20 جاستاعى جىگىت بىرنەشە رەت اكىمشىلىك جاۋاپكەرشىلىككە تارتىلعاندىقتان باس بوستاندىعىن شەكتەۋ جازاسىن باس بوستاندىعىنان ايىرۋ تۇرىنە الماستىردى, دەپ حابارلايدى Egemen.kz.
ەر ادام ادام ءومىرى مەن دەنساۋلىعىنا قاۋىپتى ەمەس زورلىق-زومبىلىقتى قولدانا وتىرىپ, بوتەننىڭ مۇلكىن اشىق تۇردە ۇرلاعانى ءۇشىن ءۇش جىلعا سوتتالدى. پروباتسيالىق باقىلاۋدا بولعان ەسەپتەگى ازامات قوعامدىق ورىنداردا ءتيىسۋ ءۇشىن, الكوگولدىك ىشىمدىكتەر ىشكەنى جانە تىنىشتىقتى بۇزعانى ءۇشىن 4 رەت اكىمشىلىك جاۋاپكەرشىلىككە تارتىلعان.
پروباتسيا قىزمەتكەرلەرى تاراپىنان وعان باس بوستاندىعىن شەكتەۋدى باس بوستاندىعىنان ايىرۋعا اۋىستىرۋ تۋرالى بىرنەشە ەسكەرتۋلەر بەرىلگەن. الايدا ەسەپتە تۇرعان جاس جىگىت ەسكەرتۋلەرگە قۇلاق اسپاي, قوعامدىق ورىندى لاستاعانى ءۇشىن تاعى دا اكىمشىلىك قۇقىق بۇزۋشىلىق جاساعان.
«ەسەپكە قويۋ كەزىندە وعان باس بوستاندىعىن شەكتەۋ تۇرىندەگى جازانى وتەۋ ەرەجەلەرى مەن شارتتارى, ونىڭ قۇقىقتارى مەن مىندەتتەرى بىرنەشە رەت ءتۇسىندىرىلدى. وسىعان قاراماستان, سوتتالعان ادام جازانى وتەۋدىڭ بارلىق ەرەجەلەرى مەن شارتتارىن ەلەمەدى. تيىسىنشە وعان جەتەكشىلىك ەتەتىن ينسپەكتور باس بوستاندىعىنان ايىرۋعا جازا ءتۇرىن اۋىستىرۋ ماسەلەسىن قاراۋ تۋرالى سوتقا ۇسىنىس جىبەردى. سوت پروباتسيا قىزمەتىنىڭ ۇسىنىسىن قاناعاتتاندىرۋ تۋرالى شەشىم شىعاردى.
«قازىرگى ۋاقىتتا ول ۋاقىتشا ۇستاۋ يزولياتورىنا قامالدى», دەدى شقو بويىنشا قاج دەپارتامەنتىنىڭ سولجاعالاۋ پروباتسيا قىزمەتىنىڭ ينسپەكتور-پسيحولوگى ءمولدىر كابيبيەۆا.