Fitch حالىقارالىق رەيتينگ اگەنتتىگى قازاقستاننىڭ تاۋەلسىز كرەديتتىك رەيتينگىن «BBB» دەڭگەيىندە, «تۇراقتى» بولجامىمەن راستادى. ەلىمىزدىڭ رەيتينگىن قولدايتىن نەگىزگى فاكتورلار – قۋاتتى فيسكالدىق جانە سىرتقى تەڭگەرىمدەر. اگەنتتىك ساراپشىلارىنىڭ پىكىرىنە قاراعاندا, ولار سىرتقى كۇيزەلىستەرگە تۇراقتىلىعىن دالەلدەدى. سونداي-اق ءىرى فيسكالدى بۋفەرلەر سىرتقى تازا كرەديتور مارتەبەسىن ساقتاۋعا مۇمكىندىك بەرگەن.
ۇلتتىق ەكونوميكا مينيسترلىگىنىڭ حابارلاۋىنشا, تازا شەتەلدىك اكتيۆتەر بويىنشا قازاقستانعا جوعارى تاۋەلسىز پوزيتسيا بەرىلدى, ول 2021 جىلدىڭ سوڭىندا ىشكى جالپى ءونىمنىڭ 37 پايىزىن قۇرادى. Fitch ەسەبىندە اتاپ وتىلگەندەي, قازاقستاندىق بانك سەكتورىنىڭ كاپيتال قورى جەتكىلىكتى دەڭگەيدە. 2022 جىلعى III توقسانداعى جاعداي بويىنشا جۇمىس ىستەمەيتىن كرەديتتەردىڭ كوەففيتسيەنتى 4,6 پايىز بولدى.
ساراپشىلاردىڭ پىكىرىنە زەر سالساق, ۇلتتىق ۆاليۋتاداعى سالىمدار بويىنشا جوعارى پايىزدىق مولشەرلەمەلەر جانە باسقا دا بىرقاتار شارالار دەپوزيتتەردە قاراجاتتى ساقتاپ قالۋعا مۇمكىندىك بەردى. جاقىندا رەيتينگتىڭ نەگىزگى فاكتورلارىنىڭ قاتارىنا ESG كورسەتكىشتەرى قوسىلدى.
«نەسيە بەرۋشىلەردىڭ قۇقىقتارى» ينديكاتورى بويىنشا 20 جىلدان استام ۋاقىت بويى مەملەكەتتىك بورىشتى قايتا قۇرىلىمداۋعا جول بەرمەۋ قازاقستاننىڭ كرەديتتىك قورجىنىنا وڭ اسەر ەتۋدە», دەلىنگەن Fitch ەسەبىندە.