پرەزيدەنت زەردەلى ۇلت قالىپتاستىرۋعا ارنالعان جارلىققا قول قويدى

پرەزيدەنت جارلىعىندا ادامي كاپيتالدى دامىتۋ, قوعامنىڭ زياتكەرلىك جانە مادەني الەۋەتىن نىعايتۋ, ءبىلىم بەرۋ, تاربيەلەۋ جانە وقۋ-اعارتۋ ءىسىنىڭ نەگىزگى ەلەمەنتى رەتىندە كىتاپ وقۋ مادەنيەتىن ناسيحاتتاۋ, زەردەلى ۇلت قالىپتاستىرۋ, سونداي-اق شىعارماشىل, جاسامپاز جانە باسەكەگە قابىلەتتى تۇلعانى دامىتۋ ءۇشىن جاعداي جاساۋ ماقساتىندا تومەندەگىلەردى قاۋلى ەتتى:

كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ; وقىرماندارعا ارنالعان زاماناۋي ينفراقۇرىلىمدى دامىتۋ: تسيفرلىق قۇرالداردى كەڭىنەن قولدانا وتىرىپ, جاڭا فورماتتاعى كىتاپحانالار, قوعامدىق كەڭىستىكتەر قۇرۋ; تۋىندىلارى جاس ۇرپاقتى قازاقستان رەسپۋبليكاسى كونستيتۋتسياسىنىڭ نەگىزگى قاعيداتتارى مەن ەرەجەلەرىن قۇرمەتتەۋ رۋحىندا تاربيەلەۋگە ىقپال ەتىپ جۇرگەن وتاندىق جازۋشىلار مەن اقىنداردى قولداۋ; باسپاگەرلەر مەن كىتاپ ءونىمىن تاراتۋشىلاردىڭ مەملەكەت ءۇشىن پايدالى قىزمەتتەرىن ىنتالاندىرۋ; ۇلتتىق ادەبي مۇرانى ەل ىشىندە جانە شەتەلدە ناسيحاتتاۋ.

ۇكىمەتكە جۇكتەلگەن تاپسىرمالار:

1) حالىقتىڭ ءارتۇرلى ساناتتارى, ونىڭ ىشىندە بالالار مەن جاستار اراسىندا كىتاپ وقۋ مادەنيەتىن دامىتۋ جانە كىتاپ وقۋدىڭ ورنىقتى داعدىلارىن قالىپتاستىرۋ جونىندەگى شارالار كەشەنىن ىسكە اسىرۋدى قامتاماسىز ەتسىن;

2) جاڭا فورماتتاعى كىتاپحانالار, كوپفۋنكتسيونالدى قوعامدىق كەڭىستىكتەر قۇرۋدى, زاماناۋي اقپاراتتىق جۇيەلەر مەن سەرۆيستەر ەندىرۋدى قوسا العاندا, وقىرمان ينفراقۇرىلىمىن جاڭعىرتۋدى قامتاماسىز ەتسىن;

3) ۇلتتىق ادەبي مۇرانى ەل ىشىندە جانە شەتەلدە ناسيحاتتاۋدى, ونىڭ ىشىندە تۋىندىلاردى ساپالى اۋدارۋ, باسىپ شىعارۋ, وقىرمانداردىڭ كەڭ اۋقىمدى اۋديتورياسىنا تاراتۋ ارقىلى قامتاماسىز ەتسىن;

4) 2026 جىلعى 1 قىركۇيەككە دەيىن «جىلدىڭ 10 وقىرمانى» رەسپۋبليكالىق جوباسىن ىسكە اسىرۋعا كىرىسسىن;

5) جاساندى ينتەللەكتىنى دامىتۋ جاعدايىندا 2026 جىلدىڭ سوڭىنا دەيىن كىتاپ وقۋ مادەنيەتىن جانە كىتاپ ءىسىن ناسيحاتتاۋدىڭ 2027 – 2031 جىلدارعا ارنالعان «زەردەلى ۇلت» تۇجىرىمداماسىن (بۇدان ءارى – «زەردەلى ۇلت» تۇجىرىمداماسى) بەكىتسىن;

6) 2027 جىلعى 1 قاڭتارعا دەيىن «كىتاپحانا جانە كىتاپ شىعارۋ ءىسى تۋرالى» قازاقستان رەسپۋبليكاسىنىڭ جاڭا زاڭىنىڭ جوباسىن ازىرلەسىن;

7) 2027 جىلعى 1 قاڭتارعا دەيىن كىتاپ وقۋ مادەنيەتىن دامىتۋداعى جەتىستىكتەرى ءۇشىن ۇلتتىق سىيلىق تاعايىنداسىن;

8) 2027 جىلعى 1 قاڭتارعا دەيىن بىرىڭعاي قولجەتىمدى ۇلتتىق تسيفرلىق كىتاپحانا پلاتفورماسىن قۇرسىن;

9) جىل سايىن «زەردەلى ۇلت» تۇجىرىمداماسىنىڭ ىسكە اسىرىلۋ بارىسى تۋرالى قازاقستان رەسپۋبليكاسى پرەزيدەنتىنىڭ اكىمشىلىگىنە ەسەپ بەرسىن.

وسى جارلىق قول قويىلعان كۇنىنەن باستاپ قولدانىسقا ەنگىزىلەدى.