«Respublica» پارتياسىنىڭ كوكشەتاۋداعى جيىندارىنا مىڭعا جۋىق ادام قاتىستى. كوكشەتاۋ قالاسىندا اۋىل شارۋاشىلىعى تاۋار وندىرۋشىلەرى, ەڭبەك ۇجىمدارى جانە ىسكەر ايەلدەر قاۋىمداستىعى وكىلدەرىمەن كەزدەسۋلەر ءوتتى.
«قازىر ۋنيۆەرسيتەتتەر مەن بيزنەستىڭ ءارتۇرلى كەڭىستىكتە ەكەنىن كورىپ وتىرمىز. بيزنەس وكىلدەرى جوعارى وقۋ ورىندارىنىڭ قامقورشىلىق كەڭەستەرىندە بولىپ, بولاشاق مامانداردى دايارلاۋ باعدارلامالارىن رەتتەۋى قاجەت. بۇل شارا ورتا مەرزىمدى پەرسپەكتيۆادا ءبىلىم ساپاسى مەن ەلدىڭ كادرلىق الەۋەتىن ارتتىرۋعا مۇمكىندىك بەرەدى», دەدى پارتيا توراعاسى, پارلامەنت ءماجىلىسىنىڭ دەپۋتاتتىعىنا كانديدات ايداربەك قوجانازاروۆ.
ول «تىنىس» اق ۇجىمىمەن كەزدەسۋ بارىسىندا جوعارى بىلىكتى مامانداردى دايارلاۋ ءۇشىن بيزنەس پەن جوعارى وقۋ ورىندارىنىڭ بەلسەندى ىنتىماقتاستىعى قاجەتتىگىن اتاپ ءوتتى.
ال پارتيانىڭ تەڭ توراعاسى, پارلامەنت ءماجىلىسىنىڭ دەپۋتاتتىعىنا كانديدات دينارا شۇكىجانوۆا وبلىستىق ىسكەر ايەلدەر قاۋىمداستىعىنىڭ وكىلدەرىمەن كەزدەسۋىندە قوعامدا ءالى كۇنگە دەيىن ايەلدەرمەن بايلانىسى بار ستەرەوتيپتەر تاقىرىبىن كوتەردى.
«قوستاناي قالاسىندا «اگروماشحولدينگ KZ» جانە «سارىارقااۆتوپروم» سياقتى كومباين مەن ماشينا شىعاراتىن زاۋىتتار بار ەكەنىن ءبارىڭىز بىلەسىزدەر. مەن وسى قۇرىلىمدارعا 2011 جىلى قاتارداعى قىزمەتكەر بولىپ كەلدىم, 12 جىلدان كەيىن وسى كاسىپورىنداردى باسقارۋعا كىرىستىم. ءبىر كۇنى كليەنتتەردىڭ ءبىرى مەنىمەن كەزدەسۋگە كەلدى. دالىزدە ءجۇر ەكەن, قارسى الايىن دەپ الدىنان شىقتىم, ول كۇرتەشەسىن شەشىپ, مەنىڭ قولىما ۇستاتتى. سودان سوڭ: «راحمەت, ءسىزدىڭ پرەزيدەنتىڭىز قايدا؟» دەدى. مەن پرەزيدەنت ەكەنىمدى ايتتىم, بىراق ول: «جوق, جوق! كومپانيانىڭ پرەزيدەنتى دينارا قايدا؟» دەدى. مەن كومپانيانىڭ باسشىسى ەكەنىمدى ايتتىم تاعى دا. ول تاڭعالدى, كەڭ شالبار كيگەن, قولىندا بالعاسى بار, بويى ەكى مەتر ايەلدى ەلەستەتكەنىن دە جاسىرمادى. مەن مۇنداي ستەرەوتيپتەردى ءجيى كەزدەستىرەمىن», دەدى دينارا شۇكىجانوۆا.
جالپى, «Respublica» پارتياسىنىڭ تەڭ توراعاسى قوعامداعى كوشباسشى ايەلدەرگە دەگەن كوزقاراستى وزگەرتۋ قاجەت دەپ سانايدى. «پارلامەنتتەگى ايەلدەر ۇلەسىن ارتتىرۋدى تالاپ ەتۋىنىڭ ءبىر سەبەبى دە وسىندا», دەيدى ول.