استانادا مەملەكەت باسشىسى قاسىم-جومارت توقاەۆتىڭ قاتىسۋىمەن «تازا قازاقستان» جالپىۇلتتىق ەكولوگيالىق اكتسياسى ءوتتى. پرەزيدەنت ەكى جىل بۇرىن باستالعان بۇل يگى باستامانىڭ ەل بولاشاعى ءۇشىن ءمان-مازمۇنى ايرىقشا ەكەنىن اتاپ ءوتتى, دەپ حابارلايدى Egemen.kz.
پرەزيدەنتتىڭ ايتۋىنشا, بىلتىر رەسپۋبليكا بويىنشا 1200-گە جۋىق ەكولوگيالىق ءىس-شارا ءوتتى, 1 ميلليون گەكتاردان استام اۋماق تازارتىلدى, شامامەن 4 ميلليونعا جۋىق تال ەگىلدى.
«يگى باستاماعا 800 مىڭعا جۋىق ۆولونتەر قاتىستى. قازىر الەمدە قورشاعان ورتانىڭ لاستانۋى, كليماتتىڭ وزگەرۋىنە بايلانىستى كوپتەگەن سىن-قاتەر پايدا بولدى. ەكولوگيالىق قاۋىپسىزدىك ۇلتتىق قاۋىپسىزدىك ماسەلەسىنە اينالدى. حالىقارالىق قاۋىمداستىق تابيعاتتى قورعاۋ ماسەلەسىنە باسا ءمان بەرىپ وتىر. قازاقستان دا وسى باعىتتا ناقتى باستامالار كوتەرىپ كەلەدى», دەدى پرەزيدەنت.
مەملەكەت باسشىسى كەشە استانادا بىرىككەن ۇلتتار ۇيىمىنىڭ اياسىندا ۇيىمداستىرىلعان وڭىرلىك ەكولوگيالىق سامميت اياقتالعانىن ەسكە سالدى.
«وسى اۋقىمدى فورۋم شەڭبەرىندە ەكوۆولونتەرلىككە, رەسۋرستاردى ۇنەمدەۋ ماسەلەلەرىنە ارنالعان ماڭىزدى ءىس-شارالار ءوتتى. بۇعان دەيىن دە ايتقانىمداي, الەمدە ەشقانداي ەل ەكولوگيا ماسەلەسىن جالعىز ءوزى شەشە المايدى. بۇل اسا كۇردەلى, جاۋاپتى جۇمىس, سوندىقتان وسى باعىتتا ديپلوماتيالىق كۇش-جىگەردى, عىلىمدى, بيزنەستى, قوعامدى, ۆولونتەرلەردى, ءبىر سوزبەن ايتقاندا, ماقساتكەر جاستاردى جۇمىلدىرۋ قاجەت. ويتكەنى پاتريوت جاستار ءاردايىم وزگەرىستەردىڭ كوش باسىندا جۇرەدى. سىزدەردىڭ تاريحي ميسسيالارىڭىز – ەلىمىزدى جوعارى تەحنولوگيالار مەن ونەر, عىلىم جانە گۋمانيستىك قۇندىلىقتار سالالارىندا مەيلىنشە دامىعان مەملەكەتتەر قاتارىنا قوسۋ», دەدى مەملەكەت باسشىسى.
ەسكە سالا كەتەيىك, بۇگىن مەملەكەت باسشىسى «تازا قازاقستان» رەسپۋبليكالىق ەكولوگيالىق اكتسياسىنا قاتىسىپ, جاستارعا ريزاشىلىعىن ءبىلدىردى.
قازاقستاندا 46 جاڭا ەكواۋماق پايدا بولادى