قر پارلامەنتى سەناتىنىڭ دەپۋتاتى ولگا بۋلاۆكينا ءۇلبى مەتاللۋرگيا زاۋىتىنىڭ جانە «سەس وسكەمەن اەس» جشس قىزمەتكەرلەرىمەن كەزدەستى, دەپ حابارلايدى Egemen.kz پارلامەنت سەناتىنىڭ ءباسپاسوز قىزمەتىنە سىلتەمە جاساپ.
سەناتور پالاتانىڭ زاڭ شىعارۋ قىزمەتى, قازاقستاندىقتاردى الەۋمەتتىك قورعاۋدى كۇشەيتۋ, ەلىمىزدى ەكونوميكالىق دامىتۋعا باعىتتالعان زاڭدار جانە ازاماتتاردىڭ ءال-اۋقاتىن ارتتىرۋ جونىندەگى كەشەندى شارالاردى زاڭنامالىق تۇرعىدا ۋاقتىلى قامتاماسىز ەتۋ تۋرالى جەرلەستەرىنە ايتىپ بەردى.
كەزدەسۋگە قاتىسۋشىلار لاستاۋشى زاتتاردىڭ شىعارىندىسىنا وڭ ىقپال ەتەتىن زاماناۋي تەحنولوگيالاردى كاسىپورىندارعا ەنگىزۋ مەن ەكولوگيالىق قاۋىپسىزدىكتىڭ وزەكتى ماسەلەلەرىن دە تالقىلادى.
سونداي-اق ولگا بۋلاۆكينا داۋلەت سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە بولىپ, ەكولوگيالىق قاۋىپسىزدىك ماسەلەلەرى تۋرالى دوڭگەلەك ۇستەل وتكىزدى. وتىرىسقا قاتىسۋشىلار اتموسفەرا اۋاسىنىڭ لاستانۋى مەن رەسۋرس ۇنەمدەۋدىڭ قولجەتىمدى تەحنولوگيالارىن ەنگىزۋ ماسەلەلەرىنە جان-جاقتى توقتالدى.