بيىل قىس ايلارىندا قاردىڭ كوپ تۇسۋىنە جانە اۋا تەمپەراتۋراسىنىڭ كۇرت جوعارىلاۋىنا بايلانىستى الماتى وبلىسىنىڭ تالعار جانە جامبىل اۋداندارىندا سۋ تاسقىنىنا قارسى ءىس-شارالار جۇرگىزىلىپ جاتىر. اقپاننىڭ اياعىندا اتالعان اۋداندارداعى بىرنەشە ەلدى مەكەندى ەرىگەن قار سۋى باسىپ, تۇرعىنداردىڭ بەرەكەسىن الدى.
وسى كۇندەرى تالعار اۋدانىنىڭ قاينار اۋىلدىق وكرۋگىنە قاراستى جاڭالىق, جالعامىس, داۋلەت اۋىلدارى مەن الماتىمەن ىرگەلەس جاتقان بەساعاش اۋىلىنىڭ كوشەلەرىنە قار سۋى جايىلىپ, اۋلالاردى سۋ باسقان جاعدايلار تىركەلگەن. كوشەگە جيىلعان سۋدان جاياۋ جۇرگىنشىلەردىڭ ءجۇرىپ-تۇرۋى قيىنعا سوعىپ, كولىكتەرىن ايدالادا قالدىرۋعا ءماجبۇر بولعان تۇرعىندار بۇل جايتتىڭ العاشقى رەت ەمەس, جىل سايىن قايتالاناتىنىن ايتىپ, دابىل قاعۋدا.
– بالالارىمىزعا جانىمىز اشيدى. اياقتارى مالمانداي سۋ بولىپ كەلەدى. ولار تۇگىلى ءوزىمىز دە ءارلى-بەرلى وتە الماي قيىندىق كورۋدەمىز. كوكتەم كەلسە كول بولاتىن اۋىلىمىزدىڭ بۇل قيىندىعىنا شىداماعان كەي تۇرعىندار ەسىكتەرىن جاۋىپ, پاتەر جاعالاپ كەتەدى, – دەيدى جاڭالىق اۋىلىنىڭ تۇرعىنى ءاسيا مامانوۆا.
ءدال وسىلاي باتپاققا باتىپ جۇرگەن جالعامىس, نۇرا اۋىلدىق وكرۋگىنە قاراستى وستەمىر اۋىلىنىڭ تۇرعىندارىندا دا مازا جوق. اۋىل كوشەلەرىندەگى قار سۋىنان پايدا بولعان كولشىكتەردەن وتە الماي, بالا دا, ۇلكەندەر دە قينالىپ ءجۇر.
– كوكتەم كەلسە, كورگەن كۇنىمىز وسى. كۇزدىڭ دە جاۋىن-شاشىنىندا بالالارىمىز باتپاققا بەلشەسىنەن باتىپ, سۋ بولىپ جۇرەدى. اياقكيىم شاق كەلمەيدى. كولىكپەن ءجۇرۋ دە مۇمكىن ەمەس. جاڭاقۇرىلىستى بىلاي قويعاندا ورتالىق كوشەلەردىڭ دە كۇيى وسى بولىپ تۇر. اۋىل جولدارى قاشان جاسالىپ, قاشان ۋايىمنان, قيىندىقتان ارىلامىز؟ اۋىلدىق اكىمدىكتەر نە ءبىتىرىپ وتىر, بىزگە جانى اشيتىن ۇكىمەت بار ما؟ دەپ كۇيىنەدى ورال ايناباەۆ باستاعان جالعامىس اۋىلىنىڭ ءبىر توپ تۇرعىندارى.
جالعامىس اۋىلى تۇرعىندارىنىڭ باسىم بولىگى قونىستانعان جاڭاقۇرىلىستاعى كوشەلەرگە جىل سايىن تاس-قۇم توسەلگەنمەن, ونى وسىنداي جاۋىن مەن قار سۋى شايىپ كەتەدى. بىلتىر جالعامىس اۋىلىنىڭ 4 شاقىرىم جولىنا بالاس توسەلگەن. بىراق ودان كەلەر قايران جوق.
كۇننىڭ كۇرت جىلۋىنان تۋىنداعان توتەنشە جاعداي جامبىل اۋدانىنىڭ تۇرعىندارىن دا اۋرە-سارساڭعا سالىپ قويدى.
– قىزىل سۋعا قارسى ارەكەت ەتىپ, بوگەت جاساعاننان قايىر بولماي تۇر. تاۋدان اققان قار سۋى وزەنگە اينالىپ, قورا-قوپسىمىزدى, اۋلامىزدى تۇگەل باسىپ جاتىر. جەردىڭ توڭى جىبىمەگەندىكتەن مامانداردىڭ جۇمىسىنا كەدەرگى كوپ, – دەيدى سارىباي بي اۋىلىنىڭ تۇرعىنى اينۇر سوۆەتحانقىزى.
توتەنشە جاعدايلار ءبولىمى مەن اۋىلدىق اكىمدىك ماماندارى, اۋىل تۇرعىندارى بىرلەسىپ, سارىباي بي اۋىلىنداعى ەكى ۋچاسكەدە سۋ تاسقىنىنا قارسى جۇمىستار جۇرگىزۋدە. قازاقستان كوشەسى بويىنشا ەرىگەن سۋدىڭ الدىن الۋ ماقساتىندا تۇرعىن ءۇيدىڭ اۋماعى 40 قاپشىقتى ينەرتتى ماتەريالدارمەن نىعايتىلعان. سونداي-اق سۋدى بۇرۋ ءۇشىن ۇزىندىعى شامامەن 50 مەتر بولاتىن ۋاقىتشا ارىق جەلىسى قازىلدى.
بۇل جۇمىستارعا جەرگىلىكتى اتقارۋشى ورگانداردىڭ 8 ادام جانە 1 بىرلىك تەحنيكاسى, №28237 اسكەري ءبولىمنىڭ 3 قىزمەتكەرى جانە 3 بىرلىك تەحنيكاسى, تج دەپارتامەنتىنىڭ 2 قىزمەتكەرى جانە 1 بىرلىك تەحنيكاسى جۇمىلدىرىلعانى جايلى الماتى وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى.
سونىمەن قاتار سوڭعى مالىمەتتەر بويىنشا تالعار اۋدانى بەساعاش اۋىلدىق وكرۋگىندەگى سۋ باسقان ايماقتاردا سۋدى سىرتقا ايداۋ جۇمىستارى جالعاسۋدا.
وڭىردە 2022 جىلى 34 قاۋىپتى ۋچاسكە انىقتالعان. وعان جەرگىلىكتى اتقارۋ ورگاندارىنان قاراجات ءبولىنىپ, 7 ۋچاسكە تولىقتاي جويىلعان. قالعان 27 قاۋىپتى ۋچاسكەدە بيىلعى جىلى قاراجات قاراستىرىلسا, ءتيىستى جۇمىستار اتقارىلاتىن بولادى.
ۇلبوسىن يسابەك,
جۋرناليست
الماتى وبلىسى