رامازان ايىندا جان باسىنا بەرىلەتىن ءپىتىر ساداقا مولشەرى ەلىمىز بويىنشا 200 تەڭگە. قازاقستان مۇسىلماندارى ءدىني باسقارماسىنىڭ تورالقا ماجىلىسىندە ەلىمىزدىڭ ءار ايماعىنداعى بيداي باعاسىن ەسكەرە كەلە, ورتاق ەسەپپەن ءبىراۋىزدان وسىلاي بەكىتىلدى.
باس ءمۇفتي ەرجان قاجى مالعاجى ۇلى قاتىسقان القالى جيىندا قاجىلىق ساپارىن جوعارى دەڭگەيدە ۇيىمداستىرۋ ءۇشىن بىلىكتى يمامداردى تارتۋ ماسەلەسى دە تالقىلاندى. باس ءمۇفتي رەسپۋبليكا بويىنشا مەشىتتەردە جۇيەلى تۇردە وتكىزىلىپ كەلە جاتقان ورتالىقتاندىرىلعان ونلاين دارىسكە جاماعاتتىڭ تولىققاندى قاتىسۋىن, ونلاين نۇكتەلەر سانىن اۋىلعا دەيىن كوبەيتۋدى, ءارى ساباقتىڭ ساپالى, ساۋاتتى ءوتۋىن قاداعالاۋدى وكىل يمامدارعا تاپسىردى.
قازاقستان مۇسىلماندارى ءدىني باسقارماسى «جاستاردى تەرىس اعىمداردان ساقتاندىرۋ», «قوعامنىڭ ءدىني ساۋاتىن ارتتىرۋ» تاقىرىپتارى بويىنشا بىلىكتى يمامداردىڭ ءدارىسىن جاڭا تەحنولوگيالار ارقىلى ناسيحاتتاۋدى قولعا الدى. «ازىرەت سۇلتان» مەشىتىندە ءدىني ۋاعىز ونلاين فورماتىندا جىل باسىنان بەرى وتكىزىلىپ كەلەدى.
«ەگەمەن-اقپارات».