كونيا قالاسىندا قازاق جاستارى بىرلەستىگى مەن تۇرىك وشاعى جاستار ۇيىمىنىڭ ۇيىمداستىرۋىمەن قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە ارنالعان ءىس-شارا ءوتتى.
ءىس-شارا قۋعىن-سۇرگىن قۇرباندارىنىڭ رۋحىنا قۇران باعىشتاۋمەن باستالىپ, XX عاسىردىڭ باسىندا قازاق حالقىنىڭ باسىنان وتكەن ۇلى ناۋبەت تۋرالى باياندامامەن جالعاسىن تاپتى. اشارشىلىقتىڭ سەبەپتەرى, سالدارى جانە قورىتىندىسى جايلى جينالعان جۇرتقا مالىمەت بەرىلدى. قۋعىن-سۇرگىنگە ۇشىراعان, اتۋ جازاسىنا كەسىلگەن الاش ارىستارىنىڭ قىسقاشا ءومىربايانى كورسەتىلىپ, الاش ۇرانى وقىلدى.
بۇل شارانى قازاق ستۋدەنتتەرى ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي العاش رەت ۇيىمداستىردى. ونىڭ ماقساتى – الىستا جۇرگەن قانداستارىمىزعا, تۇرىك ەلىنە قازاق حالقىنىڭ تاريحىن, قۋعىن-سۇرگىن قۇرباندارىن ەسكە الۋ كۇنىن ناسيحاتتاۋ. شارا سوڭىندا تۇرىك جاستارى ورنى تولماس قازاعا قايعىرىپ, ارقاشان باۋىرلاس قازاق حالقىنىڭ جانىنان تابىلاتىندارىن مالىمدەپ, ءوز تىلەكتەرىن ءبىلدىردى.
ايگەرىم سارپەكوۆا.