قازاقستاندا جاۋىن-شاشىندى جاساندى كوبەيتۋ جوباسى ىسكە قوسىلدى

جوبا سۋ قويمالارىن تولىقتىرۋ دەڭگەيىن ارتتىرۋعا جانە ەلدىڭ وڭتۇستىگىندەگى اۋىل شارۋاشىلىعى اۋماقتارىن سۋ رەسۋرستارىمەن قامتاماسىز ەتۋگە باعىتتالعان. جوبانى تولىق اۋقىمدا ىسكە اسىرۋ 2026 جىلعى 17 مامىردا باستالادى.

تەحنولوگيا تۇركىستان وبلىسىنداعى جالپى كولەمى 911 مىڭ گەكتاردان اساتىن ەگىستىك جەرلەرگە اسەر ەتەتىن قۇرعاقشىلىق پەن سۋ تاپشىلىعىنىڭ سالدارىن ازايتۋعا ارنالعان. جوبا 1980-جىلداردىڭ سوڭىنان بەرى اۋا رايىن موديفيكاتسيالاۋ جانە جاۋىن-شاشىندى جاساندى تۇردە كوبەيتۋ سالاسىندا كوپجىلدىق تاجىريبەسى بار ءباا ۇلتتىق مەتەورولوگيا ورتالىعىمەن حالىقارالىق ىنتىماقتاستىق اياسىندا جۇزەگە اسىرىلىپ جاتىر.

قازاقستان جاساندى جاڭبىر تەحنولوگياسىن پايدالانعان العاشقى ەل بولماق

سالتاناتتى راسىمگە پرەمەر-ءمينيستردىڭ ورىنباسارى - جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, بۇۇ دۇنيەجۇزىلىك مەتەورولوگيالىق ۇيىمىنىڭ پرەزيدەنتى, ءباا ۇلتتىق مەتەورولوگيا ورتالىعىنىڭ باس ديرەكتورى ابدۋللا احمەد ءال-ماندۋس, ءباا-ءنىڭ قازاقستانداعى ەلشىسى مۇحامماد سايد مۇحامماد ءال-اريكي, سونداي-اق تۇركىستان وبلىسىنىڭ اكىمى نۇرالحان كوشەروۆ قاتىستى.

«كازاحستان كليماتتىق ورنىقتىلىقتىڭ جاڭا جۇيەسىن قالىپتاستىرۋعا باعىتتالعان پراكتيكالىق قادام جاساپ جاتىر. وڭىردە العاش رەت جاۋىن-شاشىندى جاساندى تۇردە كوبەيتۋ تەحنولوگيالارى سالاسىندا مۇنداي اۋقىمدى جوبا ىسكە قوسىلىپ جاتىر. ءبىز ءۇشىن بۇل − عىلىمعا, حالىقارالىق سەرىكتەستىككە جانە تسيفرلىق تەحنولوگيالارعا نەگىزدەلگەن زاماناۋي كليماتتىق ينفراقۇرىلىمدى قالىپتاستىرۋدىڭ باستاۋى. جوبا الەمدىك جەتەكشى ساراپشىلارمەن بىرلەسە جۇزەگە اسىرىلۋدا جانە تەحنولوگيالار ترانسفەرى مەن وتاندىق مامانداردى دايارلاۋدىڭ نەگىزىن قالايدى», دەپ اتاپ ءوتتى جاسلان ماديەۆ.

حالىقارالىق باعالاۋلارعا سايكەس, جاساندى جاڭبىر شاقىرۋ تەحنولوگيالارى تابيعي دەڭگەيمەن سالىستىرعاندا جاۋىن-شاشىن كولەمىن 10-20%-عا دەيىن ارتتىرا الادى. مۇنداي تەحنولوگيالار قىتاي, اقش, ءباا, فرانتسيا جانە ساۋد ارابياسىندا بەلسەندى تۇردە قولدانىلىپ كەلەدى.

جوبا سۋعا سۇرانىسى جوعارى اۋدانداردا, ەڭ الدىمەن اۋىل شارۋاشىلىعى اۋماقتارىندا جەرگىلىكتى دەڭگەيدە جۇزەگە اسىرىلادى. جۇمىس جۇرگىزىلەتىن ايماقتاردى تاڭداۋ مەتەورولوگيالىق قىزمەت ماماندارى مەن پروفيلدىك مەملەكەتتىك ورگانداردىڭ قاتىسۋىمەن اۋا رايى جاعدايىن, ەكولوگيالىق احۋالدى جانە سۋعا قاجەتتىلىكتى ەسكەرە وتىرىپ جۇرگىزىلەدى. تەحنولوگيانىڭ اسەر ەتۋ اۋماعى جەرگىلىكتى سيپاتقا يە جانە راديۋسى 5 شاقىرىمنان اسپايدى, سونداي-اق اۋقىمدى اۋا رايى قۇبىلىستارىن قالىپتاستىرۋمەن بايلانىستى ەمەس. جۇمىستاردى جۇرگىزۋ ءۇشىن حالىقارالىق تاجىريبەدە قولدانىلاتىن تۇز نەگىزىندەگى رەاگەنتتەر پايدالانىلادى.

جوبانى ىسكە اسىرۋ اۋىل شارۋاشىلىعى اۋماقتارىن سۋمەن قامتاماسىز ەتۋ تيىمدىلىگىن ارتتىرۋعا, قۇرعاقشىلىقتان كەلەتىن شىعىندى ازايتۋعا جانە ونىمدىلىكتىڭ ءوسۋىن قولداۋعا مۇمكىندىك بەرەدى دەپ كۇتىلەدى. الەۋەتتى ەكونوميكالىق تيىمدىلىك جىلىنا 35 ملرد تەڭگەگە دەيىن باعالانادى.

ىنتىماقتاستىق اياسىندا ءباا ۇلتتىق مەتەورولوگيا ورتالىعىنىڭ ماماندارى تۇركىستان وبلىسىنىڭ ماماندارىن اۋا رايىن موديفيكاتسيالاۋ تەحنولوگيالارىنا وقىتۋدى جۇرگىزىپ جاتىر. ولاردىڭ قاتارىندا مەتەورولوگتار, ۇشقىشتار, ينجەنەرلەر جانە سالالىق ماماندار بار. سونىمەن قاتار تەحنولوگيانى قازاقستاننىڭ باسقا وڭىرلەرىندە كەڭەيتۋ مۇمكىندىگى قاراستىرىلىپ, وتاندىق كليماتتىق تەحنولوگيالاردى قالىپتاستىرۋدىڭ ىرگەلى نەگىزى قالانىپ جاتىر.

جوبانى ىسكە اسىرۋعا جاساندى ينتەللەكت جانە تسيفرلىق دامۋ مينيسترلىگى, سۋ رەسۋرستارى جانە يرريگاتسيا مينيسترلىگى, سىرتقى ىستەر مينيسترلىگى, مادەنيەت جانە اقپارات مينيسترلىگى, قورعانىس مينيسترلىگى, اۋىل شارۋاشىلىعى مينيسترلىگى, كولىك مينيسترلىگى, قارجى مينيسترلىگى, ەكولوگيا جانە تابيعي رەسۋرستار مينيسترلىگى, ەنەرگەتيكا مينيسترلىگى, توتەنشە جاعدايلار مينيسترلىگى, تۇركىستان وبلىسىنىڭ اكىمدىگى, ازاماتتىق اۆياتسيا كوميتەتى, كازاەروناۆيگاتسيا جانە «قازگيدرومەت» قاتىسىپ جاتىر.