شالعايداعى اعايىنعا شاراپاتى تيگەن

وسىنداي جاعدايدا ەلىمىزدىڭ تۇس-تۇسىن ارالاپ, شالعايداعى اعايىنعا شاراپاتىن تيگىزىپ جۇرگەن «مەديتسينالىق پو­يىز­دارعا» حالىق رياسىز ريزا­شىلىعىن ءبىلدىرىپ جاتىر. بيىل التى ايدا بۇل شيپالى پويىز­دار 80 649 ازاماتقا تەگىن مەدي­تسينالىق كومەك كورسەتتى.

مارەسىنە جەتكەن جوبانى «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى دەنساۋلىق ساقتاۋ مينيسترلىگىنىڭ قاتىسۋى­مەن, «قازاقستان تەمىر جولى» ۇك اق» جانىنداعى «الەۋمەتتىك جوبالار قورى» كورپوراتيۆتىك قورىمەن بىرلەسىپ ىسكە اسىردى. بۇل جوبانىڭ باستى ماقساتى – ساپالى مەديتسينالىق قىزمەتكە قول جەتكىزە الماي وتىرعان, شالعايدا جاتقان ستانسالار مەن ولارعا جاقىن ورنالاسقان ەلدى مەكەندەردىڭ تۇرعىندارىن تەگىن مەديتسينالىق تەكسەرۋدەن وتكىزۋ.

بيىل قازاقستاننىڭ تۇس-تۇ­سىن­داعى بەكەتتەردە ازاماتتار­عا زاماناۋي دياگ­نوس­تيكالىق جابدىقتار ورناتىلعان «سالا­ماتتى قازاقستان» جانە «جاردەم» مەديتسينالىق پويىز­دارىنىڭ ماماندارى كومەك كورسەتتى. مەديتسينالىق پو­يىزدار بۇكىل قازاقستاندى ارالاپ شىقتى. «جاردەم» – قىزىلوردا, باتىس قازاقستان, اقتوبە, اتىراۋ, ماڭعىستاۋ, تۇركىستان, جامبىل وبلىستارىنا, «سالاماتتى قا­زاقستان» الماتى, جەتىسۋ, اباي, شى­عىس قازاقستان, پاۆلودار, سولتۇستىك قازاق­ستان, اقمولا, قوستاناي جانە قاراعاندى مەن ۇلىتاۋ وبلىستارىنا باردى. التى ايدا پويىز ماماندارى 147 بەكەت­تىڭ تۇرعىندارىن دەمالىسسىز قابىلدادى.

جۇمىس بارىسىندا بارلىعى قازاق­ستاننىڭ 80 649 تۇرعىنىنا ەمدەۋ-كون­سۋلتاتسيالىق قىزمەت كورسەتىلىپ, ونىڭ ىشىندە 21 867 بالا قارالدى. 5 097 شا­عىن حيرۋرگيالىق وپەراتسيا جاسالىپ, 26 587 ادامعا ستوماتولوگيالىق كومەك كورسەتىلدى. «جاردەم» مەديتسينالىق پويىز ماماندارى 59 بالانى سۇندەتتەدى. مەدي­تسينالىق پويىزداردا بار­لىعى 389 388 دارىگەرلىك قابىلداۋ بولدى. جولدىڭ جالپى ۇزىندىعى – 22 009 شاقىرىم.

سالىستىرا كەتسەك, پاندە­مياعا دەيىنگى 2019 جىلى جوباعا قاتىسقان ماماندار 273 ەلدى مەكەندى ارالاپ, 63 مىڭنان اسا تۇرعىنعا مەديتسينالىق كومەك كورسەتتى. ال دارىگەرلەرگە قارالۋ­دىڭ جالپى سانى 209 249-دى قۇرادى.

«جالپى, «Samruk-Kazyna Trust» قورىنىڭ 2022 جىلعا ارنالعان قايىرىم­دىلىق بيۋدجەتى 10 ملرد تەڭگەنى قۇرايدى. ونىڭ ىشىندە 9 ايدا 7,1 ملرد تەڭگە يگە­رىلدى. بۇل رەتتە ەل بويىنشا 44 جو­با ىسكە اسىرىلۋدا, ونىڭ 30-ى بيىل قام­قورشىلىق كەڭەستىڭ ماقۇلداۋىنا يە بولدى. سول جوبالاردىڭ ءبىرى – «مە­ديتسينالىق پويىزدار». ءبىزدىڭ قور­دان 760 ملن تەڭگەگە جۋىق قارجى جۇمسا­لىپ, شالعايدا ورنالاسقان ەلدى مەكەن تۇرعىندارىنا تەگىن مەديتسينالىق كومەك كورسەتىلدى. ءبىز ءۇشىن بۇل جوبانىڭ ماڭىزى زور. ويتكەنى وسى ارقىلى حالىق دەنساۋلىعىن جاقسارتۋعا, الىس اۋداندار مەن اۋىل تۇرعىندارىنا قاجەت قىزمەت تۇرلەرىن قولجەتىمدى ەتۋگە مۇمكىندىك تۋدى. مەن پويىز ۇجىمدارىنا, ونداعى دارىگەرلەرگە العىسىمدى بىلدىرگىم كەلىپ وتىر. اقجولتاي قۇرامنىڭ ارقاسىندا كوپتەگەن ەل تۇرعىندارى تەگىن ءارى ساپالى مەديتسينالىق كومەك الىپ, ءومىر ءسۇرۋ ساپاسى جوعارىلاۋدا», دەدى «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا.

دارىگەرلەردىڭ ايتۋىنشا, تۇرعىن­داردى تەكسەرۋ كەزىندە قانت ديابەتى, گلاۋ­كوما, ليپوما, ارتروز, سوزىلمالى حو­لە­­تسيستيت, سوزىلمالى پانكرەاتيت, اللەر­گيالىق دەرماتيت اۋرۋلارى كەڭىنەن تارال­عانى بايقالعان. ونكولوگيالىق اۋرۋلاردان بولەك, تاعى ءجيى كەزدەسەتىن دەرتتىڭ ءبىرى – ينسۋلت. تۇرعىنداردىڭ اراسىندا نەۆروپاتولوگ, حيرۋرگ, كوز, قۇلاق جانە مۇرىن دارىگەرلەرىنە سۇرانىس كوپ بولدى.

«ەلدى ارالاپ جۇرگەن كەزدە ءارتۇرلى جاعدايعا تاپ بولامىز. كوبىنە الىس جات­قان ەلدى مەكەندەردە دەرتتى دەر كەزىن­دە انىقتايتىن ارنايى مەديتسينالىق قۇرىلعىلار بولماي جاتادى, سونداي-اق مامان تاپشىلىعى دا بار. مىسالى, باتىس قازاقستاندا بولعانىمىزدا 76 ادامنان تۋبەركۋلەز دەرتى انىقتالدى. سونداي-اق №10 رازەزدە قيىن جاعدايعا تۇسكەن سابيگە كومەك كورسەتىلدى. اۋىر دارەجەدەگى كۇيىك دياگنوزىمەن (تەرى ترانسپلانتاتسياسى) تۇسكەن ءبىر جارىم جاستاعى بالاعا كورسەتىلگەن ستاتسيونارلىق ەمدەۋدەن كەيىن پويىز دارىگەرلەرى كۇردەلى تاڭۋ جۇر­گىزدى. ودان بولەك, بەگىمبەت ستان­ساسى­نىڭ 90 جاستاعى تۇرعىنى شاي­كەن باقىت­جانوۆانىڭ ۇيىنە بارىپ, ەكىنشى رەت تەكسەرۋ جۇرگىزدىك. 2019 جىلعى ساپار كەزىندە ەم-دوم جۇرگىزگەنبىز. بيىل كەلگەنىمىزدى ەستىپ, قىزى حابارلاسىپ, اناسىنىڭ دەنساۋلىعىن تەكسەرىپ بەرۋدى سۇرادى. ءبىز ءوز كەزەگىمىزدە اناليز الىپ, ناۋقاستىڭ جۇرەگىن تەكسەردىك. ريزا بولعان كەيۋانانىڭ اق باتاسىن دا الدىق», دەدى «جاردەم» پويىزىنىڭ باس دارىگەرى اينۇر ەگىنباەۆا.

ەلىمىزدىڭ سولتۇستىك, شىعىس, ورتالىق وڭىرلەرىن ارالاعان «سالاماتتى قازاق­ستان» دارىگەرلەرى دە جۇمىس بارىسىن­دا ءارتۇرلى وقيعالارعا تاپ بولعان. ما­سە­لەن, پاۆلودار وبلىسى مارالدى ستان­ساسىنىڭ تۇرعىنىندا وتە سيرەك كەزدە­سەتىن دياگنوز – دەكستروكارديا بار ەكەنىن پويىز ماماندارى انىقتاعان. بۇل دەگەنىمىز – ناۋقاستىڭ جۇرەگى وڭ جاعىندا ورنالاسقان. ارينە, مۇنداي جاعدايدا ەم تاعايىندالمايدى, بىراق بۇل اقپاراتتى 47 جاستاعى تۇرعىن مەديتسينالىق پويىزدا تەكسەرۋ كەزىندە العاش رەت بىلگەن. سونداي-اق سولتۇستىك قازاقستاندا 22 جاستاعى قىزدا ەحينوكوككوز دەرتى انىقتالىپ, ماماندار ناۋقاستى وپەراتسيا جاساتۋعا جىبەرگەن.

مەديتسينالىق پويىزدار ماماندا­رىنىڭ كومەگىن العان ازاماتتىڭ ءبىرى – گۇزال مۇحامەد. ءوزى شىمكەنت قالاسىنىڭ تۋماسى بولعانىمەن, دارىگەرلەر قابىل­داۋىنا اتىراۋدا كەلگەن.

«مەن جازدا قىدىرىپ, اتىراۋداعى مۇقىر ستانساسىنا باردىم. سول جاقتاعى تانىستارىمنان «جاردەم» پويىزىنىڭ كەلگەنىن ەستىدىم. كەنەتتەن ءىشىم اۋىرىپ, قاتتى مازامدى الدى. سودان بىردەن پو­يىز مامان­دارىنا باردىم. پويىزدا ۋدز-عا ءتۇسىپ, اناليز تاپسىردىم. جەدەل تۇردە حيرۋرگ «سوقىرىشەك» دياگنوزىن قويىپ, وبلىس­تىق ەمحاناعا پويىز ماماندارى الىپ باردى. ول جەردە دە مەنىڭ دياگنوزىم­دى راستاپ, بىردەن وپەراتسيا جاسادى. دارىگەرلەرگە, ۇيىمداستىرۋشىلارعا العىسىم شەكسىز», دەپ ءوز ريزاشىلىعىن ءبىلدىردى ول.

جوبا العاش رەت 2010 جىلى ىسكە قوسىلىپ, 2019 جىلعا دەيىن جىل سا­يىن ىسكە اسىرىلىپ كەلدى دە, كوروناۆيرۋس ىندەتى كەزىندە ءۇزىلىس الدى. وسى كەزەڭ ىشىندە «دەنساۋلىق», «جاردەم» جانە «سالاماتتى قازاقستان» اتتى ءۇش كونسۋلتاتسيالىق-دياگنوستيكالىق پويىز قازاقستاننىڭ شالعايدا ورنالاسقان 1 870 ەلدى مەكەنىن ارالاپ, 569 530 تۇرعىن تەكسەرۋدەن ءوتتى. 17 078 شاعىن حيرۋرگيالىق وپەراتسيا جاسالىپ, 148 546 ادامعا ستوماتولوگيالىق كومەك كورسەتىلدى.