جىلدىڭ العاشقى توقسانىندا قازاقستان ەكونوميكاسى تۇراقتى ءوسىم كورسەتىپ, نەگىزگى درايۆەرلەر رەتىندە قۇرىلىس, كولىك جانە وڭدەۋ ونەركاسىبى العا شىقتى. ۇلتتىق ەكونوميكا مينيسترلىگىنىڭ دەرەكتەرىنە سايكەس, قاڭتار − ناۋرىز ايلارىندا ءىجو-ءنىڭ ناقتى ءوسىمى 3% بولدى, دەپ حابارلايدى Egemen.kz.
ۇكىمەت وتىرىسىندا بايانداما جاساعان ازامات ءامرين مالىمەتىنشە, قىزمەت كورسەتۋ سالاسى 3,7%-عا وسسە, ناقتى سەكتورداعى ءوسىم 2,1%-دى قۇرادى. بۇل ەكونوميكانىڭ ءارتاراپتى دامىپ كەلە جاتقانىن اڭعارتادى.
سالالار بولىنىسىندە ەڭ جوعارى ءوسىم قۇرىلىس – 14,8%, كولىك قىزمەتتەرى – 12,8% جانە وڭدەۋ ونەركاسىبى – 8,5% دەڭگەيىندە تىركەلدى. بۇل باعىتتارداعى قارقىن ەل ەكونوميكاسىنىڭ سەرپىندى دامۋىنا نەگىز بولىپ وتىر.
شيكىزاتتان دايىن ونىمگە: ەكونوميكانىڭ جاڭا مودەلى
سىرتقى ساۋدادا دا وڭ ءۇردىس ساقتالعان. جىلدىڭ العاشقى ەكى ايىندا تاۋار اينالىمى $21,7 ملرد-قا جەتىپ, ونىڭ ىشىندە 2,4 ملرد دوللار وڭ سالدو قالىپتاستى.
«وتكەن جىلى ەكونوميكاداعى وڭدەۋ ونەركاسىبىنىڭ ۇلەسى 12,7%-عا دەيىن ءوستى, وسىلايشا ەكىنشى جىل قاتارىنان تاۋ-كەن ونەركاسىبىنىڭ (2025 جىلى – 11,9%) دەڭگەيىنەن اسىپ ءتۇسىپ وتىر. ءىجو-دەگى مۇناي سەكتورىنىڭ ۇلەسى 2 ەسە قىسقاردى. 2010 جىلى ول 16,5% بولعان بولسا, 2024 جىلى 8,1%-عا دەيىن ءتۇستى. تۇراقتى دامۋدى قامتاماسىز ەتۋ ءۇشىن ەكونوميكانى ودان ءارى ارتاراپتاندىرۋعا باسا نازار اۋدارۋ قاجەت, بۇل «ورتاشا تابىس تۇزاعىنان» شىعۋعا مۇمكىندىك بەرەدى», دەدى ازامات ءامرين.
جالپى, وڭدەۋ سەكتورىن كۇشەيتۋ مەن ينفراقۇرىلىمدىق سالالاردى دامىتۋ ەكونوميكانىڭ ساپالى وسىمىنە جول اشىپ, ۇزاقمەرزىمدى تۇراقتىلىقتى قامتاماسىز ەتۋگە باعىتتالىپ وتىر.
ەل ەكونوميكاسىنا 3,5 ترلن تەڭگە ينۆەستيتسيا سالىندى