مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمى ءسامميتىنىڭ وتىرىسىندا ءسوز سويلەپ جاتىر, دەپ حابارلايدى Egemen.kz پرەزيدەنتتىڭ ءباسپاسوز قىزمەتىنە سىلتەمە جاساپ.
«تۇركى مەملەكەتتەرى ۇيىمىنىڭ وسى كەزەكتى باسقوسۋى اسا ماڭىزدى دەپ ويلايمىن. قاتىسىپ وتىرعانىما ريزامىن. ەڭ الدىمەن, وسى ءىس-شارانى جوعارى دەڭگەيدە ۇيىمداستىرىپ, زور قوناقجايلىق كورسەتىپ, جىلى قارسى العان وزبەكستان پرەزيدەنتى, قادىرمەندى شاۆكات ميرومونوۆيچ ميرزيوەۆكە ەرەكشە العىس ايتامىن. جيىنىمىز تۇركى الەمىنىڭ ماقتانىشى – كونە سامارقاند شاھارىندا ءوتىپ جاتىر. بۇل قالا تاريحي تامىرى تەرەڭ وركەنيەت وشاعى رەتىندە بۇكىل الەمگە تانىمال. سامارقاند قالاسى جىبەك جولىنىڭ التىن كوپىرى ەكەنىن بارشا تۇركى حالىقتارى مويىنداعان», دەدى قاسىم-جومارت كەمەل ۇلى. ايتا كەتەيىك, وسى كيەلى جەردە تۇركى مەملەكەتتەرى ۇيىمىنا توراعالىق ەتۋ قۇقىعى وزبەكستان رەسپۋبليكاسىنا بەرىلەدى. قازاقستان پرەزيدەنتى وزبەكستان تاراپى بۇل مىندەتتى ابىرويمەن اتقاراتىنىنا سەنىم ءبىلدىردى.