اۋەسقوي سپورتشىلاردىڭ مۇز ايدىنىندا جۇگىرۋدەن ەكسترەمالدى جارىسى ءوتتى. العاش رەت ۇيىمداستىرىلعان حالىقارالىق جارىسقا اقش, رەسەي, چەحيا, پولشا, اۋعانستاننان جانە ەلىمىزدىڭ بىرقاتار وڭىرىنەن 300-گە جۋىق سپورتشى قاتىسىپ, باق سىناستى.
جارىسقا قاتىسۋشىلار ۇشار باسىنا قازباۋىر بۇلتتار بايلانعان وقجەتپەسكە, باۋىرى ادەمى اڭىزعا تۇنىپ تۇرعان جۇمباقتاسقا, قولدىڭ سالاسىنداي ماڭگى جاسىل قاراعايلارعا تاڭعالىستى. اپپاق قار جامىلعان جولبارىس جوندى جوتالار, شانشىلا بىتكەن شوقىلار سۇلۋلىققا ىڭكار جانداردى اجارىمەن ارباپ, كوركەمدىگىمەن ءتانتى ەتىپ قول بۇلعاپ وزىنە شاقىرىپ تۇرعانداي. اۋەل باستاعى اسقارالى ماقسات تا تابيعاتى كوركەم كۋرورتتى ءوڭىردىڭ بولمىس-ءبىتىمىن ناسيحاتتاۋ بولاتىن.
قاتىسۋشىلار بىرنەشە قاشىقتىقتا باق سىناستى. جەتى شاقىرىمدىق جارىس جولىندا الماتىلىق سپورتشى تيمۋر ارتيۋحين جەڭىمپاز اتانسا, 14 شاقىرىمدىق دودادا استانادان كەلگەن ۆلاديمير ەكەرتتىڭ مارتەبەسى ۇستەم بولدى. ەڭ قىزىعى, 21 شاقىرىمدىق قاشىقتىق بولاتىن. مۇنشالىقتى ۇزاق جولعا تەمىردەي ءتوزىمدى, دايىندىعى ءمىنسىز سپورتشىنىڭ عانا قاتىسۋى مۇمكىن. تارتىستى وتكەن دودادا ەلوردالىق سپورتشى يۋري شۆەتستىڭ باعى جاندى. ال جەتى شاقىرىمدىق قاشىقتىقتا وتكەن سكانديناۆيالىق جۇرىستە كوكشەتاۋلىق قازبەك ەلۋباەۆقا تەڭ كەلەر ەشكىم بولمادى.
– ءدال وسىنداي بۇقارالىق سپورت جارىسىن ۇيىمداستىرۋ بۇرىن-سوڭدى بولعان ەمەس. ءبىزدىڭ كومپانيامىزدىڭ قۇرىلعانىنا بيىل 8 جىل تولعالى وتىر. الداعى ۋاقىتتا وسىنداي قىزعىلىقتى ءىس-شارالاردى كوبىرەك وتكىزسەك, ولكەنىڭ ءوڭىن تانىتىپ, ءتۋريستىڭ ءورىسىن كەڭەيتەمىز, – دەيدى «بۋراباي دامۋ» جاۋاپكەرشىلىگى شەكتەۋلى سەرىكتەستىگىنىڭ ماركەتينگ ءبولىمىنىڭ باسشىسى شىڭعىس ورازالين.
نەسى بار, بۋراباي باۋرايىندا باق سىناسقان سپورتشىلار ارقىلى تۋعان ەلدىڭ تاماشا تابيعاتى شارتاراپقا ءمالىم بولاتىن بولدى. ول دا از دۇنيە ەمەس.
اقمولا وبلىسى,
بۋراباي اۋدانى