قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى جانە الماتى قالاسىنىڭ اكىمى ەربولات دوساەۆ بۇۇ اگەنتتىكتەرىنىڭ باسشىلارىمەن جانە وڭتۇستىك استانادا اككرەديتتەلگەن ديپلوماتيالىق كورپۋسپەن بىرلەسكەن كەزدەسۋ وتكىزدى, دەپ حابارلايدى Egemen.ءkz سىم ءباسپاسوز قىزمەتىنە سىلتەمە جاساپ.
الماتىداعى حالىقارالىق ۇيىمدار كەڭسەسىنىڭ عيماراتىنا «UN Plaza» اتاۋىن بەرۋ ءراسىمى ءوتتى. بۇل عيماراتتىڭ رەسمي يناۋگۋراتسياسى 2019 جىلدىڭ مامىر ايىندا پرەزيدەنت قاسىم-جومارت توقاەۆتىڭ قاتىسۋىمەن ءوتتى. بۇگىنگى تاڭدا الماتى قالاسىنداعى بۇۇ عيماراتىندا شتاتتىق سانى 120 ادامنان اساتىن 18 اگەنتتىك ورنالاسقان.
بۇۇ وكىلدەرىمەن كەزدەسۋ بارىسىندا م. تىلەۋبەردى بۇۇ-نىڭ قازاقستاندا بولعانىنا 30 جىل تولۋىمەن قۇتتىقتاپ, وسى كەزەڭدەگى ەلىمىز بەن جاھاندىق ۇيىم اراسىنداعى ءوزارا ءىس-قيمىلدىڭ جوعارى دەڭگەيىن اتاپ ءوتتى. قازاقستاننىڭ الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن قۇرۋ جونىندەگى باستاماسىنا ەرەكشە نازار اۋدارىلدى. «مۋلتيلاتەراليزمگە بەرىك سەنىم مەن مىندەتتەمە, بولجامدى جانە سىندارلى سىرتقى ساياسات قازاقستان ءۇشىن باستى باسىمدىق. وڭىرلىك ورتالىقتىڭ قىزمەتى بۇۇ وڭىرلىك دامۋ جۇيەسىن ىسكە اسىرۋ شەڭبەرىندە ءتيىمدى قۇرال بولادى», دەدى مينيستر.
سونىمەن قاتار ول كەزدەسۋگە قاتىسۋشىلاردى قازاقستانداعى ساياسي رەفورمالاردىڭ ىسكە اسىرىلۋ بارىسى جانە 2023 جىلعى 19 ناۋرىزدا جوسپارلانعان الداعى پارلامەنتتىك سايلاۋعا دايىندىق تۋرالى حاباردار ەتتى.
ءوز كەزەگىندە الماتىداعى بۇۇ مەن ديپلوماتيالىق كورپۋس وكىلدەرى ەل باسشىلىعىنىڭ «جاڭا جانە ادىلەتتى قازاقستاندى» قۇرۋعا باعىتتالعان كۇش-جىگەرىن جوعارى باعالادى. سونداي-اق الماتىدا قىزمەتتى جۇزەگە اسىرۋ ءۇشىن قولايلى جاعدايدى قامتاماسىز ەتۋدە كورسەتكەن قولداۋى ءۇشىن ۇكىمەت پەن اكىمدىككە العىس ءبىلدىردى.