ەلىمىزدە سىبايلاس جەمقورلىققا قارسى كۇرەس قانشالىقتى ناتيجەلى اتقارىلىپ جاتقانىن ناقتى ايتۋ قيىن. مەملەكەت قارجىسىنا قول سۇققان شەنەۋنىكتەردىڭ تەمىر تورعا قامالۋى ماسەلەنىڭ شەشىلىپ جاتقانىن اڭعارتپاسا كەرەك. پروبلەمانىڭ سەبەپ-سالدارىمەن كۇرەسۋ ماڭىزدى.
بۇل تۋرالى قازاقستان رەسپۋبليكاسىنىڭ پرەزيدەنتتىگىنە جالپىۇلتتىق سوتسيال-دەموكراتيالىق پارتياسى اتىنان كانديدات نۇرلان اۋەسباەۆ استانا قالاسىندا وتكەن سايلاۋشىلارمەن كەزدەسۋدە ايتتى. ونىڭ پىكىرىنشە, مەملەكەت الدىندا تۇرعان باستى ماسەلەلەردىڭ ءبىرى – سىبايلاس جەمقورلىقتىڭ دەڭگەيىن تومەندەتۋ. ول ءۇشىن بىرقاتار ساياسي رەفورمانى جۇزەگە اسىرۋ كەرەك. رەفورمالاردىڭ ءبىرى بيۋدجەت پروتسەدۋرالارىن جەتىلدىرۋمەن ايقىندالادى. ءار ەلدى مەكەندە وزىنە تيەسىلى اشىق بيۋدجەت جاساقتالىپ, ناقتى ۋاقىت رەجىمىندە ونلاين تۇردە مەملەكەت قارجىسىنىڭ قالاي جانە قايدا جۇمسالىپ جاتقاندىعى اشىق كورسەتىلىپ وتىرۋى كەرەك. سونداي-اق كانديدات ورتالىق جانە جەرگىلىكتى اتقارۋ ورگاندارىندا بارلىق دەڭگەيدەگى دەپۋتاتتار مەن شەنەۋنىكتەردىڭ كىرىس-شىعىسى تۋرالى مىندەتتى جاريا دەكلاراتسيانى شۇعىل تۇردە ەنگىزۋ قاجەت دەپ سانايدى.
سونىمەن قاتار نۇرلان اۋەسباەۆ زاڭسىز بايۋعا قاتىستى قىلمىستىق جاۋاپكەرشىلىكتى قاتاڭداتۋدى ۇسىندى. «پاراقورلارمەن ناتيجەلى كۇرەستىڭ جالعىز جولى – وسى», دەيدى ول.