مەن وتكەن پرەزيدەنت سايلاۋى كەزىندە اقجايىق اۋدانى بويىنشا «Amanat» پارتياسىنىڭ شتاب جەتەكشىسى بولعان ەدىم. ناۋقان كەزىندە كوپتەگەن ەلدى مەكەندى ارالادىق, حالىقپەن جۇزدەستىك. سول كەزدە سايلاۋشىلار تاراپىنان كوپتەگەن ساۋال, ۇسىنىس, پىكىر ءتۇستى.
ارينە, اۋىل حالقى وڭىردەگى الەۋمەتتىك-تۇرمىستىق احۋالدىڭ بۇدان دا جاقسارعانىن قالايدى. ءبىزدىڭ اۋداندا ەلدى مەكەندەر تۇگەلگە جۋىق تابيعي گاز, تازا سۋ جەلىسىنە قوسىلعان, الايدا جول ماسەلەسى وتكىر اۋىلدار بار. سوندىقتان پرەزيدەنت قاسىم-جومارت توقاەۆتىڭ سايلاۋدان كەيىنگى العاشقى جارلىعى اۋىلدى دامىتۋ جونىندە بولعانىنا ەرەكشە قۋاندىم. مەملەكەت باسشىسىنىڭ بۇل ءسوزى تەك مەنى عانا ەمەس, ءدۇيىم حالىقتى قۋانتتى دەپ ويلايمىن. باتىس قازاقستان وبلىسىنان كەلگەن دەلەگاتسيا قۇرامىندا ەل پرەزيدەنتىن ۇلىقتاۋ راسىمىنە قاتىسىپ, تاريحي وقيعانىڭ ورتاسىندا بولعانىم – ءومىرىمنىڭ ەرەكشە بەلەسى بولدى.
ارتۋر ەرمۇحانوۆ,
«Amanat» پارتياسى اقجايىق اۋداندىق فيليالىنىڭ اتقارۋشى حاتشىسى
باتىس قازاقستان وبلىسى