وليمپياداعا دايىندىق تالقىلاندى

جيىندا ەلىمىزدىڭ سپورت سالاسىنا جاۋاپتى باسشىلار قازاقستاندىق سپورت­شىلاردىڭ ءىرى حالىقارالىق جارىس­تارداعى ارالىق ناتيجەلەرىن, ولاردى دايارلاۋ جۇيەسىندەگى وزگەرىستەردى, مەديتسينالىق-بيو­لوگيالىق قامتاماسىز ەتۋ جانە دوپينگكە قارسى باعدارلامالاردى, سونداي-اق وڭىرلەردە وليمپيادالىق سپورت تۇرلە­رىنىڭ جاي-كۇيى مەن دامۋىنا قاتىستى ماسەلەلەر باياندالدى.

القالى وتىرىستا ءسوز العان داۋرەن اباەۆ وليمپياداعا قاتىسۋعا مۇمكىندىك بەرەتىن ليتسەنزيالار سانىنا ەمەس, مەدال­داردىڭ ساپاسىنا نازار اۋدارۋ قاجەت ەكەنىن ايتتى. سەبەبى كەز كەلگەن جارىستىڭ جالپىكوماندالىق ەسەبى التىن مەدال سانىنا قاراپ جۇرگىزىلەتىنى بەلگىلى. سونداي-اق مينيستر فەدەراتسيا باسشىلارى مەن جاتتىقتىرۋشىلارعا بىرقاتار تاپسىرما بەردى. ماسەلەن, ەندىگى كەزەكتە قۇراما كوماندالارعا جاستاردى تارتۋ ارقىلى جاسارتۋ جانە حالىقارالىق جارىستارعا ىرىكتەۋدى بارىنشا اشىق وتكىزۋ بويىنشا جۇمىستى بەلسەندى جۇرگىزۋ قاجەت ەكەنىن جەتكىزدى.

«ەل سپورتىن دامىتۋ ءۇشىن بيۋدجەتتەن قوماقتى قاراجات ءبولىنىپ, قولداۋ كورسە­تىلۋدە. قاجەتتى جاعدايلار جاسالىپ جاتىر. دەگەنمەن مينيسترلىك قايى­رىمدىلىقپەن اينالىسپايدى. سوندىقتان ەرتەڭ جۇمسالعان ءار تيىننىڭ سۇراۋى بولادى. مۇنى وسىندا وتىرعان ارقايسىڭىز ەستە ساقتاۋعا تيىسسىزدەر. سپورتتاعى جوعارى جەتىستىكتەر ناقتى ناتيجەلەرگە نەگىزدەلەدى, قالعانى – دەنە شىنىقتىرۋ. سوندىقتان بىزگە جاڭا جەڭىستەر كەرەك», دەدى داۋرەن اباەۆ.

سپورتتى دامىتۋ ديرەكتسياسىنىڭ ديرەكتورى ورالباي جاقسىمبەتوۆ پاريجدە 329 مەدال جيىنتىعى وينالاتىنىن ايتتى (توكيودا 339 مەدال جيىنتىعى وينالعان ەدى). ايتا كەتەيىك, ەلىمىزدىڭ قۇراما كوماندالارى وسى جىلدىڭ باسىنان بەرى 19 الەم چەمپيوناتىنا جانە 20 ازيا چەمپيوناتىنا قاتىسىپ, 140 مەدال جەڭىپ الدى: ونىڭ ىشىندە 35 التىن, 40 كۇمىس, 65 قولا بار.  2022 جىلدىڭ سوڭىنا دەيىن ءبىزدىڭ سپورتشىلار تاعى 3 الەم چەمپيوناتىنا جانە 3 ازيا چەمپيوناتىنا قاتىسادى.

ءۇش جارىم ساعاتقا سوزىلعان جيىندا سپورتتىق مەديتسينا جانە وڭالتۋ ورتالىعىنىڭ ديرەكتورى ازامات نۇر­ماتوۆ, ۇلتتىق دوپينگكە قارسى ورتالىقتىڭ ديرەكتورى مايرا باقاشەۆا, سپورت باسقارمالارىنىڭ باسشىلارى, سپورت تۇرلەرى بويىنشا فەدەراتسيا وكىلدەرى جانە باسقا دا جاۋاپتى تۇلعالار جۇمىس ناتيجەلەرى تۋرالى باياندادى.

«قۇراما كوماندا قاتارىنا سپورتشىلاردى ىرىكتەۋ راسىمدەرىنىڭ اشىق ءوتۋى ماڭىزدى. بۇل ءبىزدىڭ باستى نازارى­مىزدا بولادى. الداعى ۋاقىتتا مينيسترلىك سپورت­شىلاردىڭ بارلىق جەتىستىگىن, جارىستارعا قاتىسۋ كەستەسىن باقىلاۋعا مۇمكىندىك بەرەتىن ە-sport جۇيەسىن ىسكە قوسادى. ادى­لەت­تىلىك پەن اشىقتىق ماڭىزدى, سپورت جۇيەسىندە سالاماتتى باسەكەلەستىك بولۋعا ءتيىس», دەدى داۋرەن اباەۆ.

مينيستر سپورت باسقارمالارىنىڭ باس­شىلارىنا وليمپيادالىق سپورت تۇرلە­رىنىڭ باسىمدىعىن ەسكەرە وتىرىپ, جوعارى سپورت شەبەرلىگى مەكتەپتەرىنىڭ جۇمىس ىستەۋ قاعيداتتارى مەن تاسىلدەرىن قايتا قاراۋ, فەدەراتسيالارمەن بىرلەسىپ سپورت رەزەرۆىن دايىنداۋدىڭ بىرىڭعاي ستاندارتىن جانە وقىتۋ باعدارلامالارىن ازىرلەۋدى تاپسىردى.