الماتىدا دەسانتشىلار جوعارى سىنىپ وقۋشىلارمەن كەزدەسۋ وتكىزدى. پاتريوتتىق ءىس-شاراعا قالانىڭ بارلىق اۋداندارىنان ءۇش جۇزدەن استام جوعارى سىنىپ وقۋشىلارى, العاشقى اسكەري دايىندىق ءپانىنىڭ مۇعالىمدەرى مەن جەرگىلىكتى اسكەري باسقارۋ ورگاندارىنىڭ وكىلدەرى قاتىستى.
وقۋشىلاردىڭ الماتى قالاسىندا ورنالاسقان دەسانتتىق-شابۋىلداۋ اسكەرلەرى قۇراماسىمەن تانىسۋى كازارمادان باستالدى. جاسوسپىرىمدەرگە مەرزىمدى قىزمەتتەگى ساربازداردىڭ تۇرمىسى كورسەتىلدى. ولار مەكتەپ وقۋشىلارىنا توسەك جيناۋ, اياق كيىم تازالاۋ جانە كيىمدى ۇقىپتى بۇكتەۋ سياقتى اسكەردەگى لايفحاكتاردى كورسەتتى.
– وقۋشىلار اسكەردەگى قىزمەت تۋرالى كوپ بىلە بەرمەيدى. ءبىز ولارعا ساربازداردىڭ قالاي ءومىر ءسۇرىپ جاتقانىن, قىزمەتىن كورۋگە, سونداي-اق مۇندا قانداي اسكەري-ەسەپتىك ماماندىقتاردى ۇيرەنۋگە بولاتىنى تۋرالى بىلۋگە مۇمكىندىك بەرەمىز. دەسانتتىق-شابۋىلداۋ اسكەرلەرىندەگى قىزمەت جاس جىگىتتىڭ الەۋەتىن اشادى. ول وزىنە دەگەن سەنىمدىلىكتى ارتتىرۋعا, ناعىز ادال دوستار تابۋعا, جالپى ايتقاندا, وتاننىڭ ناعىز قورعاۋشىسى بولۋعا مۇمكىندىك بەرەدى, – دەيدى اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى, پودپولكوۆنيك باقىتجان قىرعىزاليەۆ.