وبلىس ورتالىعىنداعى جاراقات بولىمشەسىنە كۇنىنە 60 ادام جۇگىنەدى. ولاردىڭ تەڭ جارتىسى – كوكتايعاقتان زارداپ شەككەندەر, دەپ حابارلايدى Egemen.kz.
اپتا ورتاسىندا جاۋعان جاڭبىردىڭ سوڭى ايازعا ۇلاسىپ, پاۆلوداردىڭ كوشەلەرىن كوك مۇز باستى. سالدارىنان قالادا جالتىر مۇزدا تايىپ جىعىلىپ, جاراقات الىپ جاتقاندار سانى ارتا تۇسكەن.
№2 قالالىق اۋرۋحانانىڭ جاراقات بولىمشەسىنە تاۋلىگىنە شامامەن 60 ادام جۇگىنەدى. ونىڭ تەڭ جارتىسى كوكتايعاققا بايلانىستى. سوڭعى بەس تاۋلىكتە جالپى سانى 150 ادام مەديتسينالىق كومەككە جۇگىنگەن. ال كەيىنگى ەكى كۇندە 50-دەن استام ادامدا سۇيەكتىڭ سىنۋى تىركەلگەن. ونىڭ التاۋى اۋرۋحاناعا جاتقىزىلدى.
«كوپ جاعدايدا ادامدار توبىق سۇيەگىنىڭ, قول سۇيەگىنىڭ سىنۋىمەن جانە بۋىن جاراقاتتارىمەن كەلەدى. بارلىعى دەرلىك كوشەدە تايىپ قۇلاعاندار. قابىلداۋعا كەلگەن كەزدە تەكسەرۋ جۇرگىزىلەدى. ەگەر سۇيەك سىنۋى انىقتالسا, ناۋقاس اۋرۋحاناعا جاتقىزىلادى. قاجەتتى ەم-دوم كورسەتىلەدى. ماسەلەن ەكى كۇن بۇرىن 1990 جىلى تۋعان قىز الماتى قالاسىنان تۋىستارىنا قوناققا كەلگەن. كوشەدە تايىپ قۇلاپ, ەكى توبىعىن سىندىرعان», دەيدى پاۆلودار قالالىق №1 اۋرۋحاناسىنىڭ تراۆماتولوگ-ورتوپەد دارىگەرى داۋرەن سماعۇلوۆ.