مەملەكەت باسشىسى قاسىم-جومارت توقاەۆتىڭ سالتاناتتى ۇلىقتاۋ راسىمىندە سويلەگەن ءسوزىن استانا تورىندەگى تاۋەلسىزدىك سارايىندا وتىرىپ تىڭدادىم. تاريحي ساتتەن تۇيگەندەرىم كوپ. سونىڭ ىشىندە, ەل پرەزيدەنتىنىڭ كادرلىق ساياسات توڭىرەگىندە ايتقاندارى كوڭىلگە قوندى.
كادر ماسەلەسى – وتە كۇردەلى ءارى اسا ماڭىزدى. ەسكى كادرلارمەن جاڭا قازاقستان قۇرۋ مۇمكىن ەمەس ەكەنىن ەل ءبىلىپ وتىر. ارينە, ەلدىڭ باسقارۋ جۇيەسىنە ءبىر مەزەتتە «ساياسي تازالاۋ» جاساۋ مۇمكىن ەمەس. دەيتۇرعانمەن, بۇل سالادا سەڭ ورنىنان قوزعالدى.
حالىق سەنىمسىزدىك تانىتىپ وتىرعان مەملەكەتتىك جۇيە ءدال سول ەسكى كادرلار تۇسىندا قالىپتاستى. ال ەسكى ساياساتكەرلەر ەسكى جۇيەنى تاڭدايدى. سەبەبى بۇل وزدەرىنىڭ ساياسي ومىرلەرىن ۇزارتۋعا مۇمكىندىك بەرەدى. ونسىز دا, ەلدەگى جاڭا باستامالاردى ومىرشەڭ ەتۋگە ءتيىس كوماندا ءالى دە وتكەن كۇننىڭ سارقىنشاعى. بۇل – ءبىر.
ەكىنشىدەن, كادرلىق ساياساتتا كوماندالىق اۋىس-ءتۇيىس, تامىر-تانىستىق, ءتىپتى رۋشىلدىق «جاناشىرلىقتار» ءالى دە بار. ساياسي ساحنالاردا بەلەڭ الىپ جاتاتىن بۇل جايسىزدىقتاردى دا ءتۇپ-تامىرىمەن جوياتىن ۋاقىت جەتتى. سەبەبى جۇرەگى «قازاق» دەپ سوعاتىن, ىسكەر, بىلىكتى, ءبىلىمدى تالاي جاس ازاماتتار ساناتقا ىلىكپەي كەلەدى.
مۇندايدان ارىلۋ ءۇشىن مەريتوكراتيا ۇعىمى ەنگىزىلگەنىن بىلەمىز. مۇنى ۇلىقتاۋ راسىمىندە سويلەگەن سوزىندە ەل پرەزيدەنتى دە اتاپ ءوتتى. بۇل باستاما تامىر-تانىستىقتى جويىپ, قىزمەتتەگى ساتىلى ءوسۋ قاعيداتى جاقسى كادرلار مەن تاجىريبەسى مول مامانداردىڭ ەل باسقارۋ ىسىنە ارالاسۋىنا مۇمكىندىك بەرۋگە ءتيىس.
قاسىم-جومارت كەمەل ۇلى بارلىق مەملەكەتتىك قىزمەتشىدەن ءوز جۇمىسىن ادال اتقارۋدى تالاپ ەتەتىنىن باسا ايتتى. باستى قاعيداتى كاسىبيلىك, ادالدىق جانە قاراپايىمدىلىق بولاتىن مەملەكەتتىك باسقارۋشىلارعا, اسىرەسە, جاس ماماندارعا باسىمدىق بەرىلمەك. باستاما باسقارۋ جۇيەسىنىڭ بارلىق ساتىسىندا, وڭىرلەردە تابىستى جۇزەگە اسسا دەگەن تىلەگىمىز بار.
دانيار ءجۇمادىل,
«Jebe» قوعامدىق بىرلەستىگىنىڭ توراعاسى
پاۆلودار وبلىسى