*مىسىردا وتكەن پرەزيدەنتتىك سايلاۋدا بۇرىنعى قورعانىس ءمينيسترى, وتستاۆكاداعى گەنەرال ابدەل فاتتاح اس-سيسي جەڭىسكە جەتتى. «مۇسىلمان باۋىرلار» سايلاۋ قورىتىندىلارىن مويىندامايتىنىن مالىمدەدى. بىراق حالىقارالىق قوعامداستىق سايلاۋدىڭ بارلىق حالىقارالىق تالاپتارعا ساي وتكەنىن تانيتىنىن حابارلاپ ۇلگەردى.
*گەرمانيانىڭ ماينتس قالاسىندا 17-20 ماۋسىم كۇندەرى اۋە شابۋىلىنان قورعانىس سالاسى بويىنشا حالىقارالىق كونفەرەنتسيا وتەدى دەپ جوسپارلانعان. شارانى ۇيىمداستىرۋشىلار وعان قاتىسۋ تۋرالى رەسەيدىڭ تاپسىرىسىن قابىلداماي تاستادى. ءماسكەۋ مۇنى اتالعان سالاداعى ىنتىماقتاستىقتى توقتاتۋعا قادام دەپ باعالاپ وتىر.
*سەربيا مەن بوسنيا جانە گەرتسەگوۆيناداعى سۋ تاسقىنىنان سەربيادا 51 ادام, ال بوسنيا جانە گەرتسەگوۆينادا 24 ادام وپات بولعانى بەلگىلى بولىپ وتىر. بۇل ەلدەر تاريحىندا بۇرىن-سوڭدى بولىپ كورمەگەن تابيعات اپاتى اۋىل شارۋاشىلىعى سالاسىنا دا زور كەساپات اكەلدى. كەيبىر ەلدى مەكەندەر جەرمەن-جەكسەن بولدى. حالىققا ۇكىمەت تاراپىنان جاردەم كەرەك.
*رەسەيدە جاڭا سۇڭگۋىر قايىق سىناقتان وتكىزۋ ءۇشىن بالتىق تەڭىزىنە ءتۇسىرىلدى. «ۆارشاۆيانكا» دەپ اتالاتىن ديزەلدى-ەلەكترلى سۇڭگۋىر قايىق سىناقتان ءساتتى وتكەن جاعدايدا قارا تەڭىز فلوتىنا جىبەرىلمەكشى. ونىڭ سۋ بەتىندەگى جىلدامدىعى 20 ۋزەلدى, سۇڭگۋ تەرەڭدىگى 300 مەتردى, اۆتونومدى ءجۇزۋى 45 كۇندى قۇرايدى. ەكيپاجى – 52 ادام. سۋ استىنداعى سۋ سىيىمدىلىعى شامامەن 4000 توننا.
*تۇركيانىڭ كونستيتۋتسيالىق سوتى YouTube سايتىنا توسقاۋىل قويىلۋىن زاڭسىز دەپ تاپتى. كونستيتۋتسيالىق سوت بەينەحوستينگكە قولجەتىمدىلىكتى شەكتەۋ ازاماتتاردىڭ قۇقىن بۇزۋ دەپ سانايدى. ال توسقاۋىل قويۋدىڭ باستاماشىسى ەلدىڭ پرەمەر-ءمينيسترى رەجەپ تايىپ ەردوعان ەكەن. سايتتا تۇركيانىڭ جوعارى شەندى شەنەۋنىكتەرى سيرياداعى ءاسكەري وپەراتسيانى تالقىلاسا كەرەك.
*رەسەيدىڭ ماسكەۋ قالالىق سوتى ەرلى-زايىپتى ماگومەد جانە حاليمات راسۋلوۆتاردى سايكەسىنشە 18 جانە 12,5 جىلعا تۇرمەگە قاماۋ تۋرالى ۇكىم شىعاردى. ولارعا ماتۆەەۆ بازارىندا ءتارتىپ ساقشىسىنا شابۋىل جاسادى دەگەن ايىپ تاعىلىپتى. ەرلى-زايىپتىلار پوليتسيا 15 جاستاعى ءوسپىرىم قىزدى زورلاماق بولدى دەگەن كۇدىكپەن ۇستاماق بولعان ماگومەد ماگومەدوۆكە اراشا تۇسسە كەرەك.
*قىتايدا كوشەدەگى اجەتحانا سەپتيگىنە ءتۇسىپ كەتكەن ۇيالى تەلەفوندى الۋعا ارەكەت جاساعان ەكى ادام قازا تاۋىپ, تاعى تورتەۋى زارداپ شەككەن. بۇل وقيعا حەنان پروۆينتسياسىندا ورىن العان. قازا بولعاندار قالتافونىن ءتۇسىرىپ العان كەلىنشەكتىڭ كۇيەۋى مەن وعان جانۇشىرىپ كومەككە ۇمتىلعان اناسى كورىنەدى.
اقپارات اگەنتتىكتەرى ماتەريالدارى نەگىزىندە ازىرلەندى.