جەتىسۋ وبلىسىنىڭ پروكۋراتۋراسى «انتيفرود-ورتالىعى» ارقىلى قاراجاتتى قايتارۋ تاجىريبەسىن كەڭەيتىپ جاتىر, دەپ جازادى Egemen.kz.
جەتىسۋ وبلىسىندا ينتەرنەت-الاياقتىققا قارسى كۇرەستە تسيفرلىق قۇرالداردى قولدانۋ جۇيەلى تاسىلگە اينالۋدا. شوتتاردى بۇعاتتاۋ جانە اقشانى قايتارۋ بويىنشا كەزەكتى ءساتتى كەيس قاداعالاۋ ورگانى تاڭداعان ستراتەگيانىڭ تيىمدىلىگىن راستايدى.
وسى ستراتەگيانى ىسكە اسىرۋ اياسىندا قاراتال اۋدانىنىڭ پروكۋراتۋراسى ۇلتتىق بانكتىڭ «انتيفرود-ورتالىعى» پلاتفورماسى ارقىلى جەدەل ارەكەت ەتۋ الگوريتمىن ەنگىزۋدى جالعاستىردى. بۇل جۇمىستىڭ پراكتيكالىق ناتيجەسى – ءوڭىر تۇرعىنىنا 600 000 تەڭگە كولەمىندەگى قاراجاتتىڭ قايتارىلۋى بولدى. ساتتىلىكتىڭ باستى فاكتورى – الاياقتار ۇرلانعان اكتيۆتەردى تاراتىپ جىبەرۋگە تىرىسقان شوتتار تىزبەگىنىڭ قاس-قاعىم ساتتە بۇعاتتالۋى.
«اتالعان شارا قر قىلمىستىق كودەكسىنىڭ 190-بابى 3-بولىگى بويىنشا سوتقا دەيىنگى تەرگەپ-تەكسەرۋ بارىسىندا قولدانىلدى. «انتيفرود-ورتالىعى» جۇيەسىندە وقيعانى تىركەۋ ناقتى ۋاقىت رەجيمىندە اقشا قاراجاتى تۇسكەن بانكتىك شوتتاردى انىقتاۋعا جانە ولارعا دەر كەزىندە شەكتەۋ قويۋعا مۇمكىندىك بەردى», دەيدى قاراتال اۋدانىنىڭ پروكۋرورى, اعا ادىلەت كەڭەسشىسى قانات نۇحاەۆ.
جۇمىستىڭ تيىمدىلىگى ناقتى ساندارمەن راستالادى
2025 جىلى «انتيفرود-ورتالىق» باعدارلاماسى اياسىندا وبلىس پروكۋراتۋراسى 11,198 ملن تەڭگە سوماسىنا كۇدىكتى ترانزاكتسيالاردى بۇعاتتادى, ونىڭ 5,3 ملن تەڭگەسى زاڭدى يەلەرىنە قايتارىلدى, قالعان اكتيۆتەر بويىنشا جۇمىس جالعاسىپ جاتى.
جەتىسۋ وبلىسىنىڭ پروكۋراتۋراسى ەسكەرتەدى
كيبەرقىلمىسپەن كۇرەستە ۋاقىت فاكتورى شەشۋشى ءرول اتقارادى. قۇقىق قورعاۋ ورگاندارىنا ۋاقتىلى جۇگىنۋ جانە ترانزاكتسيالار تۋرالى مالىمەتتەردى ۇسىنۋ – قاراجاتتى بۇعاتتاۋ مەن قايتارۋدىڭ جوعارى مۇمكىندىگىنە كەپىلدىك بەرەدى.ازاماتتاردىڭ قۇقىقتارىن قورعاۋ جانە ينتەرنەت-الاياقتىققا قارسى ءىس-قيمىل پروكۋراتۋرا ورگاندارىنىڭ قاداعالاۋ قىزمەتىندەگى باسىم مىندەتتەر بولىپ قالا بەرەدى.