ءىىم اكىمشىلىك پوليتسيا كوميتەتى توراعاسىنىڭ مىندەتىن اتقارۋشى قايسار سۇلتانباەۆ جۇرگىزۋشىلەردى اۋا رايىن ەسكەرىپ, جابىق جولدارعا شىقپاۋعا شاقىردى, دەپ حابارلايدى Egemen.kz Polisia.kz-كە سىلتەمە جاساپ.
«قۇرمەتتى ازاماتتار! وزدەرىڭىز بىلەتىندەي, اۋا رايى جاڭا جىل مەرەكەسىنەن باستاپ بۇزىلا باستادى, ەڭ قيىن كۇندەر قاڭتاردىڭ 3-ءى مەن 4-نە كەلدى. ەلىمىزدىڭ 9 وڭىرىندە رەسپۋبليكالىق جانە وبلىستىق ماڭىزى بار اۆتوجولداردىڭ 79 ۋچاسكەسىندە كولىك قۇرالدارىنىڭ قوزعالىسىنا ۋاقىتشا شەكتەۋ ەنگىزىلدى. وسى جاعدايلاردا پوليتسيا قىزمەتكەرلەرى اۆاريالىق-قۇتقارۋ جانە جول قىزمەتتەرىمەن بىرلەسىپ, قاۋىپسىزدىكتى قامتاماسىز ەتۋ ءۇشىن اۆتوكولىكتەردىڭ قاۋىپتى جول ۋچاسكەلەرىنە شىعۋىنا جول بەرمەۋ بويىنشا شارالار قابىلدادى», دەدى قايسار سۇلتانباەۆ.
ونىڭ ايتۋىنشا, جەكەلەگەن جۇرگىزۋشىلەر پوليتسيا بلوك-بەكەتتەرىندە ەنگىزىلگەن قوزعالىستى شەكتەۋ شارالارىن ەلەمەي, قاۋىپتى جول ۋچاسكەلەرىنە شىعىپ كەتىپ وتىردى. كوپ جاعدايلاردا وسى كولىك قۇرالدارى قار كوشكەن جەرلەردە قالىپ قويىپ, ولاردى ەۆاكۋاتسيالاۋ مەن ومىرلەرىن قۇتقارۋ ءۇشىن پوليتسيا جانە توتەنشە جاعداي قىزمەتكەرلەرى باستارىن قاتەرگە تىگىپ, رەسۋرستاردى شىعىنداۋعا ءماجبۇر بولدى.
«جۇرگىزۋشىلەر وزدەرى ءۇشىن عانا ەمەس, جولاۋشىلار ءۇشىن دە جاۋاپتى ەكەندەرىن تۇسىنىنگەنى دۇرىس. ماسەلەن, 4-5 قاڭتاردا قاراعاندى وبلىسىنىڭ بالقاش قالاسى ماڭىندا اۆتوجولدىڭ جابىق ۋچاسكەسىندە 400-دەن استام كولىك قۇرالدارىندا 1,5 مىڭ ادام جينالعان. ءتىپتى, وسى ۋچاسكەدە 5 اۆتوكولىك قار ۇيىندىسىنە باتىپ, كەرى قايتقان. وسىعان قاراماستان جەكەلەگەن جۇرگىزۋشىلەر پوليتسيا جانە اكىمدىك قىزمەتكەرلەرىنىڭ زاڭدى تالاپتارىنا وزدەرىن اگرەسسيۆتى جانە دورەكى ۇستاپ, بالاعاتتاۋعا جول بەرىپ, كۇش قولدانۋعا دەيىن باردى», دەدى ول.
جول جيەگى ارقىلى وتپەك بولعان Hyundai Creta اۆتوكولىگىنىڭ جۇرگىزۋشىسى پوليتسيا قىزمەتكەرلەرىنىڭ زاڭدى تالاپتارىنا باعىنباعان. وعان قاتىستى اكىمشىلىك كودەكستىڭ 667-بابى بويىنشا اكىمشىلىك حاتتاما تولتىرىلىپ, ءىس اكىمشىلىك سوتقا جولداندى.وسىعان ۇقساس جاعداي 4 قاڭتاردا رەسپۋبليكالىق ماڭىزى بار ومبى – مايقاپشاعاي اۆتوجولىندا اباي وبلىسىنىڭ بوعاس, كوكپەكتى اۋىلدارى ماڭىندا بولدى. پوليتسيا قىزمەتكەرلەرىنىڭ زاڭدى تالاپتارىنا باعىنباعانى جانە قاۋىپتى جابىق ۋچاسكەگە شىققانى ءۇشىن Lada 21703 جانە Toyota Avalon ماركالى اۆتوكولىك قۇرالدارىنىڭ ەكى جۇرگىزۋشىسىنە قاتىستى اكىمشىلىك كودەكستىڭ 667-بابى بويىنشا اكىمشىلىك حاتتاما تولتىرىلدى.
«اۋا رايى ناشارلاعان كەزدە sms-حابارلامالار, ينتەرنەت-ارنالار جانە تەلەراديو حابارلارىن تاراتۋ ارقىلى تۇرعىنداردىڭ اۆتوجولدارداعى جاعدايلار تۋرالى ۋاقىتىلى حاباردار ەتىلەتىندىگىن اتاپ ءوتۋ قاجەت. ءسوز سوڭىندا كولىك قۇرالدارى جۇرگىزۋشىلەرىن تاسجولعا شىعابەرىستى جاپقان پوليتسيانىڭ زاڭدى تالاپتارىنا باعىنباعان كەزدە قازاقستان رەسپۋبليكاسىنىڭ قولدانىستاعى زاڭناماسىنا سايكەس 30 AEK نەمەسە 103 500 تەڭگە ايىپپۇلدان 15 تاۋلىككە دەيىن اكىمشىلىك قاماقا الۋ جازاسى بار ەكەندىگىن ەسكەرتكىم كەلەدى», دەدى ول.