جىل باسىندا اكىمدەر حالىق الدىندا ەسەپ بەرەدى عوي. سول كەزدە وتكەن جىلى جاسالعان جۇمىسپەن قاتار, بولاشاقتا اتقارىلاتىن تولىمدى ءىس تۋرالى دا ءبىلىپ جاتامىز. سونداي جيىندا ايماق باسشىسى قىرىمبەك كوشەرباەۆ بيىل قىزىلوردا قالاسىندا جاڭا تەاتر سالىناتىنىن ايتقان. مىنە, جاقىندا جاڭا مادەنيەت وشاعىنىڭ ەسكيزدىك جوباسى ساۋلەت-قالا قۇرىلىسى كەڭەسىندە تالقىلاندى.
تەاتر جەلتوقسان جانە قورقىت اتا كوشەلەرىنىڭ قيىلىسىندا بوي كوتەرەدى دەپ كۇتىلۋدە. جالپى اۋماعى 2,2 گەكتار جەردى قۇرايدى. عيماراتتىڭ ەنى – 48, ال, ۇزىندىعى 90 مەتر بولماق. سىرتقى كەلبەتىنە كلاسسيكالىق, شىعىس جانە قازاق ساۋلەت ونەرىنىڭ ۇلگىلەرى مەن ەلەمەنتتەرى كەڭىنەن قولدانىلماق. تەاتر 3 قاباتتان تۇرادى. ءبىرىنشى قابات شارۋاشىلىق-تەحنيكالىق بولمەلەرىنەن تۇرسا, ەكىنشى قاباتتا حولل, ۆەستيبيۋل, كيىم ىلەتىن ورىندار, اكىمشىلىك بولمەلەر, بۋفەت, 400 ورىنعا ارنالعان كورەرمەن زالى جانە تاعى باسقا دا قوسالقى جايلار ورنالاسادى. ءۇشىنشى قاباتتا 200 ادامعا ارنالعان كورەرمەن زالى قىزمەت ەتپەك.
تەاتر اۋماعىندا 200 اۆتوكولىككە ارنالعان اۆتوتۇراق سالۋ كوزدەلۋدە. تەاتردىڭ قاس بەتىنە شاعىن ساۋلەتتىك فورمالاردى ورنالاستىرۋ جوسپارلانۋدا.
بۇعان قوسا, ا.توقماعامبەتوۆ اتىنداعى تەاتردىڭ عيماراتى دا قايتا جاڭعىرتىلادى دەپ كۇتىلۋدە.
ەرجان بايتىلەس,
«ەگەمەن قازاقستان».
قىزىلوردا.