قولى بوستىق, قارنى توقتىق ادامدى ازدىرار بولسا, بۇعاناسى بەكىمەگەن بالا ءۇشىن بۇل قازىر ءتىپتى قاۋىپتى. ينتەرنەت كەڭىستىكتەگى تولاسسىز اعىلعان اقپاراتتىڭ اعى مەن قاراسىن ايىرا الماي, جەتكىنشەكتەردىڭ اربالىپ, الدانىپ قالاتىنى – وسى بوس ۋاقىتىنىڭ نازاردان تىس قالۋىندا. سوندىقتان دا مەملەكەت قازىرگى كەزدە بالانىڭ ۋاقىتى زايا كەتپەۋى ءۇشىن تەگىن ۇيىرمە, سەكتسيالارعا دەن قويعانى ءمالىم.
وسى ورايدا قاراعاندى وبلىسىندا تەگىن ۇيىرمە مەن سەكتسيالار مىڭداعان بالانىڭ بابى مەن باعىن سىناۋعا مۇمكىندىك بەرىپ كەلەدى. ماسەلەن, قاراعاندى ايماعىندا بيىل بالالاردىڭ تەگىن سپورت سەكتسيالارىنا 2 ملرد 164 ملن تەڭگە قارجى ءبولىندى.
قاراعاندى قالاسىنداعى «سپورتيكا» فيتنەس-كلۋبىندا ءجۇزۋ, حوككەي, دزيۋدو جانە بي ۇيىرمەلەرى بار. كلۋب جەتەكشىلەرىنىڭ ايتۋىنشا, Artsport باعدارلاماسى ىسكە قوسىلعانعا دەيىن بارلىق سەكتسياعا قاتىسۋشىلاردىڭ ۇزىن سانى 170 ادام شاماسىندا بولىپتى. كەيىن باعدارلاما نەگىزىندە مەملەكەتتىك قارجىلاندىرۋدان سوڭ كلۋبتا جۇزۋگە كەلگەن بالا سانى 527-گە جەتكەن ەكەن.
– قازىر جۇزۋگە – 527, حوككەيگە – 271, بيگە – 15, دزيۋدوعا 17 ادام كەلەدى. ءبارى – تەگىن. حوككەيشىلەرىمىزدىڭ ناتيجەلەرى كوڭىل كونشىتەدى. ولار – قازاقستان چەمپيوناتتارىنىڭ جۇلدەگەرلەرى. سونداي-اق باسشىلىقتىڭ باستاماسىمەن بىزدە 10 ەرەكشە بالا تەگىن جاتتىعادى, – دەيدى فيتنەس-كلۋب اكىمشىسى يۋليا ۋليانوۆا.
باۋىرجان قاسىموۆتىڭ شاحمات اكادەمياسى دا جاس شاحماتشىلاردىڭ باسىن قوسقان. مۇندا اrtsport باعدارلاماسى جانە اقىلى نەگىزدە شاحمات ساباقتارى وتەدى. بۇعان دەيىن مەكتەپتىڭ ءۇش فيليالىندا 200 ادام ءدارىس العان كورىنەدى. قازىر ولاردىڭ قاتارى مىڭداپ سانالادى.
– ال Artsport بويىنشا جۇمىس ىستەي باستاعاننان بەرى وقۋشىلار سانى مىڭنان استى. بۇل باعدارلاماعا دەيىن كوپتەگەن بالا سەكتسيا, ۇيىرمەگە قاتىسا الماي كەلگەنى بەلگىلى. ويتكەنى ونىڭ ءبارى اقىلى ەدى. قازىر بىزدە 500-700-گە جۋىق ادام – كەزەكتە. بىزدەن جالپى 5 مىڭنان اسا ادام وقىپ شىقتى. بەس جىل قاتارىنان اكادەميا قاراعاندى وبلىسىنىڭ ەڭ مىقتى مەكتەبى رەتىندە تانىمال. ءبىزدىڭ تاربيەلەنۋشىلەرىمىز – رەسپۋبليكالىق, حالىقارالىق جارىستاردىڭ جەڭىمپازدارى مەن جۇلدەگەرلەرى, الەم چەمپيوناتتارىنىڭ قاتىسۋشىلارى. باعدارلاما كومەگىمەن ءبىز سۇرىپتاۋ, پريشاحتينسك جانە سەرىكتەس قالالاردا فيليالدار اشۋدى جوسپارلاپ وتىرمىز, – دەيدى شاحمات اكادەمياسىنىڭ باس باپكەرى جانە ونىڭ نەگىزىن قالاۋشى ب.قاسىموۆ.
«امانات» فۋتبول كلۋبىنداعى بالانىڭ سانى دا وسكەن. بۇرىن ساناۋلى بالا كەلسە, ءبۇل كۇنى 220 ادام تەگىن جاتىعىپ ءجۇر.
– ءبىز دە الدىمەن, اقىلى نەگىزدە جۇمىس ىستەدىك. ول ۋاقىتتا ىقىلاس بىلدىرگەن بالا از. توپتا بارلىعى 10 بالاعا دەيىن عانا بولاتىن. بەس جاتتىقتىرۋشى جۇمىس ىستەدى. جان باسىنا قارجىلاندىرۋ باعدارلاماسى ارقىلى بالالار مەن جاتتىقتىرۋشىلار سانى كوبەيدى. قازىر بىزدە ۆاۋچەرلەر بويىنشا 13 توپتا 220 ادام تەگىن جاتتىعادى. سونداي-اق 20-عا جۋىق بالا مەكتەپتىڭ باستاماسىمەن تەگىن اينالىسادى, ولاردىڭ 10-ى – كوپ بالالى وتباسىنان, – دەيدى فۋتبول مەكتەبىنىڭ جەتەكشىسى اندرەي ميرونوۆ.
سپورت سەكتسيالارىن ۇيىمداستىرۋعا وڭىردە قاراعاندى, تەمىرتاۋ, بالقاش, قارقارالى, شاحتينسك, ساران, بۇقار جىراۋ, وساكاروۆ, اباي جانە شەت اۋداندارىنان 48 سپورت قىزمەتىن ۇسىنۋشىلار جۇمىلدىرىلىپ وتىر.
قاراعاندى وبلىسى