جەمقورلىققا قارسى كۇرەس ورداسى

قارجى پوليتسياسى اگەنتتىگىنىڭ 20 جىلدىعى مەن قارجى پوليتسياسى اكادەمياسىنىڭ 15 جىلدىعى قارساڭىندا «ەگەمەن قازاقستان» گازەتى ۇيىمداستىرعان دوڭگەلەك ۇستەل مىنە, ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگىنىڭ قۇرىلعانىنا دا 20 جىل تولدى. وسى جىلدار ىشىندە قارجى پوليتسياسىنىڭ تالاي اۋقىمدى, نەبىر ماڭىزدى ىستەردى جۇزەگە اسىرعانىن جۇرت تا جاقسى بىلەدى. سونداي ىرگەلى جۇمىستاردىڭ ارقاسىندا ءبىزدىڭ ەلىمىزدە سىبايلاس جەمقورلىقتىڭ دەڭگەيى جىلدان-جىلعا تومەندەي تۇسۋدە. سوناۋ تاۋەلسىزدىگىمىزدى تۋ ەتىپ تىككەن كەزدە-اق تمد ەلدەرى اراسىندا ءبىرىنشى بولىپ قازاقستاندا سىبايلاس جەمقورلىققا قارسى زاڭ قابىلداندى. ەلباسىمىزدىڭ سارا ساياساتىنىڭ ارقاسىندا ەكونوميكالىق قىلمىستارعا قارسى كۇرەس جۇرگىزە الاتىن مامانداردى وقىتۋ, دايارلاۋ جۇمىستارى جۇرگىزىلدى. سونىڭ ءبىرى رەتىندە اتالعان اگەنتتىك جانىنان قارجى پوليتسياسى اكادەمياسى اشىلدى. ويتكەنى, بىلىكتى دە بىلەكتى ماماندارسىز قاۋىپتى كەسەلمەن كۇرەسۋ وڭاي ەمەس ەكەنى بەلگىلى. ەندى بۇگىندە قارجى پوليتسياسى اكادەمياسى ماتەريالدىق-تەحنيكالىق بازاسى زاماناۋي, جوعارى عىلىمي الەۋەتى بار بىلىكتى كاسىبي وقىتۋشى-پروفەسسورلىق قۇراممەن جاساقتالعان, جاھاندىق ءبىلىم بەرۋ ورتاسىندا باسەكەلەستىككە دايىن وقۋ ورداسىنىڭ بىرەگەيى دەسەك, ارتىق ايتقاندىق ەمەس. ءبىز وسى ورايدا «قارجى پوليتسياسىنانمىن» دەسە سىبايلاستاردىڭ دەگبىرىن قاشىراتىن, جۇرەك جۇتقان مامانداردى دايارلاپ جاتقان قارجى پوليتسياسى اكادەمياسىنداعى باسشىلىق جانە وقىتۋشىلىق قۇراممەن كەزدەسىپ, «قارجى پوليتسياسى اكادەمياسى – قازاقستانداعى سىبايلاس جەمقورلىققا قارسى مامان دايارلايتىن بىردەن-ءبىر ءبىلىم بەرۋ ورتالىعى» اتتى دوڭگەلەك ۇستەل وتكىزۋگە مۇرىندىق بولعان ەدىك. وعان قارجى پوليتسياسى اكادەمياسىنىڭ باسشىسى, زاڭ عىلىمدارىنىڭ دوكتورى, پروفەسسور سارقىتبەك مولداباەۆ, اكادەميا باستىعىنىڭ عىلىم جانە حالىقارالىق ىنتىماقتاستىق جونىندەگى ورىنباسارى قارجى پوليتسياسىنىڭ پودپولكوۆنيگى, فيلوسوفيا عىلىمدارىنىڭ كانديداتى سۆەتلانا ارىستامباەۆا, كۇندىزگى ءبىلىم بەرۋ فاكۋلتەتىنىڭ باستىعى ماناربەك بايمۇرزين, تاربيە جۇمىسى ءبولىمىنىڭ باستىعى, قارجى پوليتسياسىنىڭ پودپولكوۆنيگى, پسيحولوگيا عىلىمدارىنىڭ كانديداتى زامزاگۇل شاحارباەۆا, كۋرس باستىعى, قارجى پوليتسياسىنىڭ اعا لەيتەنانتى سەرعازى جاقجانوۆ جانە اكادەميا تىڭداۋشىلارى, ياعني ماگيسترانت اننا پولنيكوۆا مەن دوكتورانت ەربول وماروۆ قاتىستى. تومەندە ولاردىڭ «ەگەمەن قازاقستان» گازەتى ءتىلشىسىنىڭ  قويعان سۇراقتارىنا قايتارعان جاۋاپتارىن ۇسىنىپ وتىرمىز. – سارقىتبەك سارسەم­باي ۇلى, اكادەميانىڭ ءبىلىم بەرۋ ساپاسى مەن بولاشاق جوس­پارى تۋرالى ايتساڭىز. – قازاقستاندى الەمنىڭ 30 دامىعان ەلىنىڭ قاتارىنا قوسۋ بولىپ تابىلاتىن «قازاقستان – 2050» ستراتەگياسى, ەڭ الدىمەن, جوعارى ءبىلىم بەرۋ ساپاسىن ارتتىرۋدى تالاپ ەتەدى. ءبىز وسى ايتىلعانداردىڭ نەگىزىندە شۆەد پوليتسياسىن رەفورمالاۋ بويىنشا تاجىريبەسى بار شۆەدتىك «Enhancer» كومپانياسىمەن بىرلەسە وتىرىپ, قۇرىلىمدانعان جۇيە تەو­رياسى نەگىزىندە اكادەميانىڭ ۇيىمداستىرۋشىلىق قۇرىلىمىنا تالداۋ جاسادىق. تالداۋ ناتيجەسى قىزمەتكەرلەردىڭ اتقارىپ وتىرعان لاۋازىمدارىندا جۇمىس ىستەۋ قابىلەتى, سونىمەن قاتار, اكادەميانىڭ قۇرىلىمى مەن قۇرامى قازىرگى تالاپتارعا سايكەستىگى جانە لاۋازىمداردىڭ قۇرىلىمدىق ساپاسىن كورسەتتى. بىرىككەن زەرتتەۋ ناتيجەسى بويىنشا وقۋ جانە تاربيە نەگىزىن, عىلىمي زەرتتەۋدى جەتىلدىرۋ جانە ماتەريالدىق-تەحنيكالىق بازانى جاقسارتۋ بويىنشا ۇسىنىس ازىرلەندى. ءبىلىم بەرۋ ساپاسىن قاجەتتى دەڭگەيگە جەتكىزۋ ءۇشىن اكادەميادا مەنەدجمەنت جانە ساپا جۇيەسىن (مسج) ەندىرۋ باعدارلاماسى ساتىلى قولدانىسقا جىبەرىلدى. مسج ازىرلەۋ جانە ەندىرۋ «Human Capital Management & Competence Center» جشس بىرىگە جۇزەگە اسىرىلۋدا. اكادەميا باستىعىنىڭ بۇيرىعىمەن ساپا بويىنشا باسشى وكىل (مسج ەندىرۋ بويىنشا جانە ونىڭ جۇمىس ىستەۋ جاعدايىن قاداعالايتىن) – اكادەميا باستىعىنىڭ ورىنباسارى تاعايىندالدى, ءبىلىم بەرۋ قىزمەتى ۇدەرىسىن بىلەتىن, قۇرامىنا جوو-نىڭ ۇزدىك قىزمەتكەرلەرى ەنگەن ۇيلەستىرۋ ورگانى – جۇمىس توبى قۇرىلدى. وقۋ ۇدەرىسىنە يننوۆاتسيالىق جانە اقپاراتتىق تەحنولوگيانى بەلسەندى ەندىرۋ ءبىلىم بەرۋ ساپاسىن ارتتىرۋدىڭ ءبىر ءۇردىسى بولىپ تابىلادى. وسى ماقساتتا 2013 جىلى بۇگىنگى كۇنى قويىلعان مىندەتتەردى ناتيجەلى اتقارىپ جاتقان, اقپاراتتىق-تەحنيكالىق قولداۋ توبى جانە يننوۆاتسيالىق تەحنولوگيا ءبولىمى قۇرىلدى. اكادەميادا وتكەن جىلدان بەرى اۆتو­ماتتاندىرىلعان اقپاراتتىق جۇيە «Platonus» (ايس «Platonus») – تىڭداۋشىلاردى اكىمشىلىكتەندىرۋ وقۋ ۇدەرىسىن قولدانۋ جانە قاشىقتىقتان وقىتۋ, ەلەكتروندى قۇجات اينالىمىنىڭ بىرىككەن جۇيەسى, تىڭداۋشىلاردى وقىتۋدا باقىلاۋ جانە ەسەپ جۇرگىزۋ ساپاسىن ارتتىرۋعا ىقپال ەتەتىن وقىتۋدىڭ اۆتوماتتاندىرۋ «ءۇش كيت» كرەديتتىك جۇيەسىن قوساتىن ءبىلىم بەرۋ پورتالى ەنگىزىلدى. بۇگىندە اكادەميانىڭ اقپاراتتىق سايتى (www.ademfinpol.kz), سىمسىز بايلانىس نەگىزىندەگى ينتەرنەت قىزمەتى wi-fi ءى, بۇقارالىق اقپارات قۇرالدارىنا شولۋ, قازاقستاندىق ۆيرتۋالدى عىلىمي كىتاپحانا سەكىلدى (قۆعك) جاڭالىقتارعا قولجەتىمدى جاعدايدا. سونىمەن قاتار, اكادەميا Oxford University Press ەلەكتروندى رەسۋرستارىنىڭ تەگىن تەستىنە, Web of Knowledge (Thomson reuters) ەلەكتروندى رەسۋرسىنىڭ مالىمەتتەر بازاسىنا تولىق ماتىندىك قول جەتكىزدى. قازىرگى ۋاقىتتا قارجى پوليتسياسى اكادەمياسىنىڭ ۇجىمى حالىقارالىق اككرەديتاتسيادان وتۋگە دايىندىق جۇمىسىن جۇرگىزۋدە. اكادەميا ەلىمىزدەگى جوعارى وقۋ ورىندارىندا جەمقورلىققا قارسى كەڭەس قۇرۋ بويىنشا ۇسىنىس تاس­تاپ جانە ونىڭ تۇجىرىمداماسىن جاسادى. بۇگىن ءبىزدىڭ بۇل ۇسىنىسىمىز ءبىلىم جانە عىلىم مينيسترلىگى تاراپىنان تولىق قولداۋ تاۋىپ, ونى جۇزەگە اسىرۋ بويىنشا شەشىم قابىلداندى. بۇدان باسقا قارجى پوليتسياسى اكادەمياسى جانىنداعى «جەمقورلىققا قارسى باستاما» ءبىلىم بەرۋ-كورمە كەشەنىنىڭ تۇجىرىمداماسىن ازىرلەدى. جوبانىڭ ماقساتى – جەمقورلىققا قارسى تەحنولوگيالار مەن باستامالاردى ۇسىنۋ جانە كورسەتۋ الاڭىن جاساۋ. وسى جىلدىڭ باسىنان بەرى قارجى پوليتسياسى اكادەمياسى جانىنان قۇرىلعان «جەمقورلىققا قارسى مەكتەپ» ءبىلىم بەرۋ سالاسى قىزمەتكەرلەرى ءۇشىن جۇمىس جاسايدى. – سۆەتلانا اندرەەۆنا, ءسىز وسى قارجى پوليتسيا­سى اكادەمياسى قۇرىلعاننان بەرى جۇمىس ىستەپ كەلەسىز. جوعارى وقۋ ورنىنىڭ قۇرىلۋى مەن دامۋى جولىندا قانداي كەدەرگىلەر بولدى جانە ءسىزدىڭ ويىڭىزشا ۇجىم قازىر قانداي دەڭگەيگە جەتتى؟ – ارينە, مۇنداي وقۋ ورداسىنىڭ اشىلۋى مەن قىزمەتىن جالعاستىرۋ بارىسىندا بىرقاتار اياقتان شالار كەدەرگىلەردىڭ بولعانى راس. دەگەنمەن, اكادەميانى قۇرىلعاننان بەرى ونى بىرنەشە تالانتتى باسشىلار باسقارىپ وتىردى. ولاردىڭ ارقايسىسى اكادەميانىڭ دامىپ, گۇلدەنۋىنە ءوز ۇلەستەرىن قوستى, ارقايسىسىنىڭ وزىنشە ۇيىمداستىرۋ جولى بولدى. ءبىرى – عىلىمي-زەرتتەۋ جۇمىسىن دامىتتى, ءبىرى – اكادەميا قىزمەتىن تانىتۋ باعىتىندا جۇمىس ىستەدى. ەندى ءبىرى رۋحاني دۇنيەگە, ءدىني تولەرانتتىلىققا ەرەكشە ءمان بەردى. ماسەلەن, بۇگىنگى باسشى سارقىتبەك سارسەنباي ۇلىنىڭ ولاردان ەرەكشەلىگى, ول – اكادەميانىڭ ءاربىر ءبىلىم الۋشىسى مەن قىزمەتكەرىنىڭ دامۋ الەۋەتىنە كەشەندى ۇيىمداستىرۋشىلىقپەن قارايدى. ەڭ الدىمەن اتقارىلىپ جاتقان جۇمىستىڭ اشىق كورسەتىلۋى, اتقارىلار جۇمىسقا جەكە جاۋاپكەرشىلىك قاعيداتىمەن قاراۋ سياقتى تالاپتاردى ايتا كەتكىم كەلەدى. بۇگىنگى جۇرگىزىلىپ جاتقان رەفورمالاردىڭ ارقاسىندا اكادەميا زاماناۋي Iت تەحنولوگيالاردى قولدانۋعا كوشتى. ەسجكا باسشىلارىنىڭ قولداۋىمەن اكادەميا جوسپارلى تۇردە ەسكى ۇيىمداستىرۋ تەحنيكاسى پاركىن اۋىستىرۋدا, زاماناۋي باعدارلامالىق قامتاماسىز ەتۋ جۇيەلەرىن ساتىپ الۋ جولعا قويىلعان جانە ستاندارتقا اينالعان ءبىلىم بەرۋ ادىستەرىن, سونىڭ ىشىندە قاشىقتىقتان وقىتۋ جۇمىسى جۇزەگە اسىرىلۋدا. ارىپتەستەرمەن بىرىگىپ, قارجى پوليتسيا­سى قىزمەتكەرلەرى ءۇشىن انىقتامالىق-اقپاراتتىق جۇيەلەردى ازىرلەۋ قولعا الىندى. ءبىر جىل ىشىندە قارجى پوليتسياسى اكادەمياسى ءوزىن تەك وقۋ ورنى رەتىندە عانا ەمەس, برەند رەتىندە, ياعني ەكونوميكالىق قىلمىسقا جانە سىبايلاس جەمقورلىققا قارسى كۇرەسكە ارنالعان مامانداردى شىعاراتىن وقۋ ورنى پوزيتسياسىنا تۇراقتاندى. بۇل برەند, سىبايلاس جەمقورلىققا قارسى كۇرەستە ءوزىن كورسەتتى. ءبىزدىڭ سىبايلاس جەمقورلىققا قارسى عىلىمي-تانىمال ەڭبەكتەرىمىزبەن ءبىلىم جانە عىلىم مينيسترلىگى مەن ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى ەسەپ بەرەدى. بۇل برەندتىڭ سىرتىندا مۇعالىمدەر مەن عالىمداردىڭ, وقۋشىلار مەن قىزمەتكەرلەردىڭ ينتەللەكتى مەن شىعارماشىلىق كۇشى تۇر. – ماناربەك ساپاربەك ۇلى, اكادەميانىڭ سوڭعى شەشىم­دەرى وقۋ-ادىستەمەلىك قىزمەتكە قالاي اسەر ەتۋدە؟ – اكادەميانىڭ باستىعى ايتقانداي, «بىزدە پەداگوگتار از, ءبارى زاڭگەر», سوندىقتان ءبىز العاش رەت قىسقى دەم­الىس ۋاقىتىندا ءبىلىم جانە عىلىم مينيسترلىگى وكىلدەرىنىڭ قاتىسۋىمەن پروفەسسورلىق-وقىتۋشىلىق قۇرامنىڭ وقۋ-ادىستەمەلىك جيىنىن وتكىزدىك. اتالعان جيىننىڭ اياسىندا بىلىكتىلىكتى ارتتىرۋ كۋرستارى, تاجىريبەمەن الماسۋ, ەسەپكە الۋ جانە ۆەدومستۆولىق وقۋدى جاقسارتۋ تۋرالى ۇسىنىمدار دايىندالدى. بۇدان باسقا, بىزدە تۇراقتى تۇردە «پەداگوگيكالىق شەبەرلىك مەكتەبى» قىزمەت اتقارادى. يننوۆاتسيالىق وقىتۋدىڭ تۇرلەرىنە ەرەكشە نازار اۋدارىلادى, ەگەر بىلتىر تەك ءۇش-ءتورت مۇعالىم ينتەراكتيۆتى تاقتانى قولدانا السا, قازىرگى تاڭدا مۇنداي داعدى ءاربىر مۇعالىمدە بار. سوڭعى جىلى اكادەميانىڭ الىس-جاقىن شەتەلدەردىڭ عىلىم جانە ءبىلىم ورتالىقتارىمەن قارىم-قاتىناسى ناتيجەسىندە قىزمەتكەرلەردىڭ الەۋەتى ءبىرشاما ارتتى. مىسالى, سالىقتىق جانە قارجىلىق زەرتتەۋلەر بويىنشا حالىقارالىق ساراپشى-كريميناليستەردى شاقىرۋ, قارجىلىق جانە اۋديتورلىق ەسەپ بەرۋدىڭ حالىقارالىق ستاندارتتارىنا سايكەس وقۋ باعدارلامالاردى جاڭارتۋ جانە بەيىمدەۋدىڭ اياسىندا اكادەميا ۇلكەن تورتتىكتىڭ «دەلويت جانە تۋش» وكىلدەرىمەن قىزمەتكەرلەر بىلىكتىلىگىن ارتتىرۋ ماقساتىندا كەلىسسوز جۇرگىزەدى. سونىمەن قاتار, اعىمداعى جىلدا «پوليتسەيلىك دەونتولوگيا» جانە «اناليتيكالىق بارلاۋ» ارنايى كۋرستارى دايىندالدى جانە ماقۇلداندى. مۇنىڭ ءبارى, اكادەميا تىڭداۋشىلارىنىڭ الىپ جاتقان ءبىلىم دەڭگەيىن جانە وقۋ پروتسەسىنىڭ ساپاسىن جاقسارتاتىنى ءسوزسىز. – زامزاگۇل جولامانقىزى, ءسىز قارجى پوليتسياسى اكادە­مياسىنداعى تاربيە جانە سپورت جۇمىسىنىڭ جۇرگىزىلۋ بارىسىن قالاي باعالايسىز؟ – اكادەميانىڭ باسشىلىعى وتكەن جىلدان باستاپ تاربيە جۇمىسى ءبولىمىنىڭ قىزمەتىنە ەرەكشە نازار اۋدارۋدا, 2013-2016 جىلدارعا ارنالعان تاربيە جۇمىسى ءبولىمىنىڭ تۇجى­رىمداماسى مەن باعدار­لاماسى دايىندالدى جانە بەكىتىلدى, كىشى كومانديرلەر, كۋراتورلار, اتا-انالار كوميتەتىنىڭ كەڭەسى سياقتى قوعامدىق ۇيىمدارمەن جۇمىس جاقساردى. ءبىلىم بەرۋ پروتسەسىنەن باسقا سپورت سەكتسياسى, كوركەم-ونەرپاز ۇيىرمەلەرى: ۆوكال, حور, بي, «جەتى جارعى» عىلىمي-تەوريالىق ۇيىرمەسى, «سايىسكەر» دەبات كلۋبى, كوڭىلدىلەر مەن تاپقىرلار كلۋبى بەلسەندى جۇمىس ىستەپ كەلەدى. تىڭداۋشىلار استانالىق جوو سپارتاكياداسى باعدارلامالارىندا 17 سپورت ءتۇرى بويىنشا جارىستارعا, شاڭعى, سامبو, ۆولەيبول, جەڭىل اتلەتيكا, قارۋدان اتۋ, قويان-قولتىق ۇرىس, شاعىن فۋتبول, «پرەزيدەنتسكايا ميليا» جۇگىرۋ جارىسىنا قاتىسادى. مىسالى, وتكەن جىلى اكادەميا 40 سپورتتىق ءىس-شارا وتكىزدى, وندا 3 439 تىڭداۋشى قاتىستى. 58 حالىقارالىق, رەسپۋبليكالىق, وبلىستىق, قالالىق دەڭگەيدەگى جارىستارعا 455 تىڭداۋشى قاتىستى, 17 كۋبوك, 101 مەدال, 203 ديپلوم مەن گراموتا, 26 باعالى سىيلىق ۇتىپ الدى. – سەرعازى ايدارحان ۇلى, اكادەمياداعى ءتارتىپ جونىندە ايتا وتىرساڭىز. – اكادەميا باسشىلىعى تىڭداۋشىلاردىڭ ۇلگەرىمى, اسكەري-قىزمەتتىك ءتارتىبى, تۇرمىستىق جاعدايلارىنىڭ دەڭگەيىن جاقسارتۋ بويىنشا شارالار كەشەنىن جۇزەگە اسىردى. سونىمەن قاتار, جاڭا وقۋ جىلىنا وقۋ اۋديتوريالارى مەن جاتىن ورىندارىنا جوندەۋ جۇرگىزىلدى. تاعامنىڭ ساپاسىن ارتتىرۋدىڭ سىرى ونى باسەكەلەستىك ورتاسىنا بەرۋ بولدى جانە قازىرگى تاڭدا اس ءمازىرىن قۇرۋدا تىڭداۋشىلاردىڭ جانە كەزەكشى وفيتسەرلەردىڭ بارلىق تىلەكتەرى ەسكەرىلەدى, وسىلايشا بەرىلەتىن تاماق قۇرامى جاقساردى. اكادەميا باسشىلىعى ءار كۋرستىڭ كۋرس زۆەنوسىنا كۋرس باستىعىنىڭ وقۋ ءىسى جونىندەگى ورىنباسارى رەتىندە قوسىمشا ورىن ءبولىندى. كىشى كومانديرلەردىڭ ينستيتۋتتارىنا جاڭا كومانديرلەردىڭ قىزمەتتەرى ەنگىزىلدى. وسىنىڭ ءبارى مامانداردى دايىنداۋدىڭ ساپاسىن ارتتىرۋ مەن وقۋ ءۇردىسىن ءتيىمدى قامتاماسىز ەتۋگە كومەكتەسەدى. ءار كۋرستا قوسىمشا وفيتسەردىڭ پايدا بولۋىمەن جالپى اسكەري-قىزمەتتىك ءتارتىپ, تىڭداۋشىلاردىڭ وزىندىك دايىندىعى قاداعالانىپ, وقۋدىڭ ناتيجەسىنەن وڭ كورىنىس تابۋدا. تالداۋ كورسەتكەندەي, عىلىمي-زەرتتەۋ جۇمىسىنا قاتىساتىن تىڭداۋشىلاردىڭ (ولار ءتۇرلى عىلىمي-پراكتيكالىق كونفەرەنتسيالاردىڭ جۇلدەگەرلەرى مەن جەڭىمپازدارى) سانى ارتتى. قابىلدانعان ءىس-شارالار ناتيجەسىن سارالاي وتىرىپ تىڭداۋشىلار ۇلگەرىمىنىڭ, اسكەري-قىزمەتتىك ءتارتىبىنىڭ, عىلىمي-زەرتتەۋ جۇمىسى كورسەتكىشتەرىنىڭ ءارى قارايعى جەتىلۋىن بولجاۋعا بولادى. –  اننا اندرەەۆنا, وقۋ ورنىنداعى سوڭعى ۋاقىتتا وتكەن رەفورمالارعا سايكەس, قارجى پوليتسياسى اكادەمياسى, ءسىزدىڭ پىكىرىڭىزشە, قانشالىقتى پەرسپەكتيۆالى دەپ ويلايسىز؟ – قارجى پوليتسياسى اكادەمياسى – قارجى پوليتسياسى ورگاندارىنداعى قىزمەت ءوتىلىنىڭ جالعاسۋىمەن ءبىلىم العىسى كەلەتىن ادامنىڭ دۇرىس  تاڭداعان ءبىلىم بەرۋ ورنى. قازىرگى ۋاقىتتا ءبىلىم الۋشىلارعا ءبىلىم مەن عىلىم جۇمىستارىن ءساتتى جالعاستىرۋ ءۇشىن بارلىق جاعداي جاسالعان. اكادەميا باسشىلىعىنىڭ باس­تاماسى بويىنشا ءبىلىم جانە عىلىم مينيسترلىگىنىڭ بۇيرىعىمەن بۇرىن بولماعان PhD دوكتورلىق ديسسەرتاتسيالاردى قورعاۋ بويىنشا ديسسەرتاتسيالىق كەڭەس اشىلدى. 2006 جىلدان بەرى العاش رەت اكادەميا ماگيسترانتتارى مەن دوكتورانتتارىنىڭ شەتەلدىك عىلىمي تاعىلىمدامادان ءوتۋدى قارجىلاندىرۋ تۋرالى ماسەلە شەشىمىن تاپتى. اعىمداعى جىلدىڭ ماۋسىم ايىندا ماگيسترانتتار مەن دوكتورانتتاردىڭ عىلىمي تاعىلىمدامادان ءوتۋ ءۇشىن چەح رەسپۋبليكاسىنا بارۋى قامتاماسىز ەتىلدى. – ەربول اعباي ۇلى, اتالعان قارجى اكادەميا­سىنىڭ باسقا جوو-لاردان ايىرماشى­لىعى بار ما؟ بار بولسا, قانداي؟ – اكادەميانىڭ قازاقستان­نىڭ باسقا جوو-دان باستى نەگىزگى ايىرماسى – وندا  وقۋشى­لاردىڭ ءبىلىم الۋىنا وڭ اسەر ەتەتىن جوعارى تەوريالىق ءجا­نە پراكتيكالىق بىلىمدەرى تە­رەڭ, ساپالى پروفەسسورلىق-وقىتۋشىلىق قۇرامنىڭ بولۋى. اكادەميادا ءبىلىم الۋ قازاقستان رەسپۋبليكاسى زاڭدىلىعىنىڭ دامۋىنا جانە قىلمىستىلىقپەن كۇرەسۋدىڭ تيىمدىلىگىن ارتتىرۋعا ۇلكەن ۇلەس قوساتىن قۇقىق قولدانۋ تاجىريبەسى ماسەلەلەرىن عىلىمي زەرتتەۋگە مۇمكىندىك بەرەدى. سوڭعى كەزدەرى وقۋ قيىن بولعانىمەن, بىزگە اكادەميادا وقىعان كوڭىلىمىزدەن شىعادى. تالاپتار مەن جاۋاپتىلىق ارتتى. اكادەميانىڭ باسشىلىعىنا ءبىلىم الۋدىڭ جاقسى جاعدايلارى مەن ساپالى ءبىلىم الۋ مۇمكىندىگى ءۇشىن العىس بىلدىرگىمىز كەلەدى. وسى قالىپتان تايماۋدى تىلەيمىن! دوڭگەلەك ۇستەلدەگى اڭگىمەنى جازىپ العان الەكساندر تاسبولاتوۆ, «ەگەمەن قازاقستان».