«ادام قۇقىعى جونىندەگى ۋاكىل تۋرالى» كونستيتۋتسيالىق زاڭ مەملەكەت باسشىسىنىڭ بيىلعى جولداۋىنداعى ادام قۇقىعى جونىندەگى ۋاكىلىنە قاتىستى تاپسىرماسىن ىسكە اسىرۋ ماقساتىندا ازىرلەندى. ونىڭ ماقساتى – ۇسىنىلعان وزگەرىستەر مەن تۇزەتۋلەردى ەنگىزۋ ارقىلى ادام قۇقىقتارىن قورعاۋ سالاسىن جەتىلدىرۋ جانە ۋاكىلدىڭ مارتەبەسىن كونستيتۋتسيالىق دەڭگەيدە بەكىتىپ, قۇزىرەتىن كۇشەيتۋ, تاۋەلسىزدىگىن ارتتىرۋ.
سونىمەن قاتار ۋاكىل قىزمەتىنىڭ قۇقىقتىق مارتەبەسىن, قاعيداتتارى مەن كەپىلدىكتەرىن كونستيتۋتسيالىق نەگىزدە رەگلامەنتتەپ, ۇلتتىق قۇقىق قورعاۋ قىزمەتىن نىعايتۋعا باعىتتالعان بىرقاتار وزگەرىستەر مەن تولىقتىرۋلار ەنگىزۋ كوزدەلگەن. اتاپ ايتقاندا, ازاماتتاردىڭ قۇقىقتارى بۇزىلعان جاعدايدا ءتيىستى مەملەكەتتىك ورگاندارعا نەمەسە لاۋازىمدى ادامدارعا تىكەلەي جۇگىنۋ قۇقىعى بەرىلدى. پارلامەنت پالاتالارىنىڭ بىرلەسكەن جانە بولەك وتىرىستارىنا جانە پارلامەنت دەپۋتاتتارىنىڭ قاتىسۋىمەن وتەتىن وزگە دە ءىس-شارالارعا قاتىسا الادى.
ۇكىمەتكە جانە وزگە دە مەملەكەتتىك ورگاندارعا, جەرگىلىكتى مەملەكەتتىك باسقارۋ جانە ءوزىن-ءوزى باسقارۋ ورگاندارىنا, وزگە دە ۇيىمدارعا جانە لاۋازىمدى ادامدارعا ازاماتتاردىڭ قۇقىقتارى مەن بوستاندىقتارىن بۇزۋشىلىقتاردىڭ پروفيلاكتيكاسىنا جانە ولاردى قالپىنا كەلتىرۋگە باعىتتالعان شارالارعا قاتىستى ۇسىنىمدار مەن ۇسىنىستار بەرەدى. وڭىرلەردە ۋاكىلدىڭ الەۋەتىن نىعايتۋ جانە ونىڭ اتقارۋشى جانە وكىلدى ورگاندارمەن كەرى بايلانىسىن قامتاماسىز ەتۋ ماقساتىندا جەرگىلىكتى ءماسليحاتتار سەسسياسىنىڭ جالپى وتىرىستارىنا قاتىسۋ قۇقىعى قاراستىرىلعان.
ادام قۇقىقتارى جونىندەگى ۋاكىلدىڭ سايلانۋىن, قىزمەتىنەن بوساتىلۋىن جانە يممۋنيتەتتەرىنەن ايىرۋدى سەنات جۇزەگە اسىرادى. جالپى العاندا ۋاكىلگە كونستيتۋتسيالىق دارەجەدە وكىلەتتىكتەر بەرۋ ارقىلى ازاماتتارعا اتا زاڭىمىزداعى كەپىلدىك بەرىلگەن قۇقىقتارى مەن بوستاندىقتارىن قامتاماسىز ەتۋدى جانە قۇقىقتارىنىڭ جوعارى دەڭگەيدە قورعالۋىن تولىققاندى قالىپتاستىرادى.
نۇرلان بەكنازاروۆ,
سەنات دەپۋتاتى