قازاقستاندىق بوكسشى ساكەن بيبوسىنوۆتىڭ تيتۋلدىق جەكپە-جەگى اياق استىنان وتپەيتىن بولىپ قالدى, دەپ حابارلايدى Egemen.kz.
بىشكەكتە ءوتۋى ءتيىس Bishkek Worldwide Clash ءتۋرنيرى رەسمي تۇردە توقتاتىلدى. العاشىندا بوكس كەشى 17 ساۋىرگە جوسپارلانعان بولاتىن. الايدا كەيىن ۇيىمداستىرۋشىلار ءتۋرنيردى 23 مامىرعا اۋىستىرعان ەدى. سول كەزدە سەبەپ رەتىندە تاياۋ شىعىستاعى جاعداي ايتىلعان.
ەندى مىنە تۋرنير مۇلدەم وتپەيتىن بولىپ شەشىلدى. وسىعان جاعدايعا بايلانىستى ءتۋرنيردى ۇيىمداستىرۋشىلار رەسمي مالىمدەمە جاسادى.
SaikouLush Boxing Promotions پروموۋشەنى ءتۋرنيردىڭ توقتاتىلعانىن رەسمي تۇردە راستادى.
مالىمدەمەدە ۇيىمداستىرۋشىلار كۇتپەگەن جاعدايلارعا بايلانىستى بوكس كەشىن وتكىزۋ مۇمكىن بولماعانىن ايتتى. سونىمەن قاتار پروموۋشەن ءتۋرنيردى كۇتكەن بوكسشىلاردان, كوماندالاردان, سەرىكتەستەردەن جانە جانكۇيەرلەردەن كەشىرىم سۇرادى.
ساكەن بيبوسىنوۆ تا الەۋمەتتىك جەلى ارقىلى بەلگىلەنگەن جەكپە-جەكتىڭ وتپەي قالعانىنا قاتىستى پىكىرىن ءبىلدىردى.
«وكىنىشكە قاراي, 23 مامىرعا جوسپارلانعان جەكپە-جەك بەلگىلى ءبىر سەبەپتەرگە بايلانىستى وتپەيدى. جوسپار وزگەردى. بىراق جۇمىس جالعاسىپ جاتىر», - دەپ جازدى بوكسشى جەكە پاراقشاسىندا.