بيىل مەملەكەت باسشىسىنىڭ «بولاشاق» باعدارلاماسىن قايتا باعدارلاۋ تۋرالى تاپسىرماسىنا سايكەس بىرقاتار جۇمىس اتقارىلدى. بۇل جونىندە ورتالىق كوممۋنيكاتسيالار الاڭىندا «حالىقارالىق باعدارلامالار ورتالىعى» اق باسقارما توراعاسى ءانۋار جانعوزين كەڭىنەن ماعلۇمات بەردى.
پرەزيدەنت قاسىم-جومارت توقاەۆ جوعارى ءبىلىم بەرۋ سالاسىندا تەحنيكالىق ماماندىقتارعا باسىمدىق بەرۋدى تاپسىرعان ەدى. بۇل مىندەت «بولاشاق» باعدارلاماسىن قايتا باعدارلاۋ بارىسىندا دا ەسكەرىلدى.
– IT جانە ينجەنەرلىك ماماندىقتارعا گرانتتار سانى وتكەن جىلمەن سالىستىرعاندا 36 پايىزدان 60 پايىزعا دەيىن ۇلعايتىلدى. جوعارى وقۋ ورىندارىنىڭ تىزىمىنە 23 جەتەكشى تەحنيكالىق ۋنيۆەرسيتەت ەندى. جالپى, بۇل تىزىمگە الەمنىڭ 26 ەلىنەن 236 ۇزدىك جوعارى وقۋ ورنى كىرەدى. بيىل 14 قازاندا «بولاشاق» باعدارلاماسى بويىنشا قۇجات قابىلداۋ اياقتالدى. ونىڭ قورىتىندىسىندا وتىنىمدەردىڭ كوبى تەحنيكالىق ماماندىقتار بويىنشا تۇسكەن. سونىمەن قاتار مەملەكەت باسشىسىنىڭ تاپسىرماسىمەن الداعى ۋاقىتتا ينجەنەرلىك-تەحنيكالىق ماماندار ءۇشىن ارنايى جەڭىلدىك ساناتىن ەنگىزۋ جوسپاردا بار. تەحنيكالىق ماماندىقتى تاڭداعان ۇمىتكەرلەر قۇجات تاپسىرعاندا جوو-دان شاقىرۋدى ۇسىنۋعا مىندەتتى بولمايدى, – دەدى ءا.جانعوزين.
ونىڭ ايتۋىنشا, تەحنيكا ماماندارى مەملەكەتتىك تىلدەن ەمتيحان تاپسىرعاندا ناتيجەسى كەمىندە ۆ1 قازتەست سەرتيفيكاتى بولۋى كەرەك. ال شەت تىلدەن ناتيجەسى 9,0 بالدان كەمىندە 5,0 بالل IELTS سەرتيفيكاتىن تاپسىرادى. جەڭىلدىگى بار ۇمىتكەرلەر ديپلومىنىڭ ورتاشا بالى – GPA 4,00-تەن كەمىندە 3,00 بولۋعا ءتيىس.
سونداي-اق حالىقارالىق باعدارلامالار ورتالىعىنىڭ باستاماسىمەن «بولاشاق» ستيپەندياسى اياسىندا مەديتسينا قىزمەتكەرلەرىنە قويىلاتىن تالاپتاردى جەتىلدىرۋ قاراستىرىلىپ وتىر.
– ستاتيستيكاعا سۇيەنەتىن بولساق, كادرلاردى دايارلاۋداعى نەگىزگى ماسەلە – شەت ءتىلىن مەڭگەرۋ دەڭگەيىنىڭ تومەندىگى. دەنساۋلىق ساقتاۋ قىزمەتكەرلەرى ءۇشىن مۇمكىندىكتەردى كەڭەيتۋ جانە قىزىعۋشىلىعىن ارتتىرۋ ماقساتىندا ارنايى جەڭىلدىك ساناتىن ەنگىزۋدى قاراستىرىپ وتىرمىز. ولارعا ءبىر جىلدىق تىلدىك دايىندىقتان ءوتىپ, ستيپەنديا تاعايىندالعاننان كەيىن شەتەلدىك ۋنيۆەرسيتەتكە ءتۇسۋ مۇمكىندىگى بەرىلەدى. ايتا كەتەرلىگى, بۇرىن جەڭىلدىك تەك اۋىلدىق جەرلەردەن كەلگەن ۇمىتكەرلەرگە قاراستىرىلاتىن. الداعى ۋاقىتتا اۋىلدىق ۇمىتكەرلەر ءۇشىن دە مۇمكىندىكتەردى كەڭەيتۋ جوسپاردا بار. اتاپ ايتقاندا, ولارعا اعىلشىن تىلىنەن IELTS ەمتيحانىنىڭ بالى 6,0 بالدان 5,0 بالعا دەيىن تومەندەتىلەدى. بۇعان قوسا ءبىر جىلدىق تىلدىك دايىندىقتان ءوتۋ مۇمكىندىگى بەرىلەدى, – دەدى ورتالىق باسشىسى.
ال تاعى ءبىر وزگەرىسكە كەلەتىن بولساق, الداعى ۋاقىتتا «بولاشاق» ستيپەندياسىن قوسا قارجىلاندىرۋ مەحانيزمىن ىسكە قوسۋ جوسپارلانىپ وتىر. ياعني ۇمىتكەردە جوعارى وقۋ ورنىنان, جۇمىس بەرۋشىدەن نەمەسە دەمەۋشىدەن ۇزدىك شەتەلدىك ۋنيۆەرسيتەتتە وقۋعا گرانت بولسا, باعدارلاما ەكى جاققا ۇشىپ قايتۋدى, ۆيزالىق الىمداردى, مەديتسينالىق ساقتاندىرۋدى, اي سايىنعى ستيپەنديانى جانە وقۋ ماتەريالدارىن ساتىپ الۋعا جاردەماقىنى وتەيدى. سونىمەن قاتار ەڭبەكپەن وتەۋ مەرزىمى 1 جىلعا دەيىن ازايتىلادى.
ءا.جانعوزيننىڭ ايتۋىنشا, قازىرگى تاڭدا Fortune-500 الەمدىك دەڭگەيدەگى ۇزدىك كومپانيالاردا تاعىلىمدامادان ءوتۋ ءۇشىن ەڭبەكپەن وتەۋ مەرزىمىن شەگەرۋگە قاتىستى وزگەرىستەر دە قاراستىرىلىپ جاتىر.