ماسكەۋدەگى Vegas City Hall كەشەنىندە «شاحمات جۇلدىزدارى» دەپ الاتىن حالىقارالىق ءتۋرنيردىڭ ءوتىپ جاتقانى جايىندا ءبىز بۇعان دەيىن دە حابارلاعانبىز. كۇنى كەشە عانا وسى جارىستىڭ جۇلدە قورى 15 ميلليونوۆ رەسەي ءرۋبلىن قۇرايتىنى بەلگىلى بولدى. اتالعان دودادا الەمگە ايگىلى 10 شاحماتشى ونەر كورسەتۋدە. سولاردىڭ اراسىندا ءبيبىسارا اساۋباەۆا دا بار. ەندى ءبىز ءوز وقىرماندارىمىزدى سول گروسسمەيستەرلەردىڭ ارقايسىسىمەن جەكە-جەكە تانىستىرۋدى ءجون كوردىك.
سەرگەي كارياكين (رەسەي) 33 جاستا. ول – الەم كۋبوگىنىڭ يەگەرى, كوماندالىق ەسەپتە الەمنىڭ ەكى دۇركىن چەمپيونى. كەزىندە 13 جاسقا تولماي جاتىپ, جەر-جاھانداعى ەڭ جاس گروسسمەيستەر اتاندى. سونىڭ ارقاسىندا سەرگەيدىڭ ەسىمى گيننەستىڭ رەكوردتار كىتابىنا ەندى. 2021 جىلى بۇل رەكوردتى 12 جاستان ەندى عانا اسقان امەريكالىق ابحيمانيۋ ميشرا جاڭارتتى. 2016 جىلى كارياكين «ۇمىتكەرلەر تۋرنيرىندە» توپ جارىپ, نورۆەگيالىق ماگنۋس كارلسەنمەن الەمدىك ءتاج ءۇشىن تالاستى. بۇل تارتىس سكانديناۆيا تۇبەگىنەن كەلگەن ساڭلاقتىڭ جەڭىسىمەن اياقتالدى. رەسەيلىك شاحماتشىنىڭ بليتس پەن راپيدتەن الەم چەمپيونى دەگەن اتاقتارى بار.
تەيمۋر رادجابوۆ (ازەربايجان) 35 جاستا. ول – الەم كۋبوگىنىڭ يەگەرى, كوماندالىق ەسەپتە ەۆروپانىڭ ءۇش دۇركىن چەمپيونى. 2014 جىلعى الەم چەمپيوناتىندا تەيمۋر جارتىلاي فينالعا دەيىن جەتتى. 2003 جىلى نيدەرلاندتىڭ ۆەيك-ان-زەە قالاسىندا وتكەن تۋرنيردە رۋسلان پونامارەۆ, يسپانيا لينارەسىندە گارري كاسپاروۆ جانە گەرمانيانىڭ دورتمۋندىندا ۆيشۆاناتان اناندتان ايلاسىن اسىردى. ءسويتىپ, ازەربايجاندىق ۆۋندەركيندتىڭ ەسىمى ءبىر جىلدىڭ ىشىندە ءۇش بىردەي الەم چەمپيونىن ۇتقان تورتكۇل دۇنيەدەگى تۇڭعىش ويىنشى رەتىندە تاريحتا قالدى. ول كەزدە رادجابوۆ نەبارى 16 جاستا ەدى.
الەكساندر گريششۋك (رەسەي) 39 جاستا. كوماندالىق ەسەپتە دۇنيەجۇزىلىك شاحماتشىلار وليمپياداسىنىڭ ەكى دۇركىن جەڭىمپازى جانە ءتورت دۇركىن الەم چەمپيونى. بليتستەن الەم بىرىنشىلىگىندە ءۇش رەت باس جۇلدەنى ولجالادى. ءتورت رەت «ۇمىتكەرلەر تۋرنيرىندە» باق سىنعان الەكساندر ەڭ ۇزدىك ناتيجەگە 2011 جىلى قازاندا قول جەتكىزدى. سولنەچنايا جارا ول ەكىنشى ورىندى ەنشىلەدى. تاتارستاننىڭ استاناسىندا رەسەيلىك ويىنشى ارميانىق لەۆون ارويان مەن ءوزىنىڭ وتانداسى ۆلاديمير كرامنيكتى قاپى قالدىرىپ, فينالا يزرايلدىك بوريس گەلفاندقا ەسە جىبەردى. 2013, 2018 جانە 2021 جىلدارى وتكەن جارىستاردا گريششۋك التىنشى ورىننان اسا المادى.
فرانسيسكو ۆالەحو (يسپانيا) 40 جاستا. ءوز ەلىنىڭ بەس دۇركىن چەمپيونى, جاستار اراسىنداعى (U-18) الەم بىرىنشىلىگىنىڭ جەڭىمپازى. دۇنيەجۇزىلىك شاحمات وليمپياداسىندا ءتورت رەت ونەر كورسەتىپ, ەۋروپا چەمپيوناتىنا ەكى مارتە قاتىستى.
سانان سيۋگيروۆ (رەسەي) 29 جاستا. قالماقيانىڭ استاناسى – ەليستانىڭ تۋماسى. 2018 جىلعى ەۋروپا چەمپيوناتىنىڭ قولا جۇلدەگەرى. 2021 جىلى الەم كۋبوگىندە باق سىنادى.
راۋناك سادحۆاني ء(ۇندىستان) 17 جاستا. ول – كوماندالىق ەسەپتە دۇنيەجۇزىلىك شاحمات وليمپياداسىنىڭ كۇمىس جۇلدەگەرى. 13 جاستان اسقان شاعىندا گروسسمەيستەر اتانىپ, بىرقاتار حالىقارالىق تۋرنيردە تابىستى ونەر كورسەتتى.
ۆلاديسلاۆ ارتەمەۆ (رەسەي) 24 جاستا. ءدال ىرگەمىزدەگى ومبىدا تۋىپ-وسكەن ونىڭ كوماندالىق ەسەپتە الەم چەمپيونى جانە جاسوسپىرىمدەردىڭ دۇنيەجۇزىلىك وليمپياداسىنىڭ جەڭىمپازى دەگەن اتاقتارى بار. ەۋروپا بىرىنشىلىگىندە باس جۇلدەنى قانجىعاسىنا بايلادى. بىلتىر ماسكەۋدە «شاحمات جۇلدىزدارى» ءتۋرنيرىنىڭ تۇساۋى كەسىلگەندە, ءدال وسى ويىنشى تەڭدەسسىز دەپ تانىلدى.
الەكساندرا گورياچكينا (رەسەي) 24 جاستا. جەكەلەگەن سايىستا الەمنىڭ ۆيتسە-چەمپيونى, كوماندالىق ەسەپتە الەم چەمپيونى. رەسەي كۋبوگىنىڭ ەكى دۇركىن يەگەرى, سول ەلدىڭ ءۇش دۇركىن چەمپيونى.
ەكاتەرينا لاگنو (رەسەي) 33 جاستا. ول – الەمنىڭ ۆيتسە-چەمپيونى, ەۆروپىڭ ەكى دۇركىن چەمپيونى, كوماندالىق ەسەپتە الەمنىڭ ەكى جانە قارت قۇرلىقتىڭ ءتورت دۇركىن چەمپيونى, دۇنيەجۇزىلىك شاحماتشىلار ءوليمپياداسىڭڭڭىمپازى. الەمدىك دودادا بليتستەن ءۇش جانە راپيدتەن ءبىر رەت دارا شىقتى.
مىنە, اتالعان تۋرنيردە ءبىزدىڭ ءبيبىسارا اساۋباەۆاعا وسىنداي مىقتى ويىنشىلارمەن شەبەرلىك بايقاسۋعا تۋرا كەلەدى. بىراق 18 جاستاعى قازاق قىزى دا وسالدار ساناتىنان ەمەس. ول جاستايىنان جاسىنداي جارقىلداپ, مەكتەپ وقۋشىلارى مەن جاس ورەندەر اراسىندا الەم بىرىنشىلىكتەرىندە بىرنەشە مارتە باس جۇلدەنى ولجالادى. قاتارىنان ەكى رەت بليتستەن الەم چەمپيونى جانە راپيدتەن الەم چەمپيوناتىنىڭ كۇمىس جۇلدەگەرى اتاندى. سوندىقتان دا ءبيبىسارا ەرحانقىزى ماسكەۋدە دە ءوزىنىڭ مىقتىلىعىن مويىنداتادى دەپ ۇمىتتەنەمىز.