بۇگىن مەملەكەت باسشىسى قاسىم-جومارت توقاەۆ پارلامەنت سەناتىنىڭ وتىرىسىندا سەنات توراعاسى لاۋازىمىنا ماۋلەن اشىمباەۆتى ۇسىندى. دەپۋتاتتار ۇسىنىلعان كانديداتۋرانى ءبىراۋىزدان قولدادى, دەپ حابارلايدى Egemen.kz.
سەنات توراعاسى وزىنە جۇكتەلگەن جۇمىستى ابىرويمەن اتقارىپ, ارتىلعان سەنىمدى اقتاۋعا تىرىساتىنىن جەتكىزدى.
«قۇرمەتتى ارىپتەستەر, كەزدەسۋىمىزگە پرەزيدەنت قاسىم-جومارت توقاەۆ قاتىستى. كونستيتۋتسياعا سايكەس, ول مەنى پالاتا سپيكەرى قىزمەتىنە ۇسىندى جانە سول ارقىلى ماعان ۇلكەن سەنىم ءبىلدىردى. مەن ءۇشىن بۇل - ۇلكەن جاۋاپكەرشىلىك. سىزدەر مەملەكەت باسشىسىنىڭ ۇسىنىسىن قولدادىڭىزدار. بۇل ءۇشىن كوپ راقمەت. مەملەكەت باسشىسى مەن حالىقتىڭ سەنىمىن اقتاۋعا بار كۇشىمدى سالامىن», دەدى ماۋلەن اشىمباەۆ.
ماۋلەن اشىمباەۆ 1971 جىلى 28 قاڭتاردا الماتىدا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىن جانە تافتس ۋنيۆەرسيتەتىن, فلەتچەردىڭ قۇقىق جانە ديپلوماتيا مەكتەبىن (اقش) بىتىرگەن. ەكونوميست – ساياسي ەكونوميا ءپانىنىڭ وقىتۋشىسى, حالىقارالىق قاتىناستار ماگيسترى. ساياساتتانۋ عىلىمدارىنىڭ كانديداتى. ەڭبەك ءوتىلى: 1993-1994 جىلدارى ءباسپاسوز جانە باق مينيسترلىگى جۇيەسىندە جۇمىس ىستەدى. 1994 جىلعى مامىردان 1995 جىلعى ناۋرىزعا دەيىن قر جوعارعى كەڭەسى دەپۋتاتىنىڭ كومەكشىسى. 1995 جىلعى ماۋسىمنان قاراشاعا دەيىن - قر قاۋىپسىزدىك كەڭەسى كەڭسەسىنىڭ كونسۋلتانتى. 1995 جىلعى قاراشادان 1999 جىلعى ساۋىرگە دەيىن قر پرەزيدەنتى اكىمشىلىگىنىڭ تالداۋ جانە ستراتەگيالىق زەرتتەۋلەر ورتالىعى ءبولىمىنىڭ اعا ساراپشىسى, سەكتور مەڭگەرۋشىسى, ءبىرىنشى ورىنباسارى. 1999 جىلعى ساۋىردەن 2000 جىلعى مامىرعا دەيىن قر قاۋىپسىزدىك كەڭەسىنىڭ تالداۋ ورتالىعىنىڭ باسشىسى. 2000 جىلعى مامىردان 2002 جىلعى اقپانعا دەيىن قر قاۋىپسىزدىك كەڭەسىنىڭ تالداۋ ورتالىعىنىڭ باسشىسى - قر پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى. 2002 جىلعى اقپاننان 2005 جىلعى مامىرعا دەيىن قر پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى. 2005 جىلعى مامىردان 2006 جىلعى ساۋىرگە دەيىن قر قاۋىپسىزدىك كەڭەسى حاتشىسىنىڭ ورىنباسارى. 2006 جىلعى ساۋىردەن 2011 جىلعى قازانعا دەيىن قر پرەزيدەنتىنىڭ اكىمشىلىگى باسشىسىنىڭ ورىنباسارى. 2012 جىلعى قاڭتاردان 2018 جىلعى اقپانعا دەيىن بەسىنشى جانە التىنشى سايلانعان قر پارلامەنتى ءماجىلىسىنىڭ دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى. 2018 جىلدىڭ اقپانىنان 2019 جىلدىڭ ماۋسىمىنا دەيىن «نۇر وتان» پارتياسى توراعاسىنىڭ ءبىرىنشى ورىنباسارى. 2019 جىلعى شىلدەدەن جەلتوقسانعا دەيىن قر پرەزيدەنتىنىڭ كومەكشىسى. 2019 جىلعى جەلتوقساننان 2020 جىلعى مامىرعا دەيىن قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى. 2020 جىلعى مامىردا قر پرەزيدەنتىنىڭ جارلىعىمەن پارلامەنت سەناتىنىڭ دەپۋتاتى بولىپ تاعايىندالدى, التىنشى سايلانعان قر پارلامەنتى سەناتىنىڭ توراعاسى بولىپ سايلاندى.