اتىراۋ وبلىسىندا جىل سايىن جايىق پەن ويىل, قيعاش, جەم مەن ساعىز وزەندەرىندە بولۋى مۇمكىن سۋ تاسقىنىنا قارسى قامدانىس جاسالادى. وبلىستىق توتەنشە جاعدايلار دەپارتامەنتى باسشىسىنىڭ مىندەتىن اتقارۋشى نۇرلان جاڭاباەۆتىڭ ايتۋىنشا, بيىل سۋ ايدىندارىندا تاسقىن قاۋپى تۋىندامايتىنىنا بولجام جاسالىپ وتىر.
– تابيعات قۇبىلىسى كەز كەلگەن ساتتە وزگەرۋى مۇمكىن. سول سەبەپتەن سۋ تاسقىنى قاۋپىنىڭ الدىن الۋ ءۇشىن دايىندىق جۇرگىزۋىمىز قاجەت. قازىر اتىراۋ قالالىق پەن اۋداندار اكىمدىكتەرىنىڭ بەرگەن اقپاراتىنا سايكەس سۋ تاسقىنىنىڭ ىقتيمال سالدارىن جويۋ ءۇشىن 22,5 توننا جانار-جاعارماي, 485 توننا ينەرتتى ماتەريالدار, 29 مىڭ 800 قاپشىق, 17 شاتىر, 5 294 كەرەۋەت, 3 660 توسەك-ورىن جابدىعى دايىندالدى. توتەنشە جاعدايلار مينيسترلىگىنىڭ نىسانالى ترانسفەرتتەرى ارقىلى رەسپۋبليكالىق بيۋدجەت ەسەبىنەن توتەنشە جاعدايلاردىڭ تۋىنداۋ تاۋەكەلىن تومەندەتۋ ماقساتىندا 2021-2025 جىلدارعا ارنالعان «قاۋىپسىز ەل» ۇلتتىق جوبا ىسكە اسىرىلىپ جاتىر. وسى جوبا اياسىندا جايىق وزەنىنىڭ ماحامبەت اۋدانىنداعى ماحامبەت جانە العا اۋىلىنىڭ تۇسىنداعى جاعالاۋىن بەكىتۋ جۇمىستارى قولعا الىنعان ەدى. الايدا العا اۋىلىندا 2021 جىلى رەپەرلەردى ورناتۋ كەزىندە وزەن جاعالاۋىنىڭ 15-20 مەترگە اۋىتقىعانى انىقتالدى. سونىڭ سالدارىنان نىعايتۋ جۇمىستارى توقتاتىلدى. جايىق وزەنى ارناسىنىڭ 15-30 مەترگە وزگەرۋىنە بايلانىستى جوبالاۋ-سمەتالىق قۇجاتتاماعا تۇزەتۋ ەنگىزىلدى, – دەيدى ن.جاڭاباەۆ.
جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسى باسشىسىنىڭ مىندەتىن اتقارۋشى تۇرلان سۇلەيمەنوۆتىڭ مالىمەتىنشە, اتىراۋ وبلىسىندا 31 گيدروتەحنيكالىق قۇرىلىس نىسانى بار. گيدروتەحنيكالىق نىساندار قۇرىلىسى وتكەن عاسىردىڭ 60-80 جىلدارى سالىنعان.
– بۇل نىسانداردىڭ ناقتى توزۋ دەڭگەيى 60 پايىزدان جوعارى ەكەنى انىقتالدى. قازىر گيدروتەحنيكالىق نىسانداردىڭ قاۋىپسىزدىگى مەن سەنىمدىلىگى كۇرت تومەندەدى. سوندىقتان گيدروتەحنيكالىق قۇرىلىستاردى قاۋىپسىز ءارى سەنىمدى پايدالانۋ, تۇرعىندار ءومىرى مەن دەنساۋلىعىنا زيان كەلتىرۋىن بولدىرماۋ ماسەلەسى ايرىقشا وزەكتى بولىپ وتىر, – دەپ مالىمدەدى ت.سۇلەيمەنوۆ.
وبلىس اكىمىنىڭ ورىنباسارى قايرات نۇرتاەۆتىڭ ايتۋىنا قاراعاندا, ماحامبەت اۋدانىنداعى العا اۋىلىنىڭ تۇسىندا جايىق وزەنىنىڭ جاعالاۋىن نىعايتۋ جۇمىستارىن جۇرگىزۋ ءۇشىن «پاۆلودار وزەن پورتى» اق مەردىگەر رەتىندە تاڭدالعان. الايدا بۇل مەردىگەر جۇمىستى كەشەۋىلدەتىپ وتىر.
– العا اۋىلىنىڭ تۇسىنداعى جاعالاۋدى بەكىتۋدى جەدەلدەتۋ قاجەت. گەوشپۋنت قاعىپ ۇلگەرمەيتىن بولسا, ەسكى ادىسپەن الدىن الۋ جۇمىستارىن جۇرگىزگەن ءجون. بيىلدان باستاپ جاعالاۋدا قورعانىش بولماي, وزەن ارناسى 13-14 مەترگە دەيىن اۋىتقىسا, اۋىلعا قاۋىپ ءتونۋى مۇمكىن, – دەيدى ق.نۇرتاەۆ.
ونىڭ دەرەگىنە سۇيەنسەك, كەيىنگى جىلدارى باتىس قازاقستان مەن اتىراۋ وبلىسى ءۇشىن ماڭىزى ەرەكشە جايىق وزەنىندە سۋدىڭ ازدىعى بايقالىپ وتىر. ءتىپتى وزەننىڭ كاسپي تەڭىزىنە قۇيار ساعاسى تايازدانىپ بارادى. قازىر ونىڭ تەرەڭدىگى 30-40 سم دەڭگەيىن قۇراپ, جارتى مەتردەن از بولعان. ال ساعادان شامامەن 10 شاقىرىم قاشىقتىقتا زەرتتەلگەن ۋچاسكەلەردەگى تەرەڭدىك ەكى مەتردەن اسقان.
وسىعان بايلانىستى وزەن ارناسىن تەرەڭدەتۋ جۇمىستارى قولعا الىنعان. بۇل ۇزاق مەرزىمدى جوبا بولعاندىقتان, وزەن ساعاسىن ۇنەمى باقىلاۋدى قاجەت ەتەدى.
– جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ ماماندارى تاياۋ كۇندەرى ءدال كوورديناتتار ارقىلى ءاربىر ناقتى نۇكتەدە ولشەۋ جۇرگىزىپ, تەرەڭدىكتىڭ دەڭگەيىن كورسەتىپ وتىرعانى ءجون. بۇل ساعالىق كەڭىستىكتىڭ جاي-كۇيىن ەگجەي-تەگجەيلى زەردەلەۋگە قاجەت بولادى. ناقتى دەرەكتەر وزەننىڭ تەڭىز قۇيار ساعاسىنىڭ ءتۇبىن تەرەڭدەتۋ جۇمىستارىن جۇرگىزۋ كەزىندە پايدالانىلادى. كوكتەمگى سۋ تاسقىنىنا قارسى ءىس-شارالاردى دايىنداۋ كەزىندە ەسكەرىلەدى, – دەيدى وبلىس اكىمىنىڭ ورىنباسارى.
اتىراۋ وبلىسى