىنە دەيىن كوتەرۋگە مۇمكىندىك بەرەتىنىن ايتتى.
كانديدات مەملەكەت الدىندا تۇرعان باستى ماسەلە جەمقورلىققا قارسى كۇرەس ەكەنىن اتاپ ءوتتى. ونىڭ پىكىرىنشە, ول ءۇشىن ەڭ الدىمەن ساياسي رەفورمالاردى جۇزەگە اسىرۋ كەرەك جانە ءماجىلىستىڭ ءرولىن كۇشەيتۋ كەرەك.
«اشىقتىق پەن ادىلدىككە نەگىزدەلگەن ازاماتتىق قوعام قۇرۋ – قازىرگى كۇننىڭ باستى تالابى. بۇعان باستايتىن بىردەن-ءبىر جول – جەمقورلىقتى ءتۇپ-تامىرىمەن جويۋ. ەلىمىزدە سىبايلاس جەمقورلىققا قارسى كۇرەس قانشالىقتى ناتيجەلى اتقارىلىپ جاتقانىن ناقتى ايتۋ قيىن. مەملەكەت قارجىسىنا قول سۇققان شەنەۋنىكتەردىڭ تەمىر تورعا توعىتىلۋى ماسەلەنىڭ شەشىلىپ جاتقانىن اڭعارتپاسا كەرەك. پروبلەمانىڭ سەبەپ-سالدارىمەن كۇرەسۋ ماڭىزدى. رەفورمالاردىڭ ءبىرى بيۋدجەت پروتسەدۋرالارىن جەتىلدىرۋمەن ايقىندالادى. ءار ەلدى مەكەندە وزىنە تيەسىلى اشىق بيۋدجەت جاساقتالىپ, ناقتى ۋاقىت رەجىمىندە ونلاين تۇردە مەملەكەت قارجىسىنىڭ قالاي جانە قايدا جۇمسالىپ جاتقاندىعى اشىق كورسەتىلىپ وتىرۋى كەرەك. سونداي-اق ورتالىق جانە جەرگىلىكتى اتقارۋ ورگاندارىندا بارلىق دەڭگەيدەگى دەپۋتاتتار مەن شەنەۋنىكتەردىڭ كىرىس-شىعىسى تۋرالى مىندەتتى جاريا دەكلاراتسيانى شۇعىل تۇردە ەنگىزۋ قاجەت», دەدى كانديدات.