اپات كەزىندە تۋعان ءسابيدى اسىراپ العىسى كەلەتىندەر كوپ

الەۋمەتتىك جەلىدە ەر ادامنىڭ شاقالاقتى وراپ, كوتەرىپ بارا جاتقان بەينەجازباسى تەز تارالىپ كەتتى. بۇعان دەيىن ءسابيدىڭ قيراعان ءۇيىندىنىڭ استىنان تابىلعانى تۋرالى جازعان بولاتىنبىز. 

ءسابي جەر سىلكىنىسى كەزىندە دۇنيەگە كەلىپ, كىندىگى كەسىلمەگەن كۇيدە تابىلعان. بىردەن اۋرۋحاناعا جەتكىزىلىپ, امان قالعان. ال ونىڭ وتباسى اپات سالدارىنان تۇگەل قازا تاپقان.

نارەستەگە ايا دەگەن ات قويىلعان. ول اراب تىلىنەن اۋدارعاندا تاڭعاجايىپ دەگەن ماعىنانى بىلدىرەدى. ايا قازىر اۋرۋحانادا. 

«ونى اۋرۋحاناعا الىپ كەلگەندە جاعدايى وتە ناشار بولدى. ارەڭ تىنىس الىپ جاتتى. بىراق قازىر جاعدايى جاقسى», دەيدى پەدياترلار.

الەۋمەتتىك جەلىلەردەگى مىڭداعان ادامدار ونى قالاي اسىراپ الۋعا بولاتىندىعى تۋرالى سۇراپ حات جولداعان. اۋرۋحانا مەنەدجەرى دە الەمنىڭ تۇكپىر-تۇكپىرىنەن ايانى اسىراپ العىسى كەلەتىن ادامداردىڭ حابارلاسقانىن ايتقان.

بىراق دارىگەرلەر ونىڭ تۋىستارى بار بولعاندىقتان, اسىراپ الۋعا رۇقسات ەتىلمەيتىنىن ايتتى.