ورتالىق سايلاۋ كوميسسياسىنىڭ مۇشەلەرى كونستانتين پەتروۆ پەن ءسابيلا مۇستافينا پارلامەنت ءماجىلىسى جانە ءماسليحاتتارى دەپۋتاتتارىنىڭ كەزەكتەن تىس سايلاۋىن وتكىزۋ بويىنشا سەمينار وتكىزۋ ءۇشىن شىعىس قازاقستان مەن اباي وبلىستارىنا باردى.
سەمينار-كەڭەستەرگە جەرگىلىكتى اتقارۋشى ورگانداردىڭ, وبلىستىق پروكۋراتۋرالارىنىڭ وكىلدەرى, اۋماقتىق سايلاۋ كوميسسيالارىنىڭ مۇشەلەرى, كانديداتتاردىڭ سايلاۋالدى شتابتارىنىڭ وكىلدەرى, ەقىۇ دياقب سايلاۋدى ۇزاق مەرزىمدى بايقاۋشىلارى قاتىستى.
وسك توراعاسىنىڭ ورىنباسارى كونستانتين پەتروۆ ۋاكىلەتتى مەملەكەتتىك ورگاندارمەن جانە وبلىستىق اۋماقتىق سايلاۋ كوميسسيالارىمەن وتكەن كەڭەستەردە وڭىردە جۇرگىزىلىپ جاتقان سايلاۋشىلار تىزىمدەرى, ۇيىمداستىرۋ ماسەلەلەرى, سايلاۋ ۋچاسكەلەرىن ماتەريالدىق-تەحنيكالىق قامتاماسىز ەتۋ, مۇگەدەكتىگى بار ازاماتتار ءۇشىن قاجەتتى جاعدايلار جاساۋ, سونداي-اق سايلاۋ بيۋللەتەندەرىن ۋچاسكەلەرگە ۋاقتىلى جەتكىزۋ جانە باسقا دا ماسەلەلەر بويىنشا باياندامالاردى تىڭدادى. اتاپ ايتقاندا, شىعىس قازاقستان وبلىسى اكىمى اپپاراتى باسشىسىنىڭ ورىنباسارى كينيگۋل بيچۋينوۆ 26 اقپانداعى جاعداي بويىنشا سايلاۋشىلار تىزىمىنە ءوڭىردىڭ 499 085 تۇرعىنى ەنگىزىلگەنىن حابارلادى. وبلىس حالقىن ساپالى اقپاراتتاندىرۋ ماقساتىندا بۇقارالىق اقپارات قۇرالدارى مەن الەۋمەتتىك جەلىلەر ارقىلى اقپاراتتىق جۇمىس جۇرگىزىلۋدە. سىرتقى جارنامانى ورنالاستىرۋ ءۇشىن 167 ورىن انىقتالىپ, LED-ەكرانداردا ساياسي پارتيالاردىڭ اقپاراتتىق بەينەروليكتەرى مەن ۇگىت-ناسيحات روليكتەرى كورسەتىلەدى.
– حالىقتى سايلاۋ ۋچاسكەلەرى تۋرالى اقپاراتتاندىرۋ ءۇشىن وبلىستىڭ قالالارى مەن اۋداندارىندا اكىمدىكتەر جانىندا 12 Call-ورتالىق جۇمىس ىستەيدى. سونداي-اق ۋچاسكەلەردە تىركەۋدىڭ دۇرىستىعىن «ەلەكتروندىق قىزمەتتەر ورتالىعى»پورتالىنىڭ ء«وز سايلاۋ ۋچاسكەڭدى تاپ» سەرۆيسى جانە «DigitalEast» ءموبيلدى قوسىمشاسى ارقىلى تەكسەرۋگە بولادى.
بارلىق 533 سايلاۋ ۋچاسكەلەرىنىڭ شەكارالارى ناقتىلاندى. بارلىق سايلاۋ وكرۋگتەرى مەن ۋچاسكەلەرى جۇمىسقا دايىن. ولاردىڭ جۇمىس ىستەۋى قولدانىستاعى زاڭنامانى, سانيتارلىق نورمالاردى جانە قوعامدىق قاۋىپسىزدىكتى ەسكەرە وتىرىپ ۇيىمداستىرىلاتىن بولادى. ستەندتەرمەن, قالقاندارمەن جانە تۋمبالارمەن جابدىقتالعان ۇگىت ماتەريالدارىن ورنالاستىرۋ ءۇشىن 470 ورىن بەلگىلەنگەن. ونىڭ ىشىندە وبلىس ورتالىعىندا – 33, قالالار مەن اۋدانداردا 437 ورىن ناقتىلاندى. ال كانديداتتاردىڭ سايلاۋشىلارمەن كەزدەسۋى ءۇشىن 200 ورىن بەلگىلەندى, – دەپ مالىمدەدى كينيگۋل بيچۋينوۆ.
مۇگەدەكتىگى بار ادامدار ءۇشىن سايلاۋ ۋچاسكەلەرىنىڭ فيزيكالىق قولجەتىمدىلىگىن قامتاماسىز ەتۋ ماقساتىندا 1 784 سايلاۋشى ءۇشىن 264 ۋچاسكەدە داۋىس بەرۋدى ۇيىمداستىرۋ ماسەلەلەرى شەشىلدى. ولاردىڭ قاتارىندا 1 784 سايلاۋشىنىڭ 650-ءى مۇگەدەكتەر ارباسىن پايدالانسا, 700 ادامنىڭ كورۋ قابىلەتى جوق جانە 434 ادامنىڭ ەستۋ مەن سويلەۋ قابىلەتى ناشار ەكەنى انىقتالدى. بۇگىنگى تاڭدا 495 ۋچاسكە ءبىرىنشى قاباتتاردا ورنالاسقان, 472 – پاندۋستارمەن, 482 تاكتيلدى كورسەتكىشتەرمەن جابدىقتالعان. ال داۋىس بەرۋ كۇنى ەرەكشە قاجەتتىلىكتەرى بار ازاماتتار تۇراتىن 13 ەلدى مەكەندە ينۆاتاكسي قىزمەتى ۇيىمداستىرىلىپ, 113 ۋچاسكەدە سۋردواۋدارماشىلار جۇمىس ىستەيدى.
سونداي-اق سەمينار-كەڭەستە شىعىس قازاقستان وبلىسى پروكۋراتۋراسىنىڭ قوعامدىق مۇددەلەردى قورعاۋ باسقارماسىنىڭ باستىعى جاندوس قوڭىروۆ ءسوز سويلەپ, سايلاۋ ناۋقانىن وتكىزۋ كەزەڭىندە سايلاۋ ۇدەرىسىنە قاتىسۋشىلاردىڭ زاڭنامانى ساقتاۋىن قاداعالاۋدى جۇزەگە اسىرۋ تۋرالى حاباردار ەتتى.
اباي وبلىسى اكىمى اپپاراتىنىڭ باسشىسى جاسۇلان سارسەنباەۆ وبلىس بويىنشا بارلىعى 416 030 ازامات سايلاۋشىلار تىزىمىنە ەنگىزىلگەنىن حابارلادى. وبلىستا سونداي-اق, وبلىس اكىمدىگىنىڭ, قالالار مەن اۋداندار اكىمدىكتەرىنىڭ ينتەرنەت-رەسۋرستارىندا ء«وز سايلاۋ ۋچاسكەڭدى انىقتا» ىزدەۋ سەرۆيستەرى جۇمىس ىستەيدى.
– سەرۆيستەر جسن مەن مەكەن-جايدى كورسەتە وتىرىپ, سايلاۋ ۋچاسكەسى تۋرالى اقپارات الۋعا مۇمكىندىك بەرەدى. سونداي-اق قالالار مەن اۋدانداردا Call-ورتالىقتار جۇمىس ىستەپ تۇر. وبلىس اۋماعىندا انىقتامالىق اقپاراتتى الۋدى جەڭىلدەتۋ ءۇشىن 24/7 رەجىمىندە 109 تەگىن ءنومىرى بويىنشا بىرىڭعاي بايلانىس ورتالىعى جۇمىس ىستەيدى. بۇگىنگى تاڭدا 11 اۋماقتىق, 141 وكرۋگتىك جانە 478 ۋچاسكەلىك سايلاۋ كوميسسيالارى قۇرىلدى. بارلىق 478 سايلاۋ ۋچاسكەسى جۇمىسقا دايىندالدى, ماتەريالدىق-تەحنيكالىق قامتاماسىز ەتىلدى, – دەدى جاسۇلان سارسەنباەۆ.
ج.سارسەنباەۆتىڭ حابارلاۋىنشا, وبلىستا مۇگەدەكتىگى بار ادامداردىڭ سانى 2 687 ادامدى قۇرايدى. بارلىق سايلاۋ ۋچاسكەلەرى مۇگەدەكتىگى بار ادامدار ءۇشىن قاجەتتى جاعدايلارمەن, سونىڭ ىشىندە پاندۋستارمەن جانە تاكتيلدى كورسەتكىشتەرمەن جابدىقتالعان. سونداي-اق ازاماتتاردى تىركەۋ ورنى بويىنشا سايلاۋ ۋچاسكەلەرىندە داۋىس بەرۋ كۇنى قوسىمشا 15 جىلجىمالى پاندۋس ورناتىلادى. 395 سايلاۋ ۋچاسكەسىندە مۇگەدەكتىگى بار ادامدار ءۇشىن بۇرىش ۇيىمداستىرۋ جوسپارلانىپ وتىر.
كەڭەس بارىسىندا ورتالىق سايلاۋ كوميسسياسىنىڭ مۇشەلەرى كونستانتين پەتروۆ پەن ءسابيلا مۇستافينا اۋماقتىق سايلاۋ كوميسسيالارىنىڭ مۇشەلەرىنە سايلاۋ زاڭناماسىنىڭ بارلىق جاڭالىقتارىن, اعىمداعى سايلاۋ ناۋقانىنىڭ ەرەكشەلىكتەرىن ءتۇسىندىردى, سونداي-اق سايلاۋ كوميسسيالارى پارلامەنت ءماجىلىسى جانە ءماسليحاتتار دەپۋتاتتارىنىڭ كەزەكتەن تىس سايلاۋىن ازىرلەۋ مەن وتكىزۋ جونىندەگى بارلىق نەگىزگى ءىس-شارالاردى باقىلاۋدا ۇستاپ, وسى ەل ءۇشىن ماڭىزدى جانە جاۋاپتى سايلاۋدى زاڭعا قاتاڭ سايكەس وتكىزۋگە دايىن بولۋعا ءتيىس ەكەنىن اتاپ ءوتتى.
سونىمەن قاتار سەمينار-كەڭەس اياسىندا اۋماقتىق سايلاۋ كوميسسيالارى ءۇشىن ىسكەرلىك ويىن تۇرىندە وقىتۋ ترەنينگى ۇيىمداستىرىلدى. ترەنينگ بارىسىندا سايلاۋ كوميسسيالارىنىڭ مۇشەلەرى ونىڭ بارلىق كومپونەنتتەرىن قامتي وتىرىپ, ۋچاسكەلەردە داۋىس بەرۋ ۇدەرىسىن كورسەتتى. ولار سايلاۋ كۇنى ۋچاسكەلەردى اشۋدان, داۋىس بەرۋشىلەردى تىركەۋدەن, بيۋللەتەندەر بەرۋدەن جانە بارلىق جۇمىس اياقتالعانعا دەيىن ۋچاسكەلىك سايلاۋ كوميسسيالارىنىڭ قالاي جۇمىس ىستەيتىنىن كورسەتتى.