قۇرلىقتىق حوككەي ليگاسىنىڭ (قحل) كەزەكتى تۋر ويىنىن «بارىس» استانادا پودولسكىنىڭ «ۆيتياز» كلۋبىمەن وتكىزدى.
بيىلعى ماۋسىمدا الا-قۇلا ويناپ جۇرگەن ەلوردالىق كلۋب تاعى دا ءوز جانكۇيەرلەرىن جەرگە قاراتتى. بۇل جولى ولار جارىس كەستەسىنىڭ بەل ورتاسىندا كەلە جاتقان «ۆيتيازگە» ەسە جىبەردى. الما-كەزەك دامىلسىز شابۋىلمەن وتكەن باسەكەنىڭ 8-مينۋتىندا ۆلاديسلاۆ كارا قوناقتاردى العا شىعاردى. ودان كەيىن جارتى ساعاتتان اسا ۋاقىت بويى تابلوداعى ەسەپ وزگەرگەن جوق. ەسەسىنە ءۇشىنشى كەزەڭدە قوس قاقپاعا ەكى-ەكى گولدان سوعىلدى. 41-مينۋتتا كارا ءدۋبلدىڭ اۆتورى اتانسا, كوپ ۇزاماي اركادي شەستاكوۆ ەسەپ ايىرماشىلىعىن قىسقارتتى. 49-مينۋتتا الەكساندر يارەمچۋك ءۇشىنشى شايبانى قاقپاعا ەنگىزدى. 55-مينۋتتا دىنمۇحامەد قايىرجان نىسانانى ءدال كوزدەپ, جەرگىلىكتى كورەرمەندى قۋانتتى. بىراق ودان ارىگە جەرلەستەرىمىزدىڭ ءالى دە, ۋاقىتى دا جەتپەدى. ەسەپ – 2:3.
28 كەزدەسۋدەن كەيىن نەبارى 25 ۇپاي جيناعان «بارىس» قازىرگى كەزدە تۇراقتى بىرىنشىلىكتىڭ جارىس كەستەسىندە 18-ورىندى قاناعات تۇتىپ وتىر.