«اۋىل» پارتياسىنان قازاقستان رەسپۋبليكاسىنىڭ پرەزيدەنتتىگىنەن ۇمىتكەر جيگۋلي دايراباەۆ «Danmard» جشس ەڭبەك ۇجىمىمەن كەزدەستى. كەزدەسۋ بارىسىندا كانديدات ەڭبەك ادامىنىڭ ءرولىن ارتتىرۋ جانە ەلدەگى جەڭىل ونەركاسىپتىڭ ماسەلەلەرىن تالقىلادى.
اسكەر مەن ءورت سوندىرۋشىلەرگە كيىم تىگۋمەن اينالىساتىن كاسىپورىن بۇگىندە ءوندىرىسىن دامىتىپ, جوعارى كورسەتكىشتەرگە قول جەتكىزىپ كەلەدى. كەزدەسۋدە كانديدات ءوزىنىڭ سايلاۋالدى ناۋقانى اياسىندا ەڭبەك ادامىنىڭ ءرولى مەن ماڭىزدىلىعىن ارتتىرۋعا باسا ءمان بەرگەنىن ايتتى.
سونىمەن قاتار جيگۋلي دايراباەۆ مەملەكەتتىك تاپسىرىستاردىڭ ءادىل ءبولىنۋى ءتيىس ەكەنىنە توقتالىپ, ۇلتتىق جانە كۆازيمەملەكەتتىك كومپانيالار تەك يمپورتتىق تاۋارلاردى ساتىپ الاتىنىن اتاپ ءوتتى.
«ەلىمىزدە جەڭىل ونەركاسىپ دامىماعان, ونىمەن اينالىساتىن جەكە ءبولىم جوق. ەكونوميكانىڭ وسى سالاسىن جانداندىرۋ جانە دامىتۋ ءۇشىن ۇلتتىق كومپانيالار وتاندىق ءوندىرىستى قولداۋى كەرەك. ماسەلەن, جەڭىل ونەركاسىپ ونىمدەرىن ۇلكەن كولەمدە ساتىپ الا الاتىن قتج-نىڭ بۇيرەگى يمپورتقا بۇرىپ تۇرادى. نارىقتىق ەكونوميكانىڭ ءوز زاڭدىلىعى بار, تۇسىنەمىز, بىراق بىزدە وتاندىق ونەركاسىپ باسىمدىققا يە بولۋى قاجەت. اۋىلدىق ەلدى مەكەندەردە جۇمىس كۇشى مول. ەگەر وسى مۇمكىندىكتى دۇرىس پايدالانساق, جەڭىل ونەركاسىپ كاسىپورىندارىن دامىتا وتىرىپ, كوپتەگەن ماسەلەنى شەشىپ, اۋىل تۇرعىندارىن جۇمىسپەن قامتاماسىز ەتەر ەدىك», دەدى كانديدات.