پرەزيدەنت قاسىم-جومارت توقاەۆتىڭ تاپسىرماسىمەن 2021 جىلدان باستاپ قازاقستاندا «اڭساعان ءسابي» الەۋمەتتىك باعدارلاماسى ىسكە قوسىلىپ, كۆوتا سانى جىلىنا 1 مىڭنان 7 مىڭعا دەيىن ءوستى. استانا تۇرعىندارى ءۇشىن 547 كۆوتا ءبولىندى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
وسىلايشا قازىر زاماناۋي مەديتسينا مەن مەملەكەتتىك قولداۋدىڭ ناتيجەسىندە ءسابيلى بولۋدىڭ مۇمكىندىگى كەڭەيدى. بەدەۋلىكتىڭ ءتۇرلى فورمالارى بار ناۋقاستار باعدارلاماعا ءوتىنىش بەرە الادى.
بىلتىر اتالعان باعدارلاما اياسىندا 15 ءسابي دۇنيەگە كەلدى. امان-ەسەن ءسابيىن قولعا العان باقىتتى انالاردىڭ ءبىرى – جۇلدىز ەسىمدى قالا تۇرعىنى.
«شاڭىراق كوتەرگەنىمىزگە 8 جىل بولدى. تۇرمىس قۇرعالى جولداسىم ەكەۋمىز بالا ءسۇيۋدى ارماندادىق. بۇل باعدارلاما تۋرالى ەمحاناداعى ءوز دارىگەرىمنەن ءبىلدىم. مۇنداي ماڭىزدى شەشىمدى قابىلداۋىما دارىگەردىڭ جان-جاقتى ءتۇسىندىرۋى مەن جولداسىمنىڭ قولداۋى سەبەپ بولدى. نازىك جاندىلار بۇل شەشىمدى جالعىز قابىلداي المايدى», دەيدى پاتسيەنت.
ەكۇ جاساتۋ ءۇشىن ول 1-3 اي ارالىعىندا تۇراقتى مەديتسينالىق تەكسەرىستەن وتكەن. ول كوپتەن كۇتكەن تۇڭعىشىن قاڭتاردىڭ 10-ءى كۇنى امان-ەسەن باۋىرىنا الدى.
بۇگىندە استانادا بەدەۋلىك بويىنشا 1 300-دەن استام ايەل تىركەۋدە تۇر. ەلوردادا الەۋمەتتىك باعدارلاماعا كۆوتا نەگىزىندە قاتىسا الاتىنداردىڭ دا سانى جىل سايىن ارتىپ كەلەدى. مىسالى, 2019 جىلى 74 كۆوتا بولىنگەن. ال 2021 جىلى 487 جۇپ ءمامس اياسىندا ەكۇ پروتسەدۋراسىنان ءوتۋ مۇمكىندىگىن السا, 2022 جىلى 518 ەرلى-زايىپتى باعدارلاماعا قاتىسقان. بيىل باس شاھارعا 547 كۆوتا ءبولىندى.