استانا قالالىق ىشكى ىستەر دەپارتامەنتىندە پوليتسيا كۇنىنە ارنالعان مەرەكەلىك شارا بولدى. اتالعان شارانى ەلوردالىق پوليتسيا باسشىسى, گەنەرال-مايور امانتاي اۋباكىروۆ اشتى. ول بارشا ارىپتەستەرىن ءتول مەرەكەلەرىمەن قۇتتىقتاپ, ساقشىلار قىزمەتى مەن ماڭىزىن اتاپ ءوتتى. سونداي-اق, ارداگەرلەر كەڭەسىنىڭ توراعاسى ە. تانابەرگەنوۆ تە ەلوردالىق پوليتسيا قىزمەتكەرلەرىنىڭ ەرەن ەڭبەكتەرىن باعالاي كەلە, العىس ايتتى.
ءسويتىپ, اتالعان مەرەكە داستۇرگە ساي ەڭ ۇزدىكتەردى ماراپاتتاۋ راسىمىمەن جالعاستى. ودان ءارى «قازاق ەلى» مونۋمەنتى الاڭىندا جاڭا اۆتوكولىكتەردىڭ كىلتى تابىس ەتىلدى. «استانا قالاسى اكىمدىگىنىڭ ارقاسىندا جىل سايىن ەلوردالىق پوليتسيا دەپارتامەنتىنىڭ جاعدايى جاقسارىپ كەلەدى. مىنە, بۇگىن سونىڭ تاعى ءبىر دالەلىندەي, دەپارتامەنتتىڭ جول-پاترۋلدىك پوليتسيا پولكى وتاندىق جاڭا كولىكتەرمەن تولىقتى. بۇل جاقسىلىقتاردىڭ ءبارى استانامىزدى ودان ءارى كوركەيتە ءتۇسۋ ءۇشىن جانە ادامداردىڭ قاۋىپسىزدىگى مەن تىنىشتىعىن قورعاۋعا لايىقتى نەگىز بولار سەنىم شارالارى» دەپ اتاپ ءوتتى ا. اۋباكىروۆ.
بۇل كۇن قازاقستان پوليتسياسىن قۇرعان جانە سول پوليتسيا قاتارىندا ايانباي قىزمەت ەتىپ جۇرگەندەرگە العىس جاۋدىرۋ كۇنى بولدى. ويتكەنى, قازىرگى پوليتسيادا قىزمەت اتقارۋ – ادىلەتسىزدىكپەن كۇرەس جولىندا ءوز كاسىبىنە ادال ادامداردىڭ عانا قولىنان كەلەتىن كۇردەلى, سونىمەن قاتار, قاۋىپتى جانە اسا جاۋاپكەرشىلىگى زور مىندەت بولىپ تابىلادى.
قازاقستان پوليتسياسى كۇنىن مەرەكەلەۋ پاترۋلدىك پوليتسيا پولكى ەرلەر حورىنىڭ 10-جىلدىعىمەن تۇسپا-تۇس كەلدى. حوردىڭ قۇرامىندا كادىمگى كاسىبي مۋزىكانت پەن ءانشى رەتىندە تانىلعان پوليتسەيلەر بار. حوردىڭ جەتەكشىسى – رەسپۋبليكالىق كونكۋرستاردىڭ ديپلومانتى, قازاق ۇلتتىق ونەر ۋنيۆەرسيتەتىنىڭ كونتسەرتمەيستەرى عاليا سادىموۆا. حوردىڭ ورىنداۋىندا «نۇر استانا», «پوليتسيا مارشى», «سارباز پارىزى» اتتى اندەر شىرقالدى. وندا ءتۇرلى كونكۋرستاردىڭ جەڭىمپازى, تالانتتى ۇجىم – استانا قالاسى ءىىد-ءنىڭ «جىگەر» فولكلورلىق انسامبلى دە ءوز ۇلەسىن قوستى. سونىمەن قاتار, باۋىرجان يساەۆ, مەرۋەرت تۇسىپباەۆا, مارجان اراپباەۆا سياقتى قازاقستان ەسترادا جۇلدىزدارى پوليتسەيلەردى قۇتتىقتاپ, ءان شىرقاسا, استانالىق فيلارمونيا مەن استانا تسيركىنىڭ ارتىستەرى دە ءوز ونەرلەرىن ورتاعا سالدى.
مەرەكەلەۋ باعدارلاماسىندا ەلوردا اۋماعىندا جەدەل احۋالدى باقىلايتىن, قاجەت جاعدايدا باس بۇزارلاردى بۇلتارتقىزباي بۇعاۋلايتىن «ارلان» ارنايى ماقساتتاعى ءبولىنىس ساربازدارى كەرەمەت ونەر كورسەتتى. سونىمەن قاتار, قارۋ-جاراق, ارنايى ەكيپيروۆكا جانە تەحنيكانى جاساقتاۋ, سونداي-اق, «روبينسون – R-44» تىكۇشاعى كورسەتىلدى. وعان قوسا قىزمەتتىك-ىزدەستىرۋ يتتەرىن جەتەكتەگەن كينولوگيالىق قىزمەت ورتالىعىنىڭ كينولوگتارى ورتاعا شىقتى. كينولوگيالىق قىزمەت ورتالىعىندا نەمىس, شىعىس-ەۋروپالىق, قاسقىر تۇقىمداس كاسىبي دايىندالعان قىزمەتتىك يتتەرى بار ينسپەكتور-كينولوگتار جۇمىس ىستەيدى. قىزمەتتىك-ىزدەستىرۋ يتتەرىنىڭ قاتىسۋىمەن كوپتەگەن قىلمىس تۇرلەرى اشىلدى.
مەرەكەلەۋ اياسىندا سپورتتىق ءىس-شارالار: گىر تاسىن كوتەرۋ, قويان-قولتىق ۇرىس, جارىس, دوپ قاعۋ, شاحماتتان وتەتىن بليتس-تۋرنير بولىپ, جۇلدەلى ورىن العان جەڭىمپازدار باعالى سىيلىقتارمەن ماراپاتتالدى. بۇل مەرەكە شاتتىعىنان بالالار دا قاعىس قالمادى. ولارعا ارناپ, ارنايى ويىن الاڭى جابدىقتالدى. بالالارعا ارنالعان باتۋتتار, ات ۇستىندە سەرۋەندەۋ, استانا قالاسى قۋىرشاق تەاترى انيماتورلارىنىڭ جانە ەلوردا تسيركى سايقىمازاقتارىنىڭ قاتىسۋىمەن قويىلعان كورىنىستەر كوڭىلگە نۇر قۇيدى.
الەكساندر تاسبولاتوۆ,
«ەگەمەن قازاقستان».