شوتلانديانىڭ گلازگو قالاسىندا تەننيستەن بيللي دجين كينگ كۋبوگى جولىنداعى جارىس باستالدى. الەمنىڭ ەڭ ۇزدىك 12 كومانداسىنىڭ قاتىسۋىمەن ءوتىپ جاتقان ءداستۇرلى ءتۋرنيردىڭ تۇساۋكەسەر كەزدەسۋىن جەرلەستەرىمىز كەشە ۇلىبريتانيا قۇراماسىمەن وتكىزدى.
قازاقستانعا قاراعاندا ۇلىبريتانيانىڭ اتالعان جارىستا جيناعان تاجىريبەسى الدەقايدا زور ەكەنى ايتپاسا دا تۇسىنىكتى. وسى كۇنگە دەيىن ولاردىڭ باس جۇلدەگە قولى جەتپەگەنىمەن, ەسەسىنە ءتورت رەت فينالدا وينادى. وسى جايتتىڭ ءوزى-اق كوپ نارسەنى اڭعارتسا كەرەك. تۇماندى البيون ەلىنىڭ ەڭ ۇزدىك ويىنشىسى ەمما رادۋكانۋ بۇل جارىسقا قاتىسپادى. كەيبىر دەرەك كوزدەرىنە سەنسەك, بىلتىر اقش-تىڭ اشىق بىرىنشىلىگىندە ايدى اسپانعا شىعارىپ, باس جۇلدەنى ولجالاعان 19 جاستاعى تەننيسشىنىڭ جاراقاتى بار كورىنەدى. سول سەبەپتى دە رادۋكانۋ بيىل بيللي دجين كينگ كۋبوگىندە ونەر كورسەتۋدەن باس تارتقان. تۇتاستاي العاندا, ەمما بيىلعى ماۋسىمدى جوعارى دەڭگەيدە وتكىزدى دەپ ايتا المايمىز. جەڭىسىنەن جەڭىلىسى كوپ بولدى.
ال قازاقستان قۇراماسى ساپىنداعى ءاربىر ويىنشى وزدەرىنە ارتىلعان جاۋاپكەرشىلىك جۇگىن انىق سەزىندى. شوتلاندياعا كەلگەن بەتتە كوماندا كاپيتانى ياروسلاۆا شۆەدوۆا باق وكىلدەرىنە بەرگەن سۇحباتىندا: «قازاقستاننىڭ تەننيسشىلەرى بيللي دجين كينگ كۋبوگىندە تۇڭعىش رەت قاتىسقالى وتىر. سول سەبەپتى دە وسى جارىسقا تىڭعىلىقتى دايارلاندىق. ۇلتتىق كوماندامىزدىڭ تۋى استىنا كىل مىقتىلار جينالدى. بىزگە تەك جالعىز زارينا دياس قانا جەتىسپەي تۇر. ول ءالى دە ەسكى جاراقاتىنان ايىعا الماي ءجۇر. ايتپەگەندە زارينانىڭ وسى تۋرنيردە ويناسام دەگەن قۇلشىنىسى ەرەكشە ەدى. دەسەك تە باسقا قىزدارىمىز بابىندا. ەلەنا رىباكينا مەن يۋليا پۋتينتسەۆا تالاي دۇرمەكتە ىسىلعان ساقا ويىنشىلار ەكەنى وزدەرىڭىزگە ءمالىم. اننا دانيلينا جۇپتىق سايىستاردا ءوزىن وتە جاقسى قىرىنان كورسەتىپ ءجۇر. ولاردىڭ قاتارىنا جىبەك قۇلامباەۆا قوسىلدى. ول دا كوماندانى كۇشەيتەدى دەپ ويلايمىز. ءبىر سوزبەن ايتساق, وسى جارىستا بارىنشا تابىستى ونەر كورسەتىپ, ەلگە ابىرويمەن ورالۋ ءۇشىن بارىمىزدى سالامىز», دەپ اقتارىلا سويلەدى.
العاشقى بولىپ كورتقا يۋليا پۋتينتسەۆا مەن كەتي بۋلتەر شىقتى. 26 جاستاعى لەستەردىڭ تۋماسى بۇل كۇندەرى WTA رەيتينگىندە 124 ورىندا تۇر. جەرلەسىمىز ۇزدىكتەر تىزىمىندە 51 ساتىعا جايعاسقان. بۇعان دەيىن ەكەۋى ەكى مارتە كەزدەسىپ, ەكى رەتىندە دە يۋليانىڭ مىسى باسىم بولدى. دەسەك تە بۇل جولى ءبىرىنشى سەتتە بۋلتەر پۋتينتسەۆانى ۇتىپ كەتتى. بىراق بۇل جاعداي تاجىريبەلى تەننيسشىنىڭ جىگەرىن جاسىتا العان جوق. ودان كەيىن جيناقى ويناعان يۋليا قالعان ەكى سەتتى ءوز پايداسىنا شەشتى. 2 ساعات 10 مينۋتقا سوزىلعان سايىس 4:6, 6:3, 6:2 ەسەبىمەن اياقتالدى.
– ءيا, مەن ويىندى وتە سىلبىر باستاعانىمدى مويىندايمىن. ونىڭ وزىندىك سەبەبى دە بار. ويتكەنى, ءبىز جاتتىعۋ جاساعان كورت پەن جارىس ءوتىپ جاتقان كورتتىڭ ءبىراز ايىرماشىلىعى بار. سوعان بەيىمدەلۋ ءۇشىن ءبىراز ۋاقىت كەتتى. بىرتە-بىرتە ويىنىم جۇرە باستادى. اقىرى جەڭىسكە جەتىپ, كوماندا قورجىنىنا قاجەتتى ۇپايدى سالدىم. ەڭ باستىسى – وسى! ەندىگى ءۇمىتىمىز – ەلەنا رىباكينادا, – دەپ يۋليا پۋتينتسەۆا ءوز ويىمەن ءبولىستى.
كەلەسى كەزدەسۋ ەلەنا رىباكينا مەن حەرريەت دارت اراسىندا ءوتتى. لوندوندا دۇنيەگە كەلگەن حەرريەت تە 1996 جىلدىڭ تۋماسى. الەمدىك رەيتينگتە ول 97 ساتىعا تۇراقتاسا, ەلەنا 22 ورىندى يەلەنگەن. ەلىمىزدىڭ ءبىرىنشى راكەتكاسى بۇل باسەكەدە قارسىلاسىن باس كوتەرتپەي ۇتتى. ەسەپ – 6:1, 6:4. ودان كەيىن جۇپتىق سايىستى تاماشالادىق. بۇل كەزدەسۋدە رىباكينا مەن اننا دانيليناعا سەنىم ارتىلدى. ولار اليسيا بارنەتت پەن وليۆيا نيككولستان 5:7, 3:6 ەسەبىمەن ۇتىلىپ قالدى. سوعان قاراماستان قازاقستان قۇراماسى تۇساۋكەسەر كەزدەسۋىن جەڭىسپەن اياقتادى. كەلەسى كەزدەسۋىن جەرلەستەرىمىز كەشە يسپانيا تەننيسشىلەرىمەن وتكىزدى.
ەستەرىڭىزگە سالا كەتەيىك, بيللي دجين كينگ كۋبوگى جولىنداعى جارىستىڭ وزگە توپتارىندا مىنا كوماندالار ءوزارا شەبەرلىك كورسەتىپ جاتىر: ا توبى – شۆەيتساريا, كانادا جانە يتاليا. ۆ توبى – اۋستراليا, سلوۆاكيا جانە بەلگيا. D توبى – چەحيا, اقش جانە پولشا. ءار توپتىڭ ۇزدىك كوماندالارى جارتىلاي فينالعا جولداما الادى. ال اتالعان جارىستىڭ جەڭىمپازى 13 قاراشادا انىقتالادى.