قازىر قوعامدا مەتسەنات قىز-كەلىنشەكتەردىڭ قاتارى كوبەيىپ كەلەدى. بۇل ەندى-ەندى دامىپ كەلە جاتقان قۇبىلىس ەكەنى ءمالىم.
بەلگىلى ءبىر سالاعا نەمەسە جەكەلەگەن ازاماتتارعا قارجىلاي قايىرىمدىلىق جاساۋدى مەتسەناتتىق دەپ اتاعانىمىزبەن, ونىڭ دا ءارتۇرلى وزگەشەلىكتەرى جانە حالىقتىق ەرەكشەلىكتەرى بارىن بايقاۋعا بولادى. ماسەلەن, مەتسەناتتىق ۇعىمى ريم جەرىنەن شىققانىمەن, بۇل قازاق دۇنيەتانىمىنا دا جات ەمەس. ونىڭ ءبىر كورىنىسى – حالىقتىق فولكلورىمىزدا قايىرىمدىلىقتىڭ ۇلگىسى رەتىندە اتىمتاي جومارت ەسىمىن كۇنى بۇگىنگە دەيىن قولى اشىق ادامعا تەلىپ, سولاي اسپەتتەپ, ادىپتەيمىز. ال ساقيلىق, مىرزالىق, قايىرىمدىلىق سەكىلدى سوزدەردىڭ قاي-قايسىسى بولسىن حالقىمىزدىڭ جومارتتىققا ەجەلدەن جانى جاقىن ەكەنىن بىلدىرسە كەرەك. ايتكەنمەن, ءار ءسوزدىڭ وزىندىك استارى مەن ايىرماسى بارىن بايقاۋ قيىن ەمەس سەكىلدى. ماسەلەن, قايىرىمدىلىقتى جوق-جىتىككە, مۇقتاج ادامعا كومەكتەسۋ دەپ بىلەمىز. ال مەتسەناتتىق كوبىنەسە مادەني قۇندىلىقتارعا جاسالاتىن دەمەۋشىلىك ەكەنى تۇسىنىكتى.
قازىرگى ءبىزدىڭ قوعامداعى ايەلدەردىڭ مەتسەناتتىقتان گورى الەۋمەتتىك قايىرىمدىققا بەيىم ەكەنى بايقالادى. قازىر ەلىمىزدە ونداي جومارت جۇرەكتى قىز-كەلىنشەكتەردىڭ ەسىمدەرى كوپتەپ اتالىپ ءجۇر. ونىڭ ءبىرى دە بىرەگەيى – بەلگىلى كاسىپكەر, مەتسەنات سايرا ماتايباەۆا حانىم. بولمىسى نازىك بولعانىمەن, رۋحى اسقاق سايرا ايتەنقىزى – وتىز جىلدان بەرى ەلىمىزدىڭ جيھاز ءوندىرىسىن دامىتۋعا كۇش سالعان كاسىپكەر. سايرا حانىم رەسپۋبليكالىق ىسكەر ايەلدەر قاۋىمداستىعىنىڭ اقمولا وبلىسى بويىنشا جەتەكشىسى. قوسشى قالاسىندا جەكە قاراجاتىنا 700 بالاعا ارنالعان «دارا» بيزنەس مەكتەبىنىڭ, بالالارعا ارنالعان تەاتر جانە سپورت كەشەنىنىڭ ىرگەتاسىن قالادى. وسىلايشا, استانا ىرگەسىندەگى قوسشى قالاسىنىڭ ەكونوميكالىق-الەۋمەتتىك دامۋىنا زور ۇلەسىن قوسىپ كەلەدى.
«وتىز جىلدان كەيىن مەن ءبىلىم سالاسىنا بەت بۇردىم. بۇعان سەبەپكەر بولعان – مەنىڭ كاسىپورنىم ورنالاسقان قوسشىدا مەكتەپتەردىڭ جەتكىلىكسىزدىگى. بالالار ءۇش اۋىسىمدا, ءبىر سىنىپتا قىرىق بالادان وقۋعا ءماجبۇر بولدى. ياعني بۇل ەشقانداي ساپالى ءبىلىم بەرۋگە جاتپايدى. وسى ساتتە مەن ءوز ەلىمنىڭ پاتريوتى, سول كەزدەگى اۋداندىق ءماسليحات دەپۋتاتى رەتىندە مەكتەپ سالۋدى شەشتىم, – دەيدى ول.
بۇگىندە قوسشى جۇرتى ونى ءتۇرلى سالادا قايىرىمدىلىق جاساپ, حالىق كوڭىلىنەن شىعىپ جۇرگەن قازاقتىڭ قايسار قىزى دەپ باعالايدى. «وڭ قولىڭنىڭ بەرگەنىن سول قولىڭ بىلمەسىن» دەيدى عوي. سوندىقتان پالەن دەپ نە دەيمىز. قاشاندا كومەككە ءزارۋ سالاعا قادەري-حالىمىزشە قولۇشىن سوزۋعا دايىنبىز. اسىرەسە وسكەلەڭ جاس ۇرپاقتىڭ بولاشاعىنا سالعان قارجى ەل بولاشاعىنا سالعان ينۆەستيتسيا دەپ بىلەمىن», دەيدى مەتسەنات حانىم.
«سايرا ايتەنقىزى 20 جىلدان بەرى قوسشىدا تۇرادى. وسى جەردە العاش جيھاز ءوندىرىسىن اشتى. استانا ىرگەسىندەگى قوسشى قالاسىندا حالىق تىعىز قونىستانعاندىقتان, مەكتەپ تاپشىلىعى ەڭ ءبىر كۇردەلى ماسەلە بولىپ كەلدى. وسىعان وراي, ءتىپتى سولتۇستىك وڭىردە العاش رەت دەپ ايتۋعا بولادى, ءوز قاراجاتىنا زاماناۋي ۇلگىدە تاماشا مەكتەپ سالدى. «دارا» بيزنەس اكادەمياسى – قازىر ەلىمىزدەگى ۇزدىك ۇلگىلى مەكتەپتەردىڭ ءبىرى. «دارا» مەكتەبىنىڭ دارالىعى ۇلتتىق قۇندىلىقتارعا ەرەكشە ءمان بەرەدى. قازىر مۇندا بالالاردى ات سپورتىنا باۋليدى. مىسالى, سارسەنبى كۇنى وندا تۇگەل ۇلتتىق كيىم كيەدى. بەيسەنبىدە ەلىمىزگە بەلگىلى كاسىپكەر تۇلعالاردىڭ لەكتسياسى وقىتىلادى. سونىمەن قاتار بالالارعا ارنالعان تەاترلىق قويىلىمدار قويىلىپ تۇرادى. بيىل 200 ورىندىق كونتسەرتتىك زال سالدى. بۇعان قوسا سايرا ايتكەنقىزى – قالامىزدا ءالى دە جەتىسپەي جاتقان مەملەكەتتىك تەتىكتەردى دە قولداپ وتىرعان قازاقتىڭ مەتسەنات قىزى. ءبىر قالانىڭ ەل اناسى بولىپ وتىر دەسەك, ارتىق ايتقاندىق بولماس», دەيدى قوسشى قالاسى ىشكى ساياسات ءبولىمىنىڭ باسشىسى ايناگۇل كوڭبايقىزى.
سايرا ايتكەنقىزى 2016 جىلى «جومارت جۇرەك», 2018 جىلى «جىل تۇلعاسى» اتالىمدارىنىڭ جەڭىمپازى بولسا, 2019 جىلى تۇڭعىش پرەزيدەنت قورى ۇيىمداستىرعان «مەيىرىمدىلىك كەرۋەنى» رەسپۋبليكالىق قايىرىمدىلىق بايقاۋىنىڭ لاۋرەاتى اتانعان.
«قالامىزداعى تاعى ءبىر مەتسەنات تۇلعا – شولپان وتەگەنوۆا حانىم. شولپان عاجايىپقىزى كوپ جىل مەملەكەتتىك جانە ءبىلىم سالاسىندا قىزمەت ەتتى. اقمولادا العاشقىلاردىڭ ءبىرى بولىپ «بالاپان» باعدارلاماسىمەن جەكە بالاباقشا اشىپ, ۇرپاق تاربيەسىنە زور ۇلەس قوسىپ كەلەدى. قازىر ول كىسىنىڭ قوسشىداعى بالاباقشالارىندا 200-دەي بالا وقيدى. ونىڭ ىشىندە كوپبالالى جانە جاعدايى تومەن وتباسىنان شىققان بالالاردى تەگىن وقىتىپ وتىر. سونىمەن قاتار ءوز قاراجاتىمەن جىل سايىن قوسشى قالاسىندا جاس اقىندار ايتىسىن وتكىزىپ, جاس ونەرپازداردى قولداۋدى داستۇرگە اينالدىردى. شولپان عاجايىپقىزى – جالپى ونەرگە, مادەنيەتكە, ادەبيەتكە, عىلىمعا ۇلكەن قامقورلىق جاسايتىن جومارت جان. سونىمەن قاتار بايان سۇنناتقىزى – قوسشى قالاسىنىڭ ىشكى ءتۋريزمىن دامىتۋعا زور ۇلەس قوسىپ وتىرعان مەتسەنات حانىمداردىڭ ءبىرى. ولاردىڭ قاي-قايسىسى دا مەتسەناتتىقپەن قاتار, قالامىزداعى كومەككە مۇقتاج جاندارعا ۇنەمى الەۋمەتتىك قايىرىمدىلىق جاساپ كەلەدى», دەيدى ا.كوڭبايقىزى.
«تەڭىز ءدامى – تامشىسىنان» دەگەندەي, بۇل ەلىمىزدەگى قايسار قىزداردىڭ ءبىر پاراسى عانا. مۇنداي اسىل انالار ەلىمىزدىڭ قاي پۇشپاعىنان دا تابىلاتىنىنا ەش تالاسىمىز جوق.