استانادا بالاباقشا اشىلدى

«قالانى ارالاۋ بارىسىندا, سول سياقتى تۇرعىندارمەن كەزدەسۋدە دە الەۋمەتتىك نىساندار سالۋ ماسەلەسى كوتەرىلەدى. كولەم بويىنشا قازىرگى دەڭگەيدى ساقتاپ قانا قويماي الەۋمەتتىك نىسانداردىڭ سانىن دا ارتتىرامىز. ماسەلەن, الداعى وقۋ جىلىنا 13 مەكتەپ سالۋدى جوسپارلاپ وتىرمىز. بۇدان بولەك, مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا 100 مىڭ وقۋشى ورنىنا (2 اۋىسىمدى) ارنالعان 25 ءىرى مەكتەپتى جوبالاۋ جۇمىسى باستالدى. جاڭا فورماتتاعى ءبىلىم وردالارىنىڭ قۇرىلىسىن 2023 جىلى باستايمىز», دەلىنگەن جازبادا.

سول سياقتى كەلەر جىلى جەكەمەنشىك بالاباقشالارعا ارناپ 9 مىڭ ورىنعا ارنالعان قوسىمشا مەملەكەتتىك تاپسىرىس بەرىلەتىنى جازىلعان. ول ارقىلى بالالاردى مەكتەپكە دەيىنگى تاربيەمەن قامتۋدى ارتتىرۋعا بولادى.

«بۇگىن قارقىندى دامىپ كەلە جاتقان اۋداندا №98 «ميراس» مەملەكەتتىك بالاباقشاسى اشىلدى. (ەسىل اۋدانى, كۇلتەگىن كوش.). بالاباقشانىڭ سىيىمدىلىعى 300-گە جۋىق ورىندى قۇرايدى. مۇندا ويىن جانە مۋزىكا بولمەلەرىنەن بولەك پەدياتر, لوگوپەد, پسيحولوگ كابينەتتەرى, سونداي-اق ەمدەۋ كابينەتى قاراستىرىلعان مەديتسينالىق كابينەت بار. بۇل مەكەمەدە ينكليۋزيۆتى ءبىلىم بەرۋگە دە جاعداي جاسالعان. بالاباقشا 2023 جىلدىڭ قاڭتارىنان باستاپ تولىق جۇمىس ىستەيتىن بولادى», دەپ جازدى جەڭىس قاسىمبەك.