60 مىڭ ءسوز قامتىعان, جالپى كولەمى 1 300 بەتتىك قازاقشا-اعىلشىنشا جانە اعىلشىنشا-قازاقشا وكسفورد سوزدىگىنىڭ تۇڭعىش باسىلىمىن قازاقستان پرەزيدەنتى ق.ك.توقاەۆتىڭ تاپسىرماسىمەن «ۇلتتىق اۋدارما بيۋروسى» دايىندادى. بۇل تۋرالى جوبا جەتەكشىسى راۋان كەنجەحان ۇلى الەۋمەتتىك جەلىدەگى پاراقشاسىندا جازدى.
الەمگە تانىمال Oxford University Press باسپاسى ەكىتىلدى oxford qazaq dictionary سوزدىگىن باسىپ شىعارۋعا رەسمي رۇقساتىن بەردى. سوزدىكتى ازىرلەۋدە دۇنيە جۇزىنە تانىمال Oxford English Dictionary سوزدىگىن قۇراستىرۋ ادىستەمەسى مەن تەحنولوگياسى نەگىزگە الىندى.
سوزدىك قۇراستىرۋ جۇمىسى ءتورت جىل ۇزدىكسىز ءجۇرىپ, وعان قازاق جانە اعىلشىن ءتىلىنىڭ لەكسيكاسىنا ماماندانعان 50-دەن اسا تاجىريبەلى ءتىلشى اتسالىستى. سوزدىكتى جەتىلدىرۋگە احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ماماندارى قاتىسىپ, سوزدىك ينستيتۋت عىلىمي كەڭەسىنىڭ ساراپتاماسىنان ءوتتى.
سوزدىك قۇراستىرۋ اياسىندا قازاق جانە اعىلشىن ءتىلى لەكسيكاسىنداعى وزگەرىستەر, اسىرەسە قازىرگى مادەنيەت, اقپاراتتىق تەحنولوگيالار, مەديتسينا, ەكونوميكا, قارجى مەن ساۋدا سالالارىنداعى جاڭالىقتار ەسكەرىلدى. سونداي-اق سوزدىكتە اعىلشىن جانە قازاق تىلدەرىنىڭ گرامماتيكاسى مەن دىبىستاۋ, ەملە ەرەجەلەرى تۇسىندىرىلەتىن قىسقاشا نۇسقاۋلىقتار, قازاق تىلىندەگى ىسكەرلىك جانە ەلەكتروندى حات-حابار جازۋ ۇلگىلەرى بەرىلدى.
سونىمەن بىرگە, وسى سوزدىك نەگىزىندە قازاق ءتىلى Oxford Global Languages پلاتفورماسىنا قوسىلادى. بۇل باستامانىڭ ماقساتى – الەمنىڭ ءىرى دە, ىرگەلى 100 ءتىلىنىڭ لەكسيكالىق قورىن ءوزارا بايلانىستىرىپ, ورتاق عالامدىق ءتىل كورپۋسىن جاساقتاۋ. ول تۋرالى كەڭىنەن قوسىمشا حابارلايمىز.
قازاق ءتىلىن الەمدەگى ەڭ تانىمال ءارى ەڭ بەدەلدى سوزدىكتەر جەلىسىمەن بايلانىستىرىپ, عالامدىق لينگۆيستيكالىق ورتاعا قوساتىن بۇل سوزدىك انا ءتىلىمىزدى قولداۋ جانە زامانعا ساي دامىتۋ جولىنداعى ۇلكەن قادام دەپ بىلەمىز.
وسى ماڭىزدى جوباعا قولداۋ بىلدىرگەن پرەزيدەنت ق.ك.توقاەۆتىڭ تاپسىرماسىنا سايكەس, سوزدىك كەڭ كولەمدە باسىلىپ, ەلىمىزدىڭ وقۋ ورىندارى مەن كىتاپحانالارىنا تاراتىلادى.
وسى جوباعا قاتىسىپ, اسا اۋقىمدى دا كۇردەلى جۇمىسقا اتسالىسقان بارشا ارىپتەستەرىمىزگە العىس ايتامىز!, دەيدى ر.كەنجەحان ۇلى.