ەلوردالىق دارىگەرلەر شىمكەنت تۇرعىندارىنا كۇردەلى وتا جاسادى

شىمكەنتكە اتتانعان دەلەگاتسيا قۇرامىنا قر پرەزيدەنتى ءىس باسقارماسىنىڭ مەديتسينالىق ورتالىعى اۋرۋحاناسىنىڭ جانە ورتالىق كلينيكالىق اۋرۋحانانىڭ ۇزدىك ماماندارى, اتاپ ايتقاندا نەيروحيرۋرگتار, گەنەتيكتەر, كارديوحيرۋرگتار, اريتمولوگتار, ونكوحيرۋرگتار جانە باسقا دا دارىگەرلەر كىردى.

ەكى كۇن ىشىندە دارىگەرلەر ونكولوگيا, كارديولوگيا, نەيروحيرۋرگيا, گاستروەنتەرولوگيا, اريتمولوگيا سالاسىندا 157 تەگىن كەڭەس وتكىزدى. ماماندار 16 كۇردەلى وپەراتسيا, سونداي-اق قازاقستاندىق مەديتسينانىڭ ساپاسىن ارتتىرۋ ءۇشىن شىمكەنت دارىگەرلەرىنە ارنالعان كوپتەگەن ءتۇرلى پرەزەنتاتسيالار مەن ماستەر-كلاسستار وتكىزدى. مۇنداي ءىس-شارالار وڭىرلىك دەنساۋلىق ساقتاۋ جۇيەسىن دامىتۋعا باعىتتالعان, وعان قوسا حالىق اراسىندا جوعارى تەحنولوگيالىق مەديتسينالىق قىزمەتتەرگە قولجەتىمدىلىكتى ارتتىرۋعا مۇمكىندىك بەرەدى.

شىمكەنتكە بارعان دارىگەرلەر كومانداسىنىڭ قۇرامىنا ءپىب مەديتسينالىق ورتالىعى اۋرۋحاناسى ديرەكتورىنىڭ حيرۋرگيا جونىندەگى ورىنباسارى, جوعارى ساناتتى نەيروحيرۋرگ مىڭجىلقى بەردىحودجاەۆ كىردى. مىڭجىلقى بەردىحودجاەۆ وتاندىق ەندوۆاسكۋليارلىق نەيروحيرۋرگيانىڭ باستاۋىندا تۇر. ول - قازاقستاندا العاش رەت كۇردەلى وتا جاساعان مامانداردىڭ ءبىرى. ول سونداي-اق مي تامىرلارىندا انەۆريزما مەن ارتەريوۆەنوزدى اقاۋلاردى ەندوۆاسكۋليارلىق ەمدەۋدىڭ جاڭا ادىستەرىن ەنگىزدى. ونىڭ ەسەبىندە مي تامىرلارىنا جاسالعان 6500-دەن استام جوعارى تەحنولوگيالىق وپەراتسيالار بار.

«كۇنىنە 13 وپەراتسيا جاساعان كەزدەرىم دە بولدى. شەتەلدىك سەمينارلارعا ۇنەمى قاتىسۋعا تىرىسامىن, شەتەلدىك ارىپتەستەرىممەن تاجىريبە الماسامىن, بىرلەسكەن وپەراتسيالار جۇرگىزەمىن», دەدى دارىگەر ساپار اياسىندا.

ەلوردالىق نەيروحيرۋرگ جەرگىلىكتى تۇرعىندارعا بارلىعى 45-كە جۋىق تەگىن كەڭەس بەرىپ, بىرنەشە وتا جاسادى.

«ەكى ناۋقاستا ينتراكرانيالدى ارتەريالاردىڭ تارىلۋى بولدى, سوندىقتان ءبىز ىشكى ۇيقى ارتەرياسىنا ەندوۆاسكۋليارلىق ستەنت جاسادىق. ءۇشىنشى ناۋقاستا ىشكى كاروتيد ارتەرياسىنىڭ جارىلعان انەۆريزماسى انىقتالدى. ۇلكەن قان كەتۋ بولدى. ءبىز ونى قان تامىرلارىنا تولتىردىق, ياعني ەمبوليزاتسيا جاسادىق. بارلىعى ءساتتى ءوتتى. بۇل جوبا ايماقتىق دارىگەرلەر ءۇشىن وتە پايدالى بولماق. مىسالى, كەشە ءبىز ينتراكرانيالدى ستەنتتەردى قولداندىق. ستەنت - زاقىمدالعان تامىردىڭ قابىرعاسىن ۇستاپ تۇرۋعا جانە ونىڭ ليۋمەنىنىڭ ديامەترىن ساقتاۋعا ارنالعان تامىرىشىلىك پروتەز. ونىڭ كومەگىمەن ءبىز 89 جاستاعى ناۋقاستى ەمدەدىك», دەدى مىڭجىلقى بەردىحودجاەۆ.

ايتا كەتسەك, «قر ءپىب مەديتسينالىق ورتالىعىنىڭ كۇندەرى» اياسىندا قازاقستاننىڭ ءتۇرلى وڭىرلەرىندە تاجىريبە الماسۋ ءىس-شارالارى ءوتىپ جاتىر. ءوزارا تاجىريبە الماسۋدىڭ ارقاسىندا كوپتەگەن مەديتسينا قىزمەتكەرلەرى بىلىكتىلىگىن ارتتىرىپ, كۇردەلى وتالاردى جۇرگىزۋگە قابىلەتتى دارىگەرلەر سانى كوبەيىپ كەلەدى.