بىلتىرعى قىركۇيەك ايىندا مەكسيكالىق ساۋل الۆارەستەن ۇپاي سانىمەن ۇتىلعاننان كەيىن قازاقستاننىڭ اتاقتى كاسىپقوي بوكسشىسى گەننادي گولوۆكين شارشى الاڭعا شىققان جوق. سول ارالىقتا بىرنەشە گۇرزى جۇدىرىقتى جىگىتتەر ونى جەكپە-جەككە شاقىردى. ويتكەنى, «كانەلودان» جەڭىلگەنىمەن, ورتا سالماقتاعى WBA men IBF سەكىلدى بەلدى نۇسقالاردىڭ چەمپيونىق بەلبەۋى ءالى دەجەرلەسىمىزگە تيەسىلى. سولاردىڭ ءبىرى كريس يۋبەنك ەدى.
33 جاستاعى ۇلىبريتانيانىڭ شىعىس سۋسسەكس ءوڭىرىنىڭ تۋماسى 2011 جىلدان بەرى كاسىپقوي رينگتە كۇش سىناسىپ ءجۇر. سول ارالىقتا 35 كەزدەسۋ وتكىزىپ, 32 رەت جەڭىسكە جەتتى. 23 قارسىلاسىن نوكاۋتقا جىبەردى. 2017-2020 جىلدار ارالىعىندا يۋبەنك ەكىنشى ورتا سالماقتا IBF نۇسقاسىنىڭ التىن بەلبەۋىن يەلەنىپ, WBA-نىڭ ۋاقىتشا چەمپيونى اتاندى. بۇعان دەيىن ول بيللي دجو سوندەرس (2014 جىلى) پەن دجوردج گروۋۆزدەن (2018 جىلى) ۇپاي سانىمەن عانا ۇتىلعان ەدى. تاعى ءبىر باسەكەدە تەڭ ەسەپ تىركەلدى. كەينگى التى جەكپە-جەگىن كريس جەڭىسپەن اياقتادى. سول ارالىقتا دجەي-دجەي ماكدوناح, دجەيمس ديگەيل, ماتۆەي كوروبوۆ, ماركۋس مورريسون, ۆانيك اۆديان جانە ليام ۋيليامس سىندى ساڭلاقتاردى سان سوقتىردى. مىنە, سول كەزدەرى يۋبەنك گگگ-دى قايتا-قايتا جەكپە-جەككە شاقىرىپ, الەك بولعان ەدى.
بىراق بۇل باسەكەنىڭ ەندى وتپەيتىنى انىق. سەبەبى جۋىردا عانا كريس يۋبەنك ءوزىنىڭ وتانداسى ليام سميتتەن ويسىراي ۇتىلدى. ۇلىبريتانيانىڭ مانچەستەر قالاسىندا وتكەن بۇل باسەكە ءتورتىنشى راۋندا تەحنيكيلىق نوكاۋتپەن اياقتالدى. ەندى گولوۆكيننىڭ سميتپەن كۇش سىنسۋى ابدەن مۇمكىن. ويتكەنى 34 جاستاعى ليۆەرپۋلدىڭ تۋماسى قازىر بابىندا. كاسىپقوي بوكستى سەرىك ەتكەن 15 جىل ارالىعىندا ول 37 مارتە جەكپە-جەككە شىعىپ, 33 رەت مەرەيى ۇستەم بولدى. 20 باسەكەلەسىن ايقىن باسىمدىقپەن ۇتتى. ليام تەك ساۋل الۆارەس (2016), حايمە مۋنگيا (2018) جانە ماگومەد كۋربانوۆقا (2021) ەسە جىبەردى. ال قالعان قارسىلاستارىن «قالپاقپەن ۇرىپ الدى» دەسەك تە بولادى.
وسىلاي تىزبەكتەيتىن بولساق, امەريكالىق دجەرمالل چارلو, كۋبالىق ەريسلاندي لارا, دومينيكاندىق كارلوس ادامەس جانە مەكسيكالىق حايمە مۋنگيا دا GGG-مەن قولعاپ تۇيىستىرۋگە دايار ەكەنىن اڭعارۋ قيىن ەمەس. ولاردىڭ بارلىعى دا مىقتى بوكسشىلار. ماسەلەن, 32 جاستاعى چارلو WBC نۇسقاسىنىڭ التىن بەلبەۋىنىڭ يەگەرى. جاسى 40-قا تاياپ قالعان لارا مەن 28 جاستاعى دومينيكاندىق كارلوس ادامەس ۋاقىتشا چەمپيوندىق اتاقتاردى يەلەنۋدە. ال 26 جاستاعى مۋنگيا 41 جەكپە-جەكتىڭ بىردە-بىرەۋىندە جەڭىلىستىڭ كەرمەك ءدامىن تاتقان ەمەس. سول باسەكەلەردىڭ 33-ىندە ول قارسىلاستارىن ۇرىپ جىقتى.
ارينە, گەننادي گولوۆكيننىڭ ولاردىڭ ەشقايسىسىنان قايمىقپايتىنى انىق. دەسەك تە ونيڭ دا ءداۋىرى ءوتىپ بارا جاتقانىن مويىنداماسقا لاج جوق. بيىل كوكتەمدە 41 جاسقا تولعالى وتىرعان وتانداسىمىز الداعى ۋاقىتتا جاقسى ەكى-ءۇش جەكپە-جەك وتكىزىپ, جارقىن جەڭىستەرىمەن ءوز جەرلەستەرىن قۋانتسا دەگەن تىلەگىمىز بار. كەزىندە «اكەم – ورىس, شەشەم – كارىس, ال مەن – قازاقپىن!» دەپ جەر-جاھانعا جار سالعان گەناعا بارشا قازاق جانكۇيەرىنىڭ سىي-قۇرمەتى ەرەكشە جانە العىسى شەكسىز. ءبىر سوزبەن ايتساق, گگگ-دىڭ ەسىمى قازاقستاننىڭ كاسىپقوي بوكسىن جاڭا دەڭگەيگە كوتەرگەن ازامات رەتىندە تاريحتا قالاتىنى ءسوزسىز.