بۇگىن اۋا رايىنىڭ ناشارلاۋىنا بايلانىستى شىعىس قازاقستان وبلىسى مەن اباي وبلىسىنداعى مەكتەپتەردە ساباق ونلاين فورماتقا اۋىستىرىلدى, دەپ حابارلايدى Egemen.kz.
وسكەمەن قالاسى, گلۋبوكوۆسكي اۋدانىندا 0-9 سىنىپ ارالىعىنداعى ءبىرىنشى اۋىسىم وقۋشىلارى ونلاين فورماتقا كوشتى. سونداي-اق كۇرشىم اۋدانى كۇرشىم اۋىلىندا 0 سىنىپتان 11 سىنىپقا دەيىن ءبىرىنشى جانە ەكىنشى اۋىسىمداعى وقۋشىلار, ريددەر قالاسىندا 0-6 سىنىپ ارالىعىندا ءبىرىنشى اۋىسىم وقۋشىلارى قاشىقتان وقۋعا اۋىستىرىلدى.
اباي وبلىسىندا سەمەي, كۋرچاتوۆ, بەسقاراعاي, بورودۋليحا, اياگوز, جارما اۋداندارىنداعى ءبىرىنشى جانە ەكىنشى اۋىسىمداعى 1-11 سىنىپ وقۋشىلارى قاشىقتىقتان وقىتۋ فورماتىنا كوشىرىلدى. سونداي-اق سەمەي قالاسىنداعى كوللەدجدەردىڭ ءبىرىنشى جانە ەكىنشى كۋرس ستۋدەنتتەرىنىڭ دە ساباقتارى ونلاينعا اۋىستى.
قوستاناي وبلىسىندا قاتتى جەلدىڭ سالدارىنان بىرقاتار مەكتەپتە ساباق ونلاين فورماتقا كوشىرىلدى. دەنيسوۆسكي, قارابالىق جانە مەڭدىقارا اۋداندارىندا باستاۋىش سىنىپ وقۋشىلارى قاشىقتان وقيدى.